Ngoenzciet Cungguek ciuhgeq cienz roengzdaeuj haenx gig lai, ndwencieng、cingmingz、bet nyied cibngux、gouj nyied cogouj…… Aen’aen ciet cungj miz eiqsei, cigndaej geiqniemh, aen ciet caeuq aen ciet feihdauh mbouj doxdoengz. Mwh daxmeh lij youq, aen ciet gou ceiq maqmuengh ceiq gyaezmaij haenx, cawzliux ndwencieng, couh dwg bet nyied cibngux.

Song aen ciet neix, ceiq yawjnaek doxcomz, daengx ranz vunz caez youq itheij, nauhyied youh raeujrub, daihgya cungj muengh ngoenzciet ndei haenx daengz vaiq di, dou caemh dwg baenzneix simmuengh.

Daxmeh youq ndwencieng nyaengq hong caeuq bet nyied cibngux mbouj doengz saek di. Ndwencieng, yaek caepcawq haujlai hong, daj ndwenlab ngeihsam gaj mou hainduj, daxmeh couh daj goek daengz byai buenzsuenq gij hong saeh ndwencieng, de mbouj miz sim bae ngvanh gij saeh nyapnyuk de lo, simhai najyungz gvaq ngoenzciet. Lumjbaenz, doxcomz gwn haeux, ndaw mbanj bouxgeq lwgnyez, vuenvuen heijheij, dox hohfuk bimoq gyaeundei roxnaeuz gangj gij goj gij saeh mwh youq ndaw singz guhhong, yawj bouxlawz najhai vuenyungz、bouxlawz miz goj geizheih hawj vunz sim diuq. Hoeng ngoenz bet nyied cibngux, daxmeh yaek caepcawq doxgaiq cix noix haujlai, de caeux couh bwh ndei duz gaeq ndaw loengz ciengx youq ranzfwnz, duz gaeq haenx mbouj rox seizlawz couh baenz byaek feih gwnz daizngaiz, caiq bwh di nohmou、lwgmanh heu、laeujoemq. Cawx nyiedbingj dwg saeh hung, daxmeh gyau gij hong neix hawj daeggo, dou geij beixnuengx ngah gwn lai lo, senqsi muengh aeu gij laex neix, bwh ndei saek di gijgwn, aen ciet neix cix suenq caepcawq baenz lo.

Gvaqlaeng, couh caj aen ronghndwen swng hwnj gwnz bya, loh okdaeuj, liuxcix yupyup yepyep ciuq ok saek di rongh, ciuq doh aen mbanj, rongh daengz gwnz dingj ranz、gwnz ciengz dieg namh caeuq doenghnaz deng rumz bongj haenx. Seizneix, dou maqmuengh gaej doek fwn, doek fwn le mbwn couh mongmoek, muengh mbouj raen dahsien Cangzngoz hawj vunz doeknaiq, hix vaih gij saeh ndei dou—— Baenzneix, vunz okdaeuj ngonzyawj ronghndwen guhcaemz haengjdingh noix lo, hix mbouj ndaej nauhyied angqyangz dem lo. Gwn caeuz liux, daengz seiz fat nyiedbingj lo, daxmeh cij daj ndaw canghaeux iq mbon ok doxgaiq, gij doxgaiq haenx miz ceij suek baenz caengz baenz luep, gwnz ceij youzyeb ndongqndik, hoeng yawj mbouj raen ndawde dwg gijmaz, baenzneix hix cai mbouj ok dwg bingj gijmaz, dwg vujyinz、caciu, roxnaeuz dwg gijwnq…… Dangyienz, doengh gijneix mbouj youqgaenj, gij youqgaenj de dwg nyiedbingj liz dou yied daeuj yied gyawj, rangfwtfwt, dou gig noix baenzneix sim’angq, itdingh aeu insik aeu dawz haeujsim.

Gijneix dwg gij saeh mwh gou ndaej cibngeih sam bi, seizneix dauqngeix geiq mbouj ndaej geijlai dem lo. Ndaej geiq, gvaq ciet angq, cungj dwg daj aen canghaeux iq hainduj. Ndaw canghaeux iq miz gij doxgaiq daxmeh yorom caeuq gij feihdauh ngoenzciet. Doenghbaez aen cang iq neix miz aensuj daep maenh, yaekseiz youq ndaw fwngz daxmeh, dwg gizdieg rom doxgaiq ndeu boux danggya aeu guenj maenh, baenzneix youq lajmbanj seiz gungzhoj cungj baenz gvenq lo, hix dwg daxboh gyau gienz hawj daxmeh guenj. Gangj daengz vah lai, doengh bi haenx ndaw ranz haeuxgwn bonjlaiz couh noix, baenz bi soucingz dan ndaej bet gouj bak gaen, yaek ciengx caet bet aen bak, hoj guh lai lo, daxmeh itdingh aeu suenq daengz faen leiz, baenzneix yienznaeuz ndwenngoenz hoj haenq hoeng lij mbouj deng iek. Daxmeh cuengq nyiedbingj roengz ndaw canghaeux bae daep hwnjdaeuj, hix dwg re dou bae caeg gwn, bauj ndaej seiz youqgaenj bouxboux cungj sou daengz saek yiengh song yiengh huqlaex, couhcinj aen bingj naeng mbang hamz noix. Mwh daxmeh hai dou cang, heiq haeuxyangz caeuq heiqrang nyiedbingj caez sanq okdaeuj, hawj gou roxnyinh daengz dungxiek ngaungau, baenz aen seiznyez cungj maij gij heiqrang neix.

