Mboengqneix, Cungzcoj Si Caizcwnggiz lwnh vunzlai rox, bi 2024 doxdaeuj, aen si neix gyalai bued cienz, doinyoengx hangz hamj guek baeyouz hwngfat riengjret, soq bouxhek hamj guek baeyouz cunggvaq 5 fanh vunzbaez.

Cungzcoj Si Dasinh、Ningzmingz、Lungzcouh、Bingzsiengz daengj yienh(si) caeuq Yeznanz doxrangh, sienq bien’gyaiq raez miz 533 goengleix, dwg diuz roen hung diegnamh guek raeuz doeng coh Dunghmungz.

Vih doinyoengx bien’gyaiq baeyouz hwngfat coh gozci、lai yiengh, bi 2024, Cungzcoj Si cauh diuz sienqloh hamj guek baeyouz “yawj raemxdiuqdat+cawx doxgaiq hamj guek+doxhag vwnzva”, hwnqguh aen haw mbouj aeu suiq Cungguek Yeznanz、ranghdieg langhbaij feihyiz daengj hanghmoeg miz daegsaek, caemhcaiq bued cienz 1200 fanh maenz（cienz Cungguek）, haeujcoengh bae guh dieg doxgap hamj guek yawjngonz raemxdiuqdat Dwzdenh(Banjyoz) Cungguek Yeznanz, guh baenz “cawx baez fei ndeu, yawj song mbiengj” fuengbienh gvaqgvan.

Caemhseiz, Cungzcoj Si cienmonz bued cienz, haeujcoengh Vehbangxdat Byaraiz cauh aen dieg baeyouz 5A gaep, gyoebbaenz 10 cuj cienmonz guhhong, cang ndei aen cungsim fugsaeh bouxhek、aen cin iq ciengxndang mboqraemxraeuj、aen baksok vwnzva Loegvet daengj, hawj bouxhek rox- nyinh dieg baeyouz lai ndei, bangrengz Aen Gingjgih Vehbangxdat Byaraiz hwnj mbaek baenz aen dieg baeyouz 5A gaep guekgya.

Cungzcoj Si gaenx couz cienz, doihaeuj hwnqguh aen hanghmoeg sawqguh lajmbanj gyaeundei“haj ndei song youq”. Youq Cungzcoj Si Gyanghcouh Gih, dangdieg bued cienz caizcwng, hwnqbaenz aen dieg caeuqfaenh yenzgiu hagsib guhhong comz miz “caeuqfaenh dajndaem+dajcawj+youq lajmbanj youq”, gungh ciepdaih bouxhek、aen doih hagsib daengj 3.8 fanh vunzbaez.

(Linz Hau Veiz Gyahsiu)