Caet nyied cocaet, dwg ciet bouxyoux Cungguek, gyoengq baengzyoux youq gwnz muengx fat gak cungj gien dak gak cungj doz, gwn ndoet guh’angq yienghyiengh cungj miz. Gou caemrwgrwg yawj dwk lwgda imq, cij ndaej danqheiq gienbaengzyoux swhgeij lumj daeh bouxgungz nei gijmaz cungj mbouj miz, cawz le di doxgaiq siengj ndwi gag guh angq haenx, gizyawz doxgaiq caen dwg noix lai. Gwnz muengx miz mbangj conhgyah hix naih mbouj ndaej fwzfwd youq ngoenz cocaet okdaeuj luenh gangj luenh lwnh, naeuz goj Niuzlangz Ciznij wnggai daj ndaw gobwnj cunghsiujyoz cawz bae, aenvih Niuzlangz swnh Ciznij caemxndang bae caeg buh de, lienz vaq ndaw buh ndaw cungj dawz bae caez, de cij miz aen gihvei caeuq bouxsien roxnaj, cij miz aen goj yienzfaenh neix riuz daengz seizneix, Niuzlangz daj daudwz caengzmienh daeuj gangj gaenq dwg vunzvaih, hoeng lwgsau neix lij mbouj rox najnyaenq maij boux rubmyaiz neix, de caemh dwg vunz eiqsei mbouj cingq. “Danghnaeuz cunghsiuj hagseng seizneix caemh hag aen goj neix, swnh mehmbwk caemxndang caeg buh gyoengqde……” Lumj- naeuz gij vah conhgyah miz geij faen dauhleix, cij mboujgvaq aen goj neix riuz le geij cien bi lo, dwg mbouj dwg vunzbiengz cungj baenz bouxhuk la? Roxnaeuz dwg conhgyah gaenq bienqbaenz bouxhuk la?

Caet nyied caet gaenq gvaq lo, hoeng mbwn hwngq caengz caeuq co- caet ityiengh gvaqbae, couh suenq haeuj hwnz gaenq laeg, ciuqyiengh oem dwk ninz mbouj ndaek. Gou cix ok yangzdaiz bae naengh youq, cimq cenj caz ndeu, dinghdingh yawj aen seiqgyaiq baihrog laepnyaennyaen haenx. Aen luzyinh- gih gwnz daizsaw yaeuq le haujlai bi haenx cingq cuengq raq go geq ndeu, heuhguh 《Gij Ronghndwen Ndaw Hawsingz》. Gij diuh caeuq sing de diemzsubsub, gij swz de hawj vunz simdoengh “danghnaeuz miz ngoenz ndeu ndaej caiq bungz daengz, hawj vuenyungz vanq rim daengx haemh……” Go neix lumj raemxrij numqnat lae nei, menhmenh lae youq gyanghwnz ndatoem, lij miz cenj caz youh diemz youh haemz, lumjnaeuz daiq di liengz ndeu daeuj nai gij simcingz ndatfwd gou. Mbajdaeng cimh daengrongh mbin daeuj, youq rog cueng buekmingh daemj cueng “buca buca……” , cijvih ra faenh rongh caeuq ndat ndaw sim de gyaepgouz haenx, gou mbouj lijgaij mbajdaeng coemj feiz miz maz eiqsei, daj ciuhgeq daeuj haujlai vwnzyinz vwnzva gig laeg daudwz sangndei haenx haenh mbajdaeng coemj feiz dwg gyaepgouz lijsiengj, hoeng gou cix nyinhnaeuz mbajdaeng ngawzhuk raixcaix, couh suenq mbouj miz caengz cueng neix, couh suenq mbajdaeng ndaej youq naj daeng mbinfwfw, caj daengz mbwnmomj hix cij mboujgvaq dwg duz seihaiz caepcat gwnznamh ndeu, yienzhaeuh couh ngaiz duzmoed ciengxlwenx gueng mbouj imq haenx doq ciengq doq foux ram bae guh gijgwn seizdoeng, louz roengzdaeuj cijmiz aen goj ndeu hawj vunz bingzgyaq deng loek. Gou mbouj rox, vwnzyinz、 gou、 mbajdaeng、 duzmoed doengh gij neix bouxlawz cij dwg bouxhuk. Hoeng gou caen siengj guh boux vunzhuk ndeu !

Haemhneix, youq ndaw gienbaengzyoux, boux baengzyoux ndei ndeu naeuz roxnyinh swhgeij couh lumj boux vunzhuk ndeu nei, gidij dwg gijmaz cingzgvang gou mbouj rox, gou hoiznaeuz bouxhuk cij dwg boux ceiq sim’angq dahraix. Danghnaeuz miz ngoenz ndeu, gou cigsoh bienqbaenz boux vunzhuk mbouj miz gijmaz gvaqniemh ndeu, cingj vunzbiengz gaej riu gou, haenx dwg aenvih gou lauheiq gaenq ra dawz faenh simhai caeuq angqyangz ndeu!