It

Bineix cieng coroek ngoenzhaenx, rumznamz raeujrubrub, vunzlai lij caengz dauqbae guhhong. Gou couh youq mbouj onj lo, caeuq Siz yaucangj iu Cangh Binh, caez bae Mbanjmoeghim ra cunz ranz Lij Mingzfeih. Ciuq gvenqlaeh, seizneix bae cij haengj ndaej raen bohranz mehranz, mboujne gvaq mboengq he vunz dauq okbae dajhong le couh ngaiz byaij ndwi lo.

Lij Mingzfeih dwg hagseng aen ban gou, bohmeh ciengzgeiz bae baihrog dajhong, de caeuq daxgoeng daxbuz youq ndawranz. Lij Mingzfeih daeuj aen hagdangz siujyoz ndawhaw doegsaw, youz daxgoeng haet soengq haemh ciep, ngoenzngoenz yienghneix. Dou daeuj cunz bohmeh de dwg siengj caeuq songde gangjgangj gij cingzgvang Lij Mingzfeih, Lij Mingzfeih aen yozgiz gonq miz di mbwq doegsaw.

Cangh Binh dwg boux gunghcoz duicangj roengz Mbanjmoeghim guh hong “lajmbanj saenqhwng”, caeuq Siz yaucangj doxsug, ndigah Siz yaucangj bae Mbanjmoeghim caemh rag de bae buenx. Ndaejnyi naeuz aen mbanj ranz Cangh Binh haenx gwndaenj caemh haemq hoj, de ginggvaq roengzrengz doegsaw cij ndaej okdaeuj, baenz aen mbanj de boux daih’it gauj ndaej gunghvuyenz. Ngoenznaengz de guhhong gig maedsaed nyinhcaen.

Mbanjmoeghim liz haw mbouj gyae, naengh ci ngamq geij faen cung couh daeuj daengz bakmbanj giz miuhdojdeih de. Dou lau hai ci haeuj mbanj bae mbouj ndei dingz ci, couh ce ci youq giz dieggvangq baihnaj miuhdojdeih.

Aen ranz miuhdojdeih mbouj hung, hoeng guh ndaej gig gyaqciq, gwnz nengz nem vaxliuzliz ndongqliklik ndeiyawj dangqmaz, cungqgyang ranzmiuh daengj miz aen daizyieng suijniz cuk baenz ndeu, gwnz daiz ce aen lozyieng hung gang’vax bakgvangq ndeu, gwnz bak lozyieng cap rim goekyieng deihdwtdwt, gvaengxhenz lozyieng daeuhyieng doek rimrwd. Henzgyawj miuhdojdeih miz goreiz geq haj roek boux vunz got mbouj gvaq ndeu, bangx goek goreiz nem miz baenz gep baenz gep ceijnding iqet luenhlablab, gou cam Cangh Binh naeuz：“Cangh duicangj, gyoengq vunzmbanj nem gij ceijnding haenx dwg maz eiqsei?”

“Gij haenx dwg ceijfouz gouznyienh, boux daeuj gouznyienh diemj yieng baiq le nem mbaw ceijfouz hwnjbae, saenzlingz gofaex caeuq goengdojdeih couh baujyouh de nyienhmuengh guh ndaej baenz.” Cangh Binh gejnaeuz.

“O, laxlawz saenzlingz gofaex caeuq goengdojdeih rox baujyouh gouznyienh ndaej baenz ha, yienghneix raeuz caemh daeuj gouznyienh mbat ndeu, hawj de bauj raeuz ngoenzlaeng guhhong ndaej swnhleih, guh maz baenz maz.” Gou gangjriu naeuz.

“Dwg bw, dingqnyi naeuz youq neix gouznyienh lingz, caensim couh lingz.”

Ngeih

Byaij haeuj Mbanjmoeghim bae, doenghdoengh ranzlaeuz sangsad ronghsag yienh youq dangqnaj, ranzranz bakdou nem doiq hoengzsiegsieg, gwnz dou fouzfuk fouzloeg mbinyegyeg, gij angqyangz gvaq cieng de lij caengz siusanq. Yawjraen gijneix, gou ndawhoz gag ngeix, gij yienghsiengq aen mbanj gaijcauh ndaej mbouj loek ha. Gvaiq mbouj ndaej Siz yaucangj lwnh gou naeuz Cangh Binh ndaej baihgwnz bingzguh “boux ak guh hng lajmbanj saenqhwng” gvaq, yawjdaeuj de caen youq benq dieg neix lae gvaq mbouj noix hanh lo.

