Gaenh geij ngoenz neix, Swcigih Yinzda Cangzveijvei Minzcuz Veijyenzvei fucujyin veijyenz、 cangzveijvei minzcuz gunghcoz veijyenzvei fucujyin Cau Gveilanz daiq cujdiuyenz daengz Hocouh Si diuyenz gij cingzgvang mizgven hong couqmaenh gij eiqsik caezcaemh Cunghvaz Minzcuz.

Cujdiuzyenz gonqlaeng daengz Hocouh Si Bazbu Gih Cwngzdungh Cogaep Saedniemh Cunghyoz、 Lenzdangz Cin Mbanjdancungh、 Nanzyangh Cin Mbanjvangliz giekdeih fouxmeuzfeiz daengj diuyenz. Cujdiuyenz ciengzsaeq liujgaij Bazbu Gih gij cingzgvang guh hong couqmaenh gij eiqsik caezcaemh Cunghvaz Minzcuz haeuj hagdangz、 lijyouz coicaenh gak minzcuz samgyau、 cienzciep caeuq baujhoh minzcuz conzdungj vwnzva maenhndei、 mboqraemxraeuj gangh- yangj canjnieb coicaenh ginzcung swnghcanj demsou daengj.

Cujdiuyenz ceijok, couqmaenh gij eiqsik caezcaemh Cunghvaz Minzcuz haeuj hagdangz， gak mizgven bouhmonz、 gak gaep gak loih hagdangz aeu maenhsaed lozsiz hong cwzyin. It dwg cauxlaeb lizdijva goqcingz dijhi、 gyagiengz hwnqguh gyaucaiz dijhi caeuq yungh swhyenz ndei, cienzmienh doihengz vah saw guekgya doengyungh son’gyauq sonhag、 gaijndei sonhag fuengsik fuengfap、 haigvangq ndawhoeng vangjloz gung vunz; ngeih dwg guh hozdung cawjdaez gyauyuz、 hwnqguh ndei yungh ndei gak loih cindi gung vunz、 coicaenh gak cuz hagseng samgyau； sam dwg gyagiengz caeuq gaijndei gij vwnzva vanzging haeuj hagdangz、 fatok cozyung cwngcwz dazyinx、 laebhwnj boiqhab gung vunz gwzgiz，hawj gyaezguek cujyi gyauyuz、 gwzming conzdungj gyauyuz、 gozfangz gyauyuz、 couq- maenh gij eiqsik caezcaemh Cunghvaz Minzcuz gyauyuz daengj caeuq hagdangz dwzyuz、 dijyuz、 meijyuz、 lauzdung gyauyuz giethab ndei, hawj duj va minzcuz doxgiet youq ndaw hagdangz hai ndaej engq gyaeundei.

Cujdiuyenz giengzdiuh, guh ndei lijyouz coicaenh gak minzcuz samgyau. It aeu nab couqmaenh gij eiqsik caezcaemh Cunghvaz Minzcuz iugouz caeuq lijyouz coicaenh “samgyau” giva haeuj gij gviveh moq minzcuz、 vwnzva、 lijyouz caeuq vwnzvuz daengj bouhmonz bae, yungz haeuj hozdung doigawj dieg baeyouz guenjleix caeuq bozvuzgvanj lingjyiz bae; ngeih aeu guh ciendaez gyauyuz beizyin couqmaenh gij eiqsik caezcaemh Cunghvaz Minzcuz, dazyinx daemxcengj dieg baeyouz、 dieg vwnzboz fungfouq caezcienz yinzvwnz loih baijok caeuq gij neiyungz gangjgej dieg baeyouz, engq laegvat gij vwnzva neihanz gak minzcuz, cingjhab swhyenz vwnzva lijyouz, cauhmoq doxgaiq vwnzva lijyouz caeuq fuzvu hingzsik, gangj ndei gij goj Cunghvaz Minzcuz vwnzva; sam aeu dazyinx daemxcengj dieg baeyouz、 dieg vwnzboz yenzgiu haifat goeng’iksingq cawjdaez lohsienq couqmaenh gij eiqsik laebndei Cunghvaz Minzcuz, gveihfan caeuq dazyinx sevei ligliengh ciuq hawciengz bae guh, doidoengh gij cingzgvang “hag”“youz” laegdaeuq yungzhab, yungh lijyouzyez hwngfat ndei doidoengh gak minzcuz samgyau.

(赵金宾/Cau Ginhbinh 魏晓丽/Vei Yaujli)