4 nyied 15 hauh dwg ngoenz son guekgya ancienz daengx biengz, dangngoenz, Bingzsiengz Si youq Bujcai Goujan guh hozdung senhconz minzcuz fapceih, daengx si gyoengq cwngzyenz danhvei “bouxlawz caepfap bouxlawz bujfaz” caeuq Youjyizgvanh Haijgvanh、 Nanzningz Haijgvanh capyouq Bingzsiengz danhvei caemh guh.

Ndaw hozdung, ginzcung daenj buhvaq minzcuz gyaeundei doq ciengq doq foux, doengzcienz dinghdangh nabfuk、 doiqfwen daengj cezmuz gig ndei yawj. Haeuxnaengj haj saek、 saw veh baijok yinx yienhciengz bouxyawj youh yawj youh ingj, hozdung aeu vwnzva guh moiz、 yungh gijgwn guh giuz, hawj senhconz fapceih engq miz rengzhoengh.

Hozdung doenggvaq hingzsik “fapceih doxcomz senhconz + vwnzva guh’angq dox baedauq”, senhconz 《Cunghvaz Yinzminz Gunghozgoz Yenfaz》、《Cunghvaz Yinzminz Gunghozgoz Minzfazdenj》、 minzcuz lijlun cwngcwz daengj faplwd fapgvi hawj ginzcung, hawj gyoengqvunz rox fuengzre densin yaeuhlox、ciengxlaux yaeuhlox、 fanj sezgyau、 duzbinj famhcoih daengj cihsiz, gyauyuz dazyinx ginzcung gag rox henhoh minzcuz doxgiet, bang gyoengq beksingq henzguek miz sim rox soujfap, caemh henhoh henzguek ancienz onjdingh.

Gaenh geij bi daeuj, Bingzsiengz Si gaenj gaeu couqmaenh gij eiqsik Cunghvaz Minzcuz ranz vunz ndeu guh diuz sienqmeh, laebdaeb damqra aen vunqsik moq bujfaz “minzcuz daegsaek + fapceih yenzsu”, hawj fapceih cingsaenz caprag henzguek. Youq mwh “sam nyied sam”, Bingzsiengz Si swhfaz hingzcwng hidungj giethab cienhangh hengzdoengh “cimh henzguek bae bujfaz”, guh fapceih senhconz gyauyuz hawj henzguek ancienz、 minzcuz doxgiet, dwkdoeng henzguek fapceih senhconz “aen goengleix ceiq doeklaeng”， hawj fapceih cienz daengz cien fanh ranz, caemh veh bien gyaeundei minzcuz doxgiet ranz vunz ndeu.

(Moz Ginz/莫群)