Mboengqneix, Swcigih Dangjveij Senhconzbu、Dungjcanbu、Vangj- sinban caeuq Swcigih Gyauyuzdingh、Minzcunghveij、Swhfazdingh doxcaez yaenqfat fueng’anq, baijbouh gij yienghsaeh ndwen senhconz minzcuz doxgiet baenaj bi 2025.

Ciuq cam rox, baezneix ndwen senhconz minzcuz doxgiet baenaj yaek youq 3 nyied 31 hauh daengz 4 nyied 28 hauh guh, Guengjsae yaek lienzdaemh gyalaeg hagsib senhconz Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz caeuq gij cingsaenz Samcung Cienzhoih Gaiq Ngeihcib Dangj, nyinhcaen roxyiuj gij swhsiengj youqgaenj gyaak caeuq gaijndei hong minzcuz Siz Ginbingz、gij iugouz youqgaenj lwnhgangj hong Guengjsae; guh aen ban yaenglwnh couqmaenh gij eiqsik Cunghvaz Minzcuz ranz vunz ndeu, lwnhgangj gak baih gak giz liux bae, doinyoengx gaiq lijlun cauhmoq dangj engqgya haeujlaeg simvunz. Guh gij yienghsaeh senhconz “gangj ndei gij gojgaeq Cungguek bien’gyaiq ceihleix seizdaih moq”, cingj gvendaengz cujliuz meizdij gicej, bae daengz Fangzcwngzgangj、Baksaek、Cungzcoj daengj dieg ra gij anqlaeh okyiengh Guengjsae soujmaenh bien’gyaiq henmaenh bien’gyaiq hwngvuengh bien’gyaiq, senhconz gij saedguh hawj vunz gamjdoengh dieg bien’gyaiq fatyiengz fungheiq ndei, langhbaij gij yienghsiengq seizdaih moq gak cuz beixnuengx gaenx guh baenaj, lwnhgangj aen gojgaeq hawj vunz gamjdoengh Guengjsae minzcuz doxgiet、bouxboux caezhoz hwnqguh aen gih guhyiengh couqmaenh gij eiqsik Cunghvaz Minzcuz ranz vunz ndeu.

Heuhcomz hagdangz guh gij yienghsaeh “roek aen it”, hawj gak cuz lauxsae hagseng lai rox gij eiqsik Cunghvaz Minzcuz ranz vunz ndeu, couh dwg moix aen hagdangz guh baez yienghsaeh senhconz langhbaij ndeu, moix aen hagdangz lingjdauj guh baez baugau ciendaez ndeu, moix aen ban hai baez banhoih cawjdaez ndeu, moix aen si、yienh(si、gih) guh baez yienghsaeh yawjhag son’gyauq、comz guh yaenglwnh 《Aen Ranz Hung Cunghvaz Minzcuz》《Cunghvaz Minzcuz Daihdoxgiet》 ndeu, gikcoi aen hagdangz miz diuzgen guh baez yienghsaeh ngoenzciet langhbaij swnjcienz rox yenzgiu hagsib minzcuz vwnzva ndeu, dazyinx lauxsae hagseng caeuqfaenh baez yienghsaeh angqhoh ngoenzciet dangdieg ndeu. Guh minzcuz cwngcwz dangj caeuq faplwd fapgvi haeuj gihgvanh、segih、lajmbanj、ndawhag、giyez、gvangj- cangz、vangjloz daengj, daezhawj faplwd bangcoengh caeuq camcaz fugsaeh hawj gak cuz beixnuengx, bang gak cuz beixnuengx guh saeh caen saeh ndei, dazyinx gak cuz beixnuengx gagrox aeueiq faplwd hag faplwd souj faplwd yungh faplwd, hawj gij bonjsaeh ceihleix hongsaeh minzcuz lai ak. Guh gij yienghsaeh langhbaij senhconz bauganh caeuq sawdoz, banh aen hoih lwnh rox yawjdoeg dauq saw minzcuz doxgiet baenaj caeuq yienghsaeh langhbaij daengj, dazyinx gyoengq bouxdoeg laebmaenh aen leixniemh “Cunghvaz Minzcuz ranz vunz ndeu”.

Fueng’anq iugouz, daengx gih gak dieg gak gvendaengz danhvei aeu baengh gak loh meizdij bingzdaiz, aeu suci gisuz coengh rengz, yungh “gwnz sienq laj sienq” dox giethab, doenggvaq fat saenqsik、douzcuengq senhconz haijbau、fat senhconz swhliu、nem mbaw senhconz byauhyij daengj, lai guh senhconz son’gyauq couqmaenh gij eiqsik Cunghvaz Minzcuz ranz vunz ndeu, hawj aenbiengz cauh heiqfaenh ndei hwnq- guh aen gih guhyiengh couqmaenh gij eiqsik Cunghvaz Minzcuz ranz vunz ndeu、guh gij cingzcik hung Guengjsae yendaiva yiengh Cungguek.

(Sung Vwnz Yauz Wnhmingz)