Gaijgwz hailangh, Mbanjgamjhanq caeuq vunzlai daengx guek ityiengh, roengzrengz ganq hongreih hongnaz, damjlaux guh saeh moq. Ndaw reih, gaxgonq vunzmbanj ndaem haeux ndaem duh, seizneix ndaem gosangh ciengx nonsei; gwnz bya, gaxgonq ce fwz, seizneix vunzmbanj gaenh bya gwn bya, ciengx cwz ciengx yiengz; dah lajmbanj, gaxgonq cuengq hoengq, seizneix vunzmbanj gaenh raemx gwn raemx, ciengx bya ciengx gungq, yienghyiengh cungj guh, lohloh miz souhaeuj. Daengx mbanj bienq lo, ranzhaz bienq ranzlaeuz, roennamh bienq roensuijniz, diemj daeng miz dienh mbouj yungh youz, gwn raemx miz swlaizsuij mbouj yungh rap.

Gwn imq daenj raeuj, mbouj lumz saeh gaeuq. Mbanjgamjhanq caeuq vunzlai ityiengh, daih dem daih son lwg son lan gingq cojcoeng, hauq bouxlaux, bi ciep bi daengx mbanj doxcomz nauh dojdeih, hoh fungsou.

Youq lajmbanj moix mbanj bakmbanj roxnaeuz laengmbanj cungj miz aen miuhdojdeih ndeu, Mbanjgamjhanq dwg vunz gizwnq daeuj doxcomz youq, ndaw mbanj laengmbanj mbouj miz miuhdojdeih, cijmiz aen miuhcienggun ndeu, aen miuhcienggun neix dwg gyoengq lwglwg lanlan Mbanjgamjhanq daeuj gungq.

Riuznaeuz gaxgonq miz boux cienggun ndeu heuh guh Vangz Gvangjnanz, de daiq bing okbae doxhoenx dengsieng doxdauq, youq Mbanjgamjhanq yw sieng, gyoengqvunz Mbanjgamjhanq doiq de lumj vunzcaen nei, ngoenzngoenz baij vunz hwnj bya bae gip ywdoj hawj de yw sieng, soengq gij gwn hawj de ciengx mingh, soengq gij daenj hawj de cw ndang, de gig gamjdoengh, sieng yw ndei le, de couh caeuq gyoengq bing de youqdingh roengzdaeuj, hoh gyoengq vunzmbanj ranghdieg Vangangh Cunch neix.

Daj miz Vangz cienggun le, vunzdoeg mbouj daeuj heifouh, vunzmbanj wnq mbouj daeuj nauhsaeh, gyoengq vunzmbanj onjdingh gvaq saedceij, itcig daengz de youz liux daeng ndaep, feiz ndaep daeuh mon dai bae. De dai ngoenzhaenx, gyoengq bing couh yaek ram de dauqbae diegcoj de, vunzmbanj rox le daj seiqfueng betbaih comz gvaqdaeuj soengq de.

Goeng Vangz cienggun neix dwg vunz gizlawz, dwg bing bouxlawz, vunzmbanj mbouj miz boux rox, vunzmbanj cijrox de caengz aeu baz, caengz baenz gya. Gyoengq bing ram seihaiz de okbae le, caiq hix mbouj raen dauqma.

Gyoengqvunz Mbanjgamjhanq vihliux geiqniemh Vangz cienggun, bihaenx couh doxnaeuz comz ngaenz youq bakmbanj guh aen ranz iq ndeu, an coh “miuhcienggun”.

Bi daengz mwh dajsou sat, roxnaeuz daengz ciet, gyoengqvunz Mbanjgamjhanq couh daengz miuhcienggun daeuj cang yieng diemj lab, baij noh baij mak daeuj gingqbaiq Vangz cienggun.

Seizneix, Mbanjgamjhanq fatcaiz lo, gyoengqde hix caeuq vunz mbanj wnq ityiengh dajcai gingq fungsou, gouz fwnraemx, muengh bingzan.

Dajcai dwg gienhsaeh ceiq hung Mbanjgamjhanq.

Ngoenz dajcai, daengx mbanj vunz boux youq gyae youq gyawj cungj dauq caez, daihgya daeuj daengz miuhcienggun, guhdoih gaj mou gaj yiengz, dang bit dang gaeq.

Banhaemh, goengdauh baij daiz guhdauh、caijvadaeng(踩花灯); bouxgeq eu fwen gangjgoj; bouxcoz dap daiz ciengq go、diuq foux、dwklongj（打砻）.

Dwklongj dwg feihyiz Bouxcuengh, lajmbanj miz saeh’angq couh aeu dwklongj.

