Angq gvaq cietgo sam nyied sam,

Duzbya roengz dan lungz ok haij;

Sai mbwk laux coz bouxboux maij,

Vunz lai lumj haij roemx hawfwen.

Cingmingz gvaq le daengz goekhawx,

Biengzdeih gizlawz roeg cungj haen(heuh);

Gou iu gak deih beixnuengx caen,

Vunzlai doxgaen daeuj Mbanjcuengh.

Seizcin sam nyied bak va hai,

Singz mbanj dap daiz guh fwen daeuj;

Gingq cenj laeuj gyaeu Bahmaj laeuj,

Eu fwen hwnjdaeuj coux bouxhek.

Sam nyied rumz raeuj doek fwnmoenq,

Roegfek ndaw ndoeng sing dekswenz;

Sau mbauq doxiu bae hawfwen,

Lumj rwi haeuj suen ra va nyaengq.

Bibi cungj miz sam nyied sam，

Beixnuengx sim van daeuj guhdoih；

Dawz gyong dawz nyenz okdaeuj loih，

Beijfwen baenz roix gvaq byai bya.

Mbanjcuengh dieg neix fungcingz noengz，

Mbwn miz duzdoengz venj gwnz houj(fwj);

Roq nyenz eu fwen goepgvej foux,

Yienghyiengh gangj daeuj caen maez vunz.

Gou daeuj eu fwen naeuz hawj mwngz,

Dieg gyaeu lajmbwn dwg Guengjsae;

Byaraemx Gveilinz bouxboux maez,

Gaiq dieg Bazgvei fwen lai raeuh.

Seizcin mbwn raeuj yawj Mbanjcuengh,

Gak cuz beixnuengx dawz fwen ciengq;

Lij aeu bak boq mbawfaex yiengj,

Cungqvunz doxciengj beij goengfou.

Moegmienz va hai lumj feiz hoengh(hoengz),

Lwglan Mbanjcuengh gyaez ciengq go;

Angq ciengq hungmbwk seizdaih moq,

Angq ciengq swnghhoz gyaeu youh lengj.

Beijfwen Guengjsae dwg binjbaiz,

Ngoenzneix fwenhaij ok sing gok;

Seiq fueng canghfwen daeuj doxdop,

Beijfwen sing gok vunz angqyangz.

Mwngz yawj lwgsau caeuq lwgmbauq,

Gyoengqde baedauq eu fwen doiq;

Beijfwen ok bak coenzcoenz oiq,

Mwngz han gou doiq cungj mbouj dingz.

Haeuxnaengj haj saek caeuq gyaeq hoengz,

Sawj vunz myaiz roengz sawj vunz angq;

Lij miz aennyenz yiengj nungqnangq,

Hawj vunz yied gangj yied ndeimaez.

Cenj laeuj rimrim gingz hwnjdaeuj,

Beixnuengx baengzyoux naj cungj hai;

Gwn cenj laeuj ndei caen angq lai,

Bae mbanj bae gai rengzrwdrwd.

Gak dieg eu fwen angqvauvau,

Miz aen gauhyau ceiq okmingz;

Saehcingz lij cienz bae daengz Ging,

Gizgiz riuzmingz vunz danqhaenh.

Guengjsae Yendai Cizyezyen,

Fanh vunz eu fwen daengx singz yiengj;

Saeseng bouxboux cungj rox ciengq,

Hawj vunz yied siengj yied mizyinx.

Diegcuengh valeux bibi hai,

Lajmbanj gwnzgai gizgiz hoengh;

Beijfwen cienz bae cienfanh doengh,

Cungqvunz baenz gyoengq daeuj nauhciengz.

Lajmbwn faexrungz raemh ceiq lai,

Vunz ceiq bak gvai dwg Guengjsae;

Eu fwen hwnjdaeuj cungqvunz maez,

Gizgyawj gizgyae cungj riuz doh.

Guengjsae dieg neix canghfwen lai,

Mehmbwk bouxsai maij geqleq(guhcaemz);

Yizcouh miz boux Liuz Sanhcej,

Dunghlanz dieg de ok Bazgoh.

Duzlungz cix gyaez raemx daihhaij,

Duzfungh cix maij ndoeng faexvak;

Gyoengq vunz Guengjsae caen cix ak,

Bouxboux hai bak fwen baenz baiz.

Duzcwz duzyiengz maij bobaq,

Duzbya gyaez dah gyaez raemxsaw;

Lwgminz Mbanjcuengh gyaez yienghlawz,

Bouxboux gyaez dawz beijfwen ciengq.

Guengjsae “ciengmoq hoih daih’it”,

Couh lumj ngoenz ndit miz byajraez;

Doidoengh ginghci guh hwnjbae,

Bouxboux simmaez caez haenqguh.

Duzfungh gyaez ndoeng lungz gyaez raemx,

Duzrwi gyaez caemh(douh) va ndoengfaex;

“Ciengmoq daihhoih” neiyungz ndei,

Gou sim vuenheij daeuj senhconz.

Ciengmoq boq hauh yiengj daengz mbwn,

Baihlaj baihgwnz cungj mbaq naek;

Ganbu enj ai youh enj aek,

Vid gen sim naek guh dahraix.

Gaijfang swhsiengj ceiq gvanhgen,

Cauhmoq gouzbienq sim doxrangh(lienz);

Yiengq haij guh ak ndei mbouj gangj,

Hailangh hwngfat cij baenz gwn.