Byaij yaep he le, gou daegdaengq daeuq Cangh Binh naeuz：“Daj biujmienh yawj, aen mbanj neix gaenq ndaej duetgungz lo, vihmaz lwgnyez cungj mbouj doeg baenz saw? Dwg mbouj dwg ‘gyaj duet- gungz’ ha?”

Cangh Binh riumbw naeuz：“Lwgnyez doeg mbouj baenz saw cij ndaej gvaiq hong sonsaw lauxsae guh gyaj, mbouj ndaej laih dou banggungz guh gyaj bw.”

Siz yaucangj ciep bak naeuz：“Mbanjmoeghim soqlaiz cungj dwg yienghneix, lwgnyez bouxboux cungj mbouj maij doegsaw, gaxgonq miz haujlai vunz cuhcungh caengz bizyez couh mbouj doeg lo.”

Seizneix, Cangh Binh mbouj guhsing lo, haxbaenh ngamq daeuj gij yiengh saenzheiq de lumj lij miz di cwngzciuganj haenx mbouj rox fwt deuz bae gizlawz lo. De aiq caemh gag rox, “banggungz cinjdeng” “lajmbanj saenqhwng” mbouj dwg gangjnaeuz swenjhemq geij coenz goujhauh caeuq guh di faenzcieng biujmienh couh baenz, aeu caencingq laebdin youq lajmbanj, coiok gij doenghlig swhgeij gag miz haenx okdaeuj guh baenz aen lajmbanj moq bouxboux miz gwn miz daenj、vuenyungz gvaq ndwenngoenz ndeu. Lwgnyez dwg gij maqmuengh daengzcog, lwgnyez mbouj baenz huq, lij gangj gijmaz saenqhwng? Caiq gangj, mboengqgonq banggungz doihguhhong miz coenz ndeu swenj ndaej ceiq gok, “mbouj cinj hawj saek boux lwgnyez vih gungzhoj mbouj ndaej doegsaw!” Danghnaeuz Mbanjmoeghim caen lij miz lwgnyez lienz gouj bi yivu gyauyuz caengz sat couh lizhai hagdangz mbouj doegsaw, mboujdan gou guh lauxsae hojyouq, de Cangh Binh haengjdingh caemh gvaq mbouj baenz, engq youqgaenj dwg miz vunz ngeiz aen mingzdaeuz “boux ak guh hong lajmbanj saenqhwng” de cab raemx lailai.

Gij ranz Mbanjmoeghim Cangh Binh ca mbouj geijlai ranzranz rox gvaq, de daiq dou daeuj daengz byoz baihdoeng, miz aen ranz gaeuq daegbied ndeu, caep cien fongz vax, yienghceij gaeuqgeq, mbouj raen vaih saek di, aiq dwg gingciengz miz vunz coih. Bangxciengz rog bakdou ding baiz ndeu raiz naeuz：Ranzgaeuq Lij Cwngzyenj sienseng, Liengzging Gih Vwnzvuz Baujhoh Danvih. Gawq bonj yanghci geiqnaeuz：Lij Cwngzyenj doekseng youq Cinghcauz Gvanghsi cibgouj bi, seiz lij iq ndawranz miz gwn, gyaez doegsaw, bae Yizbwnj liuzyoz gvaq, doeklaeng camgya Sinhhai Gwzming……

Ranz Lij Mingzfeih couh youq henz ranzgaeuq Lij Cwngzyenj sienseng, aen ranzlaeuz sam caengz ndeu, baihgwnz lij gya cw caengz vaxiengfaex he guh gekhwngq. Caeuq aen ranzgaeuq bingzbaiz doxbeij ronghsien. Bakdou ranz Lij Mingzfeih fouq doiq ndingfwg：“Dem ding dem caiz dem fouqgviq, ndaej fuk ndaej souh ndaej bingzan”, yamq haeuj bakdou, souj sei bangxciengz ndaw ding yienh’ok najda：“Rumzcin coi mbwn raeuj, fukheiq daeuj daengz ranz, ndaej youq ndei gwn van, vuengh lwglan fanh daih.”

