Vih haeujlaeg doicaenh hong cauhlaeb minzcuz doxgiet baenaj, dungjcouz guh ndei hong cunghgyau lingjyiz ancienz onjdingh， 4 nyied 7 hauh daengz 9 hauh, Gveigangj Si Gangjnanz Gih cujdiuyenz daengz diemj guhyiengh minzcuz doxgiet baenaj caeuq dieg cunghgyau hozdung diuyenz, giengzdiuh aeu genhciz aeu couqmaenh gij eiqsik Cunghvaz Minz- cuz ranz vunz ndeu guh diuz sienq- meh, cuknet giekdaej minzcuz doxgiet caeuq cunghgyau huzndei, cukmaenh ancienz hwngfat fuengzsienq.

Cujdiuyenz daengz Sinhdangz Cin Sanhbenh Cunh Mbanjcaujbingz、 Gyanghnanz Gaihdau Lenzswz Segih、 Gih Yinzminz Fazyen、 Gangjnanz Daih’it Siujyoz、 Vajdangz Cin Mbanjyanghgyangh daengj dieg, doenggvaq yienhciengz yawj、 dingq gangjgej daengj fuengsik, engq ndei liujgaij gij cingzyauq、 diemjrongh、 vwndiz gij hong cauhlaeb minzcuz doxgiet baenaj Gangjnanz Gih, caemhcaiq daezok cijdauj yigen.

Riengzlaeng, cujdiuyenz bae Giuzhih Cin Mbanjyungjvuz Cangzhingh Denhcujdangz、 Bazdangz Gaihdau Mbanjsanhbanj Sanhbanj Denhcujdangz、 Nanzsanh Caeh daengj dieg cunghgyau hozdung saeddeih genjcaz gij cingzgvang ancienz guenjleix、 gveihfanva gensez caeuq cingzgvang guh hozdung cunghgyau, caemhcaiq caeuq cunghgyaugai boux daibyauj haeujlaeg gyauhliuz. Cujdiuyenz giengzdiuh, aeu dungjcouz ca ndei ancienz caeuq hwngfat cunghgyau lingjyiz, lozsiz cawjdaej cwzyin, gyagiengz baizcaz cingjceih huxndumj, laebndei gihci lenzfuengz lenzgung, giengiet fuengzre vaqgej fungyiemj huxndumj; aeu daj gyaeuj daengz rieng genhciz aen fuengyiengq cunghgyau guek raeuz miz yiengh Cungguek, dazyinx cunghgyaugai cujdung yungzhaeuj sevei cujyi haedsim gyacizgvanh saedguh, cietsaed henhoh cunghgyau lingjyiz huzndei onjdingh.

(Veih Gujlungz/翚古龙)