Gaenh geij ngoenz neix, Bwzliuz Si aeu couqmaenh gij eiqsik Cunghvaz Minzcuz ranz vunz ndeu guh diuz sienqmeh, youq Sinhhih Cin Yihihgungh、 Dalij Cin Mbanjluzhou guh hozdung minzcuz vwnzva “Gvangjsih Sam Nyied Sam”. Doenggvaq minzsug baijok、 feihyiz daejniemh、 vwnzva gyaulouz daengj hingzsik, baijok cwngzgoj minzcuz doxgiet baenaj, doidoengh Cunghvaz conzdungj vwnzva maenhndei cienzciep hwngfat.

Youq Dalij Cin Mbanjluzhou, gak cuz vunzmbanj gapbaenz gij doih foux lungz foux sae hwnj gai cunzyouz, supyinx gak cuz ginzcung dingzyouq yawj. Hozdung yienhciengz ndalaeb daegsaek giz langhgai doxgaiq reihnaz, comz doigawj cijvaiz、 haeux ndei daengj doxgaiq bonjdieg, vih canjnieb lajmbanj saenqhwng haigvangq roenloh. Linghvaih, bouxcoz ndangdog gap baengzyoux、 yienhciengz guhmoiz daengj hozdung, coicaenh gak cuz bouxcoz gyaulouz baedauq, vih ngoenzciet demgya gij saek unqcingz.

Youq Sinhhih Cin Yihihgungh ciet vwnzva cix aeu cien lungz cien sae cunzyouz guh diemjrongh, daj Bwzliuz、Cwnzhih、 Yilinz、 Yungzyen daengj dieg gak cin gak mbanj daeuj haenx daenj buhvaq gyaeundei caemh comz giz ndeu, gij sing gyonglaz caeuq singriu yiengj doh daengx dieg. Yihihgungh lij baengh ranz ciuhgeq bak bi, aeu yizsiz muenghfuk、 foux conzdungj cienzndenq cuknyienh gyaeundei, supyinx hekyouz “dajgaj”.

Baihlaeng guh ciet ndat lumj feiz, dwg gij saedhengz sengdoengh gyalaeg cauhlaeb minzcuz doxgiet baenaj、 doidoengh hong senhgyau couqmaenh gij eiqsik Cunghvaz Minzcuz ranz vunz ndeu Bwzliuz Si. Doenggvaq aen bingzdaiz guh ciet “sam nyied sam”, gak cuz ginzcung youq lienzhab foux lungz foux sae、 caemh hoh dinfwngz feihyiz、 doengz doi canjnieb daegsaek ndawde gyalaeg vwnzva nyinhdoengz caeuq cingzgamj nyinhdoengz, cauxbaenz aen gwzgiz moq minzcuz doxgiet “vwnzva caemh cienz、 canjnieb caemh hwng、 ranzmbanj caemh hwnq”.

(Vangz Yicin/黄玉镇)