▶3 nyied 22 hauh, Lozcwngz Mulaujcuz Swciyen Navungh Yangh guh hozdung angq ciengq “sam nyied sam” gimqdoeg senhconz. Yienhciengz vunz lai vunz daih, nauhyied dangqmaz. Gak cuz ginzcung daenj buhndei, ciengq go diuq foux, yungh doiq fwen、 minzsug hozdung、 gimqdoeg lwnhgangj daengj fuengsik senhconz gij cihsiz gimqdoeg. Baez hozdung neix gaenh 1500 lai boux ginzcung camgya, dangdieg baengh “sam nyied sam”hawj minzsug vwnzva caeuq gimqdoeg senhconz giethab hwnjdaeuj, hawj ginzcung gawq gamjsouh le gij yinxdaeuz conzdungj vwnzva, hix gyagiengz le gij eiqsik gimqdoeg gyoengqde. (Luz Mungz/卢萌)

◀3 nyied 22 hauh， Mungzsanh Yen youq Cangzsougwz Gvangjcangz guh doxdax “mbanjmbanj miz fwen · cincin miz sing”Mungzsanh Cin senjbazsai， 21 aen doih gungh 35 boux ginzcung daj gak mbanj gak segih daeuj camgya doxdax，hanghmoeg miz eu fwen、gvaibanj、digcuk daengj， gyoengqvunz ciengq go diuq foux haenh aen Dangj danq ndwenngoenz gyaeundei, hix baijok gij cingsaenz cizgiz vunz Gvangjsih caeuq gij yinxdaeuz fwen Gvangjsih.(Vuz Gvangjswngh/吴广生)

3 nyied 22 hauh, Nanzningz Si Liengzging Gih Ciyenj Segih lienzhab lai aen danhvei、 cujciz caeuq giyez youq Yinhgunghbingz Hawciengz guh “sam nyied sam” cawjdaez hozdung. Yienhciengz nauhyied dangqmaz, ndaw segih Bouxgun、 Bouxcuengh、 Myauzcuz daengj 11 aen minzcuz ginzcung comz youq giz ndeu, eu fwen diuq foux、 guh gijgwn ndei、 daejniemh minzsug hozdung, gizgiz cungj dwg gij heiqfaenh angqyangz, yienh’ok fuk dozveh gyaeundei minzcuz doxgiet. （Veiz Yizsiu/韦奕秀）

▲3 nyied 18 hauh, Cungzcoj Si Gyanghcouh Gih Cojcouh Cin guh hozdung conzdungj minzsug, yienhciengz bouxyawj naengh rim caez, ciengj bauqva、 dwkdom、 feihyiz yienjok daengj hozdung lienzciep mboujduenh, gyoengq vunzyawj bekfwngz goksatsat, gak cuz ginzcung angqyangz comz youq giz ndeu angqcoux“sam nyied sam Gvangjsih”， coicaenh gak minzcuz samgyau. (Luz Vwnzfeih/卢文斐）

Vahbouxbien：Sam Nyied Sam ngoenzciet bi gvaq baez Gvangjsih yaek daeuj daengz， gyoengqvunz Mbanjcuengh yungh fwen cienz cingz yungh foux gyau youx， minzsug hozdung lai cungj lai yiengh， hawj raeuz caemhdoih gamjsouh heiqfaenh naekna ngoenzciet， daejniemh minzcuz vwnzva daegbied，hawj “sam nyied sam” doxciep mwngz caeuq gou， comzgiet gij rengz minzcuz doxgiet.