Ciengqheiq gaxgonq, daihgya ram aen longj daengz baihnaj daizheiq, aen longj neix dwg aeu gyaengh faexgauj ndeu vat baenz, raez haj cik, gvangq cik ngeih, bet boux dwklongj bouxboux gaem diuz faexdwngx faenbied ndwn youq longj songbaih, “dungz、dungz、dungz” boux haidaeuz coh ndaw longj daem sam sing. Ciepdwk, “dungz lungz dungz、dungz lungz dungz……” Bet boux doengzcaez daem, yaepseiz, gij sing longj youh naek youh hung haenx yiengj doh bya doh rungh.

Riuznaeuz dwklongj daj Dangzdai couh miz, haidaeuz dwg yiengh doxgaiq vunzguhnaz lajmbanj aeu daeuj fad haeuxgok ndeu, aenvih gij sing de ndei dingq, vunzmbanj couh aeu daeuj roq guhcaemz, daegbied dwg daengz ngoenzciet roq longj, engq hawj vunz simhai sim’angq, daengz seizneix, baez daengz miz saeh’angq, roxnaeuz daengz cietheiq, gyoengqvunz cungj maij dwklongj daeuj angqcoux. Dajcai youq lajmbanj dwg gienh saehhung saeh’angq ndeu, noix mbouj ndaej aeu dwklongj, fap dwklongj miz haujlai yiengh, miz seiq boux dwk, miz bet boux dwk, miz cibngeih boux dwk, dwk seiz hix mbouj dwg luenh dwk, seizlawz hab dwk bien couh dwk bien, seizlawz hab dwk daej couh dwk daej, mizseiz baihswix baihgvaz doxvuenh dwk, mizseiz bangxbien caeuq lajdaej doxvuenh dwk.

“Doeg doeg dungz, doegloeg doegloeg dungz dungz dungz……” Mizseiz boux dwklongj doq dwk doq diuq foux, ndeidingq youh ndeingonz.

Dwklongj sat, couh ciengqheiq lo, gwnzdaiz ciengq go diuq foux, daeng rongh lumj banngoenz, vunz hemq lumj gyang haw.

Ceiq mizyinx dwg, doenghbaez daengz seiz dajcai ciengqheiq, vunzlai cungj heuh gyoengq bouxgeq roekcib bi doxhwnj haenx doxcomz daeuj daengz gwnz daizheiq naengh ndei, heuh gyoengq lwgnyez ndaw mbanj daeuj hawj gyoengq bouxgeq soengq ngaenz soengq doxgaiq. Seizneix gyoengq bouxgeq cungj gikdoengh dwk raemxda conh bae, gyoengqde eu fwen naeuz:

Fwncin ciuz rumz daeuj,

Mbwn raeuj valeux hai,

Lwgnyez bouxboux gvai,

Nai bouxgeq simlangh.

Ciuhgeq vunz cix naeuz,

Saeu cingq ranz cij maenh,

Lwgnyez ndaej vunz haenh,

Gwndaenj yienghyiengh miz.

Mboqraemx baengh goek lae,

Lwg ndei baengh boh gyauq,

Vunz ciuhlaeng rox hauq,

Gauq(baengh) vunzlai daeuj son.

Ngoenz ndei gaen rumz daeuj,

Haeux noh baij rim daiz,

Ciuh lwg miz sim lai,

Bouxgeq dai dalaep.

Haeux byaek guh ndei, youq doiqnaj miuhcienggun dapdaiz, daengx mbanj vunz guhdoih gwn haeux. Seizneix, bouxgeq couh son lwgnyez aeu ndeindei doegsaw, aeu lumj goeng Vangz cienggun nei, cienzsim cienzeiq vih vunzlai guh saeh, daengz dai hix hawj vunz roxgeiq.

Bibi son, donqdonq gyauq, gyoengqvunz Mbanjgamjhanq bouxboux roengzrengz doegsaw, bibi miz vunz hwnj daihhag, daengz seizneix, daengx mbanj gaenq miz ngeihcib roek boux vunz gwn haeux guekgya, gyoengqde youq gihgvanh、youq yihyen、youq hagdangz、 youq gunghcangj、youq budui roengzrengz vih vunzlai、vih guekgya guh saeh, ndaej vunz hag, ndaej vunz gingq, ndaej vunz haenh:

Mbanjgamjhanq caen ndei,

Meiz(miz) gwn youh miz daenj,

Bouxlaux guhhong maenh(ak),

Lwgnyez gaenx doegsaw.

Guhdoih youq lajmbanj,

Hag Gamjhanq cij baenz,

Rox gwn rox rom ngaenz,

Bouxboux raen cungj maij. (2 sat)