Daj Vangz lauxsae laeng gou bae fuzbinz, de couh bienqbaenz boux cawjgiek gij goj vunz lwnh haenx. Swnh baez cwnghvwnz hozdung neix, gou gipmuengz ndek vanj dawh, loqloq genbanz, gou aeu daeuj gangjgangj gij gojgaeq de……

Vangz lauxsae dwg bouxgvan gou, dauqngeix 2018 nienz seizcin, miz ngoenz ndeu, de sawqmwh dwk denva dauq, naeuz caeuq gou siengliengz aen saeh yiemzsuk ndeu. De “nge nge” song sing, denva mbiengj haenx cienz daeuj:“Yaucangj gaenq bauqmingz gou hwnjbae lo, gou gig vaiq couh aeu bae ndaw mbanj fuzbinz！” Neix baenzlawz dwg siengliengz ma, dwg “naeuznyi”！Gou laihnaeuz de lauxsaed lai, vah cungj mbouj lai gangj saek coenz, guh hong fuzbinz cix dwg caeuq vunz gyauhliuz ne！ De cix soengswt naeuz:“Mbouj youqgaenj, gou dwg hag yinzci guenjleix ciennieb！ Saenq gou！” Cuengq roengz denva, gou danq gaemz heiq ndeu, doiq dahlwg naeuz:“Daxboh mwngz vih bae fuzbinz, ciennieb cungj gaij baenz gyaphob lo！” Dahlwg cix cam:“Gou hwnj cuhcungh, daxboh mbouj daiq gou bae hagdangz de doeg ma？” “Raeuz aeu daemxcengj hong daxboh！Gij saeh hwnj cuhcungh raeuz ndaej caiq siengliengz ma！”

De bae fuzbinz le, ranz dou gig vaiq couh bienqbaenz aen “hawciengz” doxgaiq reihnaz fuzbinz lo. Cijaeu de ma ranz, youq gwnz gyaq mozdozceh haenx couh venj rim gij- gwn, denbinghsiengh ndaw ranz oet rimbywdbywd:Yiengzcoeng、 lwgmanh、bwzyanghgoj、 makyungz…… Bingh- siengh rim le couh camhseiz doi gwnz namh. Lienz daeuhfouhbingj hix aeu daj Daihhaw Cin daiq dauqma, mwngz rox lwi, de gaxgonq gig noix cawx byaek ma ranz. Dahlwg ngamq rox gangj vah, hix nyinhcaen vix gij byaek gwnz daiz naeuz:“Neix dwg daj dieg fuzbinz cawx dauqma！” Dahlwg ciengj gangj roengzbae:“Vih daemxcengj doxgaiq reihnaz fuzbinz! Raeuz aeu lailai gwn byaekheu！” Lij cangguh aen yiengh boux dajgvangjgau dem, dou cungj riu lo. Baez ndeu, de gaem daeh maksanhvazlij dauqma, youh iq youh soemj, mizdi lij haemz daiq saep，hoeng cingq hab bak gou. Dahlwg cam:“Byawz soengq lo？” De sawqmwh yiemzsuk hwnjdaeuj:“Neix dwg cawx ma. Mbouj aeu fag cim diuz mae gyoengq beksingq！Neix dwg gijliz！” “O！Gou mingzbeg lo！Daxboh dwg bouxguhyiengh raeuz yaek hagsib bw！” “Yawj daeuj, daeh mak- sanhvazlij neix nyaenx soemj, ndaej hawj raeuz swiq dungx bw！” De nunu aen laenggyaeuj， riuhwhw lo！

De naeuz, moix ranz bouxgungz cungj miz aen goj mbouj ityiengh, mizseiz gyoengqde cijaeu miz vunz dingq gyoengqde gangj haemzhoj. Baez ndeu, de bae ranz bouxgungz daj byaij, goenglaux lae raemxda gangj haujlai saeh, de itcig caemcaem dingq, mizseiz nai geij coenz. Goenglaux baez gangj sat, sim soeng lai lo. Seiz gvan gou gangj gij neix, hix rox siengsim. Hoeng, de simleix ndei, roxnyinh swhgeij gig miz fukheiq, bouxvunz laj biengz miz bingh haemz hix dwg cungj gaujniemh ndeu. De doiq dou naeuz:“Gaej cam bouxlaux naengz vih raeuz guh gijmaz, aeu cam raeuz ndaej bang bouxlaux guh gijmaz！” Gou dwk gij vah de haeuj ndaw sim bae, ciuqgoq ndei gyagoeng, hawj bouxgvan gou guhhong mbouj faensim. （1）