Daengx gih vunzlai cungj yaek geiq,

Haenqrengz guh saeh mbouj loengh gyaj;

Yaek aeu niebcik(cingzcik) daeuj gangjvah,

Yinzminz bingzgyaq cix ceiq bengz.

Lwglan Mbanjcuengh guh hwnjdaeuj,

Mbouj yungh luenh gaeuj(yawj) luenh gangjvah;

Leixcing swhlu bongh baenaj,

Gwnzgwnz lajlaj haenqrengz buek.

Cijaeu swhsiengj mbouj doeklaeng,

Couh raen aendaeng rongh baihnaj;

Haenqguh goengrengz cix lai maj,

Ngoenzlaeng siusaj ndaej fungsou.

Gyoebcomz goengrengz guh saehnieb,

Haisim doengz dieb hwnj loh gvangq;

Vunzlai yungh rengz byaij cenzfangh(baihnaj),

Gyavaiq fazcanj engq hozhaiz.

Biengz raeuz ciengq yiengj cujsenzliz，

Haenqrengz bae sij faenzcieng moq;

Dangj raeuz veh ok mbaw lamzdoz,

Hai din caez yo(hwnj) bongh doxhwnj.

Baenz yamq baenz yamq miz rizdin,

Gak cuz yinzminz bouxboux gaenx;

Haeb heuj haeb faenz guh hong haenq,

Namhhenj cienjbaenq ok gimngaenz.

Seizndei mbwn deih hix bang rengz,

Sawj raeuz baenz bengz hengz ndaej gwn;

Ngoenzneix singz mbanj gizgiz mwn,

Mwhmwh miz cwn(cin) va hai hoengh.

“Ciengmoq daihhoih” neiyungz lai,

Lumj boux ndaej hai loengxbakbauj;

Vah dinj cix gangj mbouj liux nauq,

Ngoenzneix sien gauj(guh) baenznyaenx gonq.

Loqsiengj Cungguek ndei lai raeuh,

Couhlumj sigloux sim doxdoengz;

Yiengq ndei moegbiu bae yungh goeng,

Dingh ndaej raen mboeng youq baihnaj.

Fwnz lai feiz remj hwnjfufu,

Vunzlai cauh ruz ruz bongh vaiq;

Minzcuz doxgiet ligliengh daih,

Sawj raeuz gaiqgaiq guh ndaej baenz.

Henzdah ndaem faex yungzheih heu,

Gwnz rin gyaq giuz cien nienz onj;

Beixnuengx doxgyaez mbouj deng sonj,

Ciengxlwenx doxgyonj lumj ranz ndeu.

Minzcuz doxgiet diuz sim ndeu,

Gyoengqraeuz doxniuj baenz diuzcag;

Vunzlai couh dwg goengrengz ak,

Couhcinj bya lak hix mbouj lau.

Cunghvaz Minzcuz gunghdoengzdaej,

Raeuz caez vuenheij byaij doxriengz;

Sam nyied eu fwen sim van diengz(dangz),

Huzndei bae riengz Dangjcunghyangh.

Beijfwen ciengq liux geij cib bi,

Neiyungz vuenh di sim lai oq;

Ngoenzneix ganj haw ciengq fwen moq,

Bouxboux gyaez gyoh angq dangqmaz.

“Ciengmoq daihhoih” lumj rumzcin,

Lajmbanj ndaw singz cungj ci doh;

Mbanjcuengh yied ngoenz yied bienq moq,

Raeuz caez goenghoh ngoenz moqnaj.

Ngoenzngoenz cungj youq ndaw fwen gvaq,

Mbanj gwnz mbanj laj vunz angqyangz;

Caezsim doengzrengz guh hong byang(haenq),

Doengz hwnj mbaek sang engq vaiqvued.

Faex sang cien cik mbouj liz namh,

Laeuz sang baenz fanh mbouj liz giek;

Baengh miz Dangj raeuz daeuj onj dieg,

Raeuz dungx mbouj iek daenj mbouj you.

“Ciengmoq daihhoih” veh lamzdoz,

Moqnaj swnghhoz engq vaiqvued;

Va hai va hoengz baengh fwn rwed,

Raeuz hai din buet riengz Dangj byaij.

Raemxdah Yunghgyangh sawyauyau,

Dangj raeuz son’gyauq geiq simdaeuz;

Doxdax haenqrengz buetyouyou,

Bouxboux ceng’aeu cingzcik daih.

Gwnzbya roq gyong yiengj lumj byaj,

Henzdah danz gimz hongz(yiengj) lumj nyenz;

Caez daeuj Mbanjcuengh guh hek bengz,

Roen lingq roen rengz(bingz) hix mbouj lau.

Ndaem va couh ndaem va moegmienz,

Danz gimz couh danz gimz sing gok;

Ciengq go bouxboux hai sing ok,

Lumj raemx roengz sok bae mbouj duenh.

Raemxhaij cungj cix daek mbouj sat,

Fwen lumj raemx dat lae mbouj caenh;

Minzcuz vwnzva vunz ceiq haenh,

Cien vunz ciengq haenq fanh vunz riengz.

Beijfwen ciengq daeuj bouxboux maij,

Ciengq dwk fwenhaij langh hai va;

Cietgo sam nyied bibi gvaq,

Bimoq caiq ma dap godaiz.