Mboengqneix, Cunghgoz Yinz- genz Fazcanj Gihginhvei caeuq Cunghyingj Cizdonz youq Nanzningz Si Yunghningz Gih Minzcuz Cunghyoz Lungzvazsih Yaugih guh aen yizsiz giensoengq “benq ndei haeuj ndawhag”, giensoengq 5 aen sezbei cuengqingj denyingj caeuq 50 ciengz denyingj hawj 5 aen minzcuz hagdangz gih raeuz, caemhcaiq guh aen yizsiz biengjbaiz benq ndei haeuj ndawhag hagdangz guhyiengh.

Aen hagdangz ndaej soengq yawj seiz hwnj mbouj hwnjdangz gag dingh seiz yawj denyingj, lauxsae hagseng mbouj yungh ok hagdangz couh ndaej yawj denyingj. Ciuq gaisau, gij yienghsaeh “benq ndei haeuj ndawhag” dwg aen banhfap youqgaenj Cunghgoz Yinzgenz Fazcanj Gihginhvei、 Cunghyingj Cizdonz caeuq hagdangz cauhmoq fuengsik doxgap、caezcaemh gangj ndei dangzswhcwng, hix dwg haenqrengz haeujcoengh Gvangjsih guh hong denyingj haeuj ndawhag, yaek rengzrwd doinyoengx Gvangjsih cauhmoq son’gyauq dangzswhcwng cungh siujyoz、gyaak hwnqguh vwnzva ndawhag、couqmaenh gij eiqsik Cunghvaz Minzcuz ranz vunz ndeu.

Gvangjsih yawjnaek son’gyauq dangzswhcwng cungh siujyoz dangqmaz, yungh denyingj haeuj ndawhag doengh gij banhfap ndei neix, dazyinx caeuq gikcoi gak dieg hagdangz yawj saedsaeh guh gij yienghsaeh denyingj son’gyauq neiyungz moqsag、hingzsik lai yiengh, doinyoengx denyingj son- gyauq byaij gyae byaij saed. Daegbied dwg geij bi neix doxdaeuj, Gvangjsih baengh “sam nyied sam” yawj denyingj leih bouxminz, aeu denyingj haeuj ndawhag guhbaenz aen neiyungz youqgaenj, doenggvaq denyingj son’gyauq lijsiengj saenqniemh、gwzming conzdungj、sevei cujyi hwzsinh gyacizgvanh doengh gij neix, ndaej daengz gyoengq hagseng haengjgyaez. Mwh bineix guh gij yienghsaeh “gaen denyingj youz Gvangjsih”、“gaen denyingj cimz gijgwn ndei”、denyingj ndei cigsoh haeuj lajmbanj doengh gij neix, dinghmingz denyingj vwnzva fugsaeh aeu ngengq coh “bouxlaux bouxiq bouxndangcanz” doengh gij vunz neix, lai doinyoengx hong denyingj ndei haeuj ndawhag.

Gvangjsih yaek baengh baez saeh neix, lai ra “denyingj+swhcwng”“denyingj+gohbuj” doengh gij vunqsik miz daegsaek neix, lwnh doi gij guhfap gingniemh okyiengh, yungh ndei dazyinx guhyiengh, hawj gyoengq hagseng doenggvaq gingqdaeuz roxyiuj Cunghvaz vwnzmingz gvangqlangh naeklaeg, youq ndaw denyingj roxnyinh gij raeuj lizsij、gij na vwnzva, caeuq gij ronghlwenq bouxvunz.

(Cwnz Ginz)