Bineix doxdaeuj, Nazboh Yen aeu Gun Cuengh song cungj vah lwnhgangj gij cwngcwz “aeu gaeuq vuenh moq”, hawj cwngcwz caen cienz daengz cien ranz fanh ranz, hawj cwngcwz gizgiz daengz caez.

Vihliux hawj vunz lajmbanj lai roxyiuj gij cwngcwz “aeu gaeuq vuenh moq”, daegbied aeu Gun Cuengh song cungj vah daeuj lwnhgangj. Aeu gvangjbo、veizsin doengh gij neix lwnhgangj cwngcwz neiyungz、loh huq lawz、guhlawz ndaej bienzngeiz、ndaej boujdiep geijlai cienz、baenzlawz sinhcingj caeuq baenzlawz caeuqfaenh hawj vunz lajmbanj rox. Vahcoj sugsed hawj gyoengq vunzlai raen caenciet, “aeu gaeuq vuenh moq” baenz aen swz ranzranz cungj rox, daegbied dwg gyoengq bouxlaux, ndaej engqgya cingcuj rox cwngcwz baenzlawz caeuq bienzngeiz baenz- lawz, noix di ngeizvaeg caeuq yawj vunz gonq, gyaak gij simmuengh gyoengqvunz bae caeuqfaenh, caen ndaej bienzngeiz coihoengh vunzlai bae siufeiq.

Byaij haeuj Nazboh Yen gak dieg gai doxgaiq, ci、gyadienh、3C soqmax、danci dienhdoengh doengh gij doxgaiq neix lailanglang, gaiq huq moq mbaw baiz “aeu gaeuq vuenh moq” yienhda raixcaix, aeu song cungj vah lwnhgangj yinx ndaej haujlai vunz daeuj camcaz caeuq cawx huq gyaezmaij, “aeu gaeuq vuenh moq” vuenh baenz “ndwenngoenz ndei”, gaiq huq engqgya cinwngz、engqgya vanzbauj、engqgya ancienz byaij haeuj cien ranz fanh ranz.

Ciuq cam rox, Nazboh Yen daj lwnhgangj gij cwngcwz “aeu gaeuq vuenh moq” doxdaeuj, hawciengz lai hoengh, gyoengqvunz bae caeuqfaenh lai mingzyienj, gyonjgyoeb guh baenz gyadienh aeu gaeuq vuenh moq gaicawx 2645 baez, ci aeu gaeuq vuenh moq gaicawx 38 aen, cigsoh ragdoengh siufeiq 943.17 fanh maenz. Hengzguh cwngcwz mboujdan coi siufeiq aeuyungh, hix doinyoengx gyadienh、ci doengh gij hangznieb neix gaicawx lai hwnj.(Moz Lijcang)