Swcigih Sanghvudingh lwnh vunzlai rox, daengz 4 nyied 19 hauh, daengx gih doxgaiq aeu gaeuq vuenh moq caeuqfaenh vunzbaez 223.6 fanh, daiqdoengh doxgaiq gaicawx ngaenz- soq 155.1 ik maenz.

“Gou cawx aen binghsiengh caeuq aen densi ndeu, gungh yungh 5300 lai maenz, ndaej miz ca mbouj geijlai 1000 maenz boujdiep.” Cungz- coj Si mehmbwk singq Lij mwh cawx gyahden ndaej yungh gij cwngcwz aeu gaeuq vuenh moq, najriu najhai.

Bineix doxdaeuj, Swcigih Sanghvudingh gyarengz gya’gvangq aen gvaengx haeujcoengh doxgaiq aeu gaeuq vuenh moq, lienzdaemh yaenqfat gij banhfap hengzguh aeu gaeuq vuenh moq aen gvaengx heiqci、gyahden、3C soqmax、dienhdoengh danci doengh gij dieg neix. Ndaej cwngcwz daiqdoengh, Gvangjsih doxgaiq aeu gaeuq vuenh moq cingzcik yienhda. Giz heiqci, heiqci bauqfeiq lawhmoq gungh sinhcingj boujdiep mauhgvaq 2 fanh aen, ragdoengh heiqci siugai ngaenzsoq mauhgvaq 20 ik maenz; heiqci doxvuenh lawhmoq gungh sinhcingj boujdiep mauhgvaq 4.8 fanh aen, ragdoengh heiqci siugai ngaenzsoq mauhgvaq 69 ik maenz. Giz gyahden, aeu gaeuq vuenh moq gungh haedsiu boujdiep 128 fanh faenh, ragdoengh gyahden gaicawx ngaenzsoq mauhgvaq 39 ik maenz. Dienhdoengh danci aeu gaeuq vuenh moq gungh haedsiu mauhgvaq 8 fanh faenh, ragdoengh dienhdoengh danci gaicawx ngaenzsoq mauhgvaq 2.7 ik maenz. 3C soqmax huq cawx moq gungh haedsiu 77.4 fanh faenh, ragdoengh 3C soqmax gaicawx ngaenzsoq mauhgvaq 21 ik maenz. Doxgaiq dajcang ranz cawx moq gungh haedsiu mauhgvaq 3 fanh faenh, ragdoengh doxgaiq dajcang ranz cawx moq gaicawx ngaenzsoq mauhgvaq 1 ik maenz.

Yawhsuenq daih’it geiqdoh, daengx gih heiqci naengzyienz moq soq gailingz doengzbeij lai hwnj 20 baedauq. Gyahden soq gailingz doengzbeij lai hwnj 36% baedauq, doxgaiq doengsaenq yungh soq gailingz doengzbeij lai hwnj 52%.

Yamqlaeng, Swcigih Sangh- vudingh yaek yungh ci moq hwnjhaw、gyahden aeuyungh gyalai doengh gij neix, laebdaeb doinyoengx doxgaiq aeu gaeuq vuenh moq cwngcwz doek dieg. Caemhcaiq, guh doengh gij saeh “haj haeuj”, couhdwg doxgaiq aeu gaeuq vuenh moq haeuj gihgvanh、haeuj giyez、haeuj hagdangz、haeuj segih、haeuj lajmbanj， hawj vunz lai bae sawj ngaenz cawx doxgaiq.

(Denz Hihyaz Lai Yijdanh)