Yawj le gij seidoiq ranz Lij Mingzfeih, daihgaiq dwg aenvih guh lauxsae ba, gou miz di minjganj：Gij seidoiq neix, caenh conh ok ranz vunz neix miz cungj gouznyienh ndaej miz gwn miz daenj ndaej vuengh ding vuengh caiz, cix mbouj raen gouznyienh lwgnyez doeg ndaej baenz saw. Nanzdauh ranz neix mbouj muengh lwgnyez baenz boux miz dungxcaiz?

Ndaw ranz, boux lwgnyezsai saek cib’it ngeih bi ndeu naengh youq ndaw ranz gaem aen soujgih ngaem gyaeuj youq gokdaiz loengh youzheiq guhcaemz, lwgfwngzmeh riengjretret naenx bae naenx dauq, gag angqfwngfwng. Gou sijsaeq yawj daegde, dwg Lij Mingzfeih.

“Lij Mingzfeih, boh mwngz youq ranz lwi?” Gou heuh de.

“A?” Lij Mingzfeih ngiengx gyaeuj hwnjdaeuj raen gou, doeksaet yat, de aiq ngeix mbouj daengz mwh cuengqgyaj dou daeuj ranz de. De vuengmuengz yo aen soujgih haeuj ndaw daehvaq bae, naj nding dwk mbajdwddwd naeuz:“Mwngz…… boh gou youq…… youq baihndaw yawj densi.” De nyeux naj coh ndaw rug heuh：“Boh ha, lauxsae daeuj ra mwngz!”

Boh Lij Mingzfeih daj ndaw rug okdaeuj, ra daengq hawj dou naengh, raix raemx hawj dou gwn, yiedcingz dangqmaz, Lij Mingzfeih swngzgei“deuzndoj” okrog bae.

Sam

Raen Lij Mingzfeih laeq hagseng yienghneix, gou gyaeuj couh dot lo. Aen yozgiz gonq duenh satbyai, de hwnjdangz ciengzseiz boemz daiz ninz, mbouj haengj guh cozyez, cingzcik doek roengzdaeuj sadsad. Vihneix, gou mbouj rox sai geijlai uk bae caeuq de damzvah geijlai baez, de cungj dangq raemx gvaq laeng bit, mbouj dawz haeujrwz.

Miz dangz goq ndeu gou buci hagseng guh cozyez, mwh roengzdangz sou cozyez, Lij Mingzfeih youh mbouj gyau hwnjdaeuj. Gou naeuz de：“Lij Mingzfeih, mwngz vihmaz mbouj gyau cozyez?”

“Mbouj rox sij!” De yau gyaeuj ywdywd.

“Mbouj rox sij hix mbouj raen mwngz cam?”

Lij Mingzfeih lwgda yaepbwdbwd, de naeuz：“Gou raen baiqninz lai, mbouj siengj sij lo.”

“Yienghneix mbouj baenz bw.” Gou vahnaek cingzlaeg naeuz, “mwngz lij oiq, cingq dwg mwh ceiq ndei hag vwnzva cihsiz, danghnaeuz seizneix mbouj hag ndei, daengzcog byaijok sevei le，ienqhoij couh guh mbouj gib lo.”

“Goeng gou boh gou mbouj rox geijlai cih saw mbouj ciuqyiengh guh gwn? Mbanj dou boux doegsaw cij rox ienqhoij ne.” Lij Mingzfeih gangj ndaej sing’yaem gig saeq, hoeng cix lumj diuzdongh soem nei coeg daengz sim gou……

Lij Mingzfeih gij cingzgvang neix, gvaqlaeng gou lwnh daxgoeng de nyi, daxgoeng de danqheiq naeuz：“Bohmeh de mbouj youq ranz, gou naeuz mbouj ndaej de ha.”

Lij Mingzfeih mbwq hag lo, naeuz de mbouj dingq, gou ngeix ndaej uk yaek mboek cungj mbouj rox baenzlawz guh.

Seiq

Boh Lij Mingzfeih dingq gou geqlwnh lwg de youq hagdangz biujyienh baenzlawz yiengh le, najbyak baez nyaeuq, bi’gyaeuj naeuz：“Dou hix mbouj miz banhfap ha, ep meuz gwn meiq mbouj baenz bw.”

Siz yaucangj naeuz：“Lwgnyez mbwq hag, gangjmingz bouxlaux ndaw ranz caeuq hagdangz guenj son boiqhab caengz guh ndaej daengzvih. Mingzfeih lwg neix gvai, danghnaeuz de haengj hag, cingzcik itdingh gig ndei.”

(1)