Daxmeh ginglig gvaq, de gag naemj bet nyied cibngux dwg ciet gijmaz, caeuq ciuhgeq naemj doxdoengz, gou lwnh de nyi hot sei “Ronghndwen ciuq bangx congz, lumj mwi conz gwnzdeih. Ngiengx gyaeuj muengh ndwen ndeiq, ngaem gyaeuj ngeix mbanjranz” miz maz hamzeiq, lij genjdanh cekgej, de vanzlij bi gyaeuj ngwdngwd. Danghnaeuz gou rox doengh gijneix, gou couh mbouj dwg gou lo, gou dwg boux vunz laet ha, daxmeh naeuz, hoeng de mbouj roxnyinh najmong saek di. Neix dwg gij goq siujyoz it nienzgaep, daxmeh lij caengz biengj saek yieb de couh ma ranz mbouj doegsaw lo, riengz goengda youq ranz ciengx yiengz caeuq gip byaek mou. Baenzneix hix guhcingq gij vah daxgoeng, daxmeh mbouj rox gijmaz saw. Hoeng daxmeh nyinhnaeuz, dahlwg haq bae gizgyae, daeglwg youq ndaw singz dajgoeng, ngoenzciet daihgya daj diegrog ma daengz henzndang, daengx ranz vunz nauhnauh yiedyied doxcomz guhdoih ceiq vuenyungz, gizyawz gijmaz cungj mbouj youqgaenj lo.

Vihneix, gij vehmienh eiqsei gyaelaeg、yawj gingj miz cingz ndaw sei, daxmeh dangyienz mbouj roxyiuj. De guh ndaej baenz gijmaz ne? Daxmeh gou bak naek vah noix, caux gya ciengx lwg ciuhvunz dwgrengz.

Aen sigij gonq caet betcib nienzdaih, dou lij youq Duh’anh Lungzyaj ndaw mbanj bya doekgungx gyae’gyang ndeu, diuz roen iqetet ngutngut ngeujngeuj, gyanghaemh aeu daengmeizyouz ciuq rongh, mbouj miz dienh, mbouj miz densi, hix mbouj rox baihrog miz gijmaz saeh; raemxgwn dan baengh aen mboq gwnz byonghbya loh youq rog de, raemxmboq hix mbouj gaeuq yungh. Diuz roen doeng coh rog bya gaebgebgeb, danghnaeuz mbouj dwg yaek bae ganjhaw, cungj yaemhywx buenq ngoenz mbouj siengj okbae. Cij miz gyu mbouj ndaej gwn geijlai ngoenz、roxnaeuz aen daengmeizyouz yaek aeu gya youz, hix aiq dwg aen genj saeg buh cij lw buenq gep, ndaw ranz gaenj aeu gij doxgaiq ngoenznaengz yungh haenx, miz lijyouz cuk le, cij gamj ok rog bya bae baez ndeu. Daxmeh lij coz oiq couh haq daeuj guh yah, couh dwg baenzneix souhhaemz gwnhoj, aenndang byombyet mbangnyieg dawz hwnj diuzrap guenj ranz ciengx gya, baudaengz gij gwn gij yungh, caeuq gij saeh saepsaep soiqsoiq, gij ndwenngoenz haemzhoj dwgrengz de.

Boux vunz souh hoj ndeu, danghnaeuz sim naiq le, couh mbouj miz simheiq bae dingj gvaq dwgrengz.

Souhhoj, daxmeh sengcingz dingj ndaej naihnanz. Gij ndwenngoenz haemzhoj haenx, daxmeh cungj haeb heuj buekguh, doeklaeng gou gvaq ndaej lai ndei le cij gaij bae haujlai.

Haemhneix, gou siengjniemh ranzmbanj siengsim raixcaix, gou youh ngeix daengz daxmeh guh hong nyaengqnyat, ngeix daengz de youq ndaw doenghnaz ranzmbanj baebae dauqdauq, hong guh mbouj rox liux.

Loq raen daxmeh dwg caen, hix dwg siengjmuengh, de lumjnaeuz con gvaq diuz deihgoengq seizhoengq, ma daengz aen ranz iq, henz canghaeux, lij dwg dawz ok fag yaekseiz haenx, siujsim riri, lij dwg gij sing yiengjcatcat. Seizneix de gaenq mbouj gangj vah lo, hix mbouj dongx vunz, dinghdingh haeuj ndaw dou daeuj, youh dinghdingh byaij ok rog dou bae, mbouj ndwet saek coenz.

Loq singj lo, daxmeh cienqndang bae lo, doengh gij ndwenngoenz saekseiz doxcomz nauhyied angqyangz hix dwg gij saeh doenghbaez. Geiq ndaej saek di saek duenh, dwg gij baengzgawq lwnhnaeuz haemzhoj ciengxgwq dwg gij saeh caen, doengh gij saeh haenx geiq haeuj ndaw uk ndaw ngviz gou, hawj gou mbouj ndaej lumz bae, mbouj ndaej ndoj deuz.

Baenzneix, youq aen ngoenzciet yienghneix, gou siengjniemh daxmeh raixcaix, doengh boux lumj gou ndaej nyiedbingj haenx, hix dwg baenzneix siengjniemh daxmeh gyoengqde ba.

Sojmiz daxmeh, hawj vunz miz lijyouz cukgaeuq bae ngeix gij ndwenngoenz nanzlumz haenx mbouj liux mbouj cod.