Sawgeq cihsaw minzcuz vunz noix Guengjsae cungjloih lai、soqliengh haemq lai, dwg daj neiyungz fuengmienh daeuj baij ok gij daegdiemj de. Daj banjbonj、caizliu、yienghceij、cienzswnj、faenbouh doengh fuengmienh neix yawj, sawgeq cihsaw minzcuz vunz noix Guengjsae miz gij daegsaek minzcuz caeuq diegdeih engq yienhda, cujyau biujyienh youq geij fuengmienh lajneix:

It、Banjbonj Dwg Bonjcau Lai, Bonjgaek、Bonjyaenq Noix Raen

Mwh bonjsaw aeu ceij guh hwngfat ceiq ndei haenx, dwg aeu gij gisuz gaekbanj yaenq cih caeuq genjcih yaenqsaw gvangqlangh doigvangq wngqyungh guh biugeiq. Daj Sungdai hainduj, gij dinfwngz gaekbanj caeuq gij gisuz genjcih yaenqsaw cienz haeuj Guengjsae, raen miz gij saw guenfuj okcienz goqcingj bouxcangh gaekbanj gaekyaenq. Mwhhaenx Gveilinz baenz aen cungsim Guengjsae gaekbanj gaekyaenq. Mwh Nanzsung, dieg gaekbanj yaenqsaw lai gya’gvangq, diegdeih faenbouh hwngfat daengz Liujcouh、Yungzcouh(seizneix Yungz- yen)、Siengcouh doengh gij dieg doeng roen ndei、ginghci vwnzva haemq ndei haenx. Mingzdai, aen hangznieb gaekbanj yaenqsaw yied ngoenz yied mwnhoengh, daengx dieg Guengjsae cungj riuzhengz gaeksaw lo. Cingdaih aen hangznieb gaekbanj yaenq saw dabdaengz ceiq hoengh, Cingdaih geizbyai hainduj aeu cenh gaek baenz cih baenz cih saw, aeu vunzgoeng genjcih hab baenz coij le caiq aeu gihgi yaenq baenz saw, saw gaekyaenq couh miz lai miz daih lo. Hoeng sawgeq cihsaw minzcuz vunz noix cix mbouj raen miz bonj gaekyaenq, yienzaen cujyau miz sam diemj: It dwg dieg yungh sawgeq cihsaw minzcuz vunz noix gig noix, boux aeu yungh mbouj lai. Guengjsae geij cungj cihsaw minzcuz vunz noix cujyau youz goengmo、goengsae、goengdauh、canghfwen doengh bouxcangh ndawbiengz yungh caeuq riuzcienz, mbouj miz guenfueng doengjit gveihfan, engq mbouj doigvangq bae yungh, vihneix cihsaw cij youq ndawbiengz mbangj di vunz rox yungh, mingzyienj dwg gij saw beksingq ndawbiengz yungh, aenvih cijdwg saek boux saek boux aeu yungh, ndigah mbouj baenz buek gaekyaenq. Ngeih dwg minzcuz vwnzva ciuhgeq dingzlai dwg aeu gij fuengsik cienzdoengj fuengzcug cienzswnj、saefouh cienz hawj lwgsae baenzneix cienz roengzbae, mbouj baenz aen dijhi hagdangz son’gyauq gag hag roxnaeuz guenhag. Caemhcaiq sawgeq cihsaw minzcuz vunz noix dingzlai dwg sawging saenqyiengj ndawbiengz, de gag miz gij daegsingq saenzmaed, bouxcienzswnj vihliux hawj de cungj miz gij daegsingq saenzmaed caeuq gienzvi, mbouj daih nyienh hawj vunz rog rox. Youq haujlai sawging、sawfwen satbyai, ciengzseiz raen cihsaw “louz cienz lwglan, mbouj ciq vunz rog”. Sam dwg aenvih ginghci hwngfat suijbingz mbouj sang cauxbaenz sawgeq cihsaw minzcuz vunz noix nanz raen bonj gaekyaenq. Gaekbanj gaekyaenq cawzliux gisuz iugouz haemq sang, lij aeu yungh cienz bae goqcingj canghgaek、canghyaenq caeuq cawx ceij、maeg doengh gij doxgaiq neix, neix aeu loq miz cienz cij guh ndaej daengz. Gwnz lizsij gizdieg minzcuz vunz noix, dingzlai dwg gizdieg roen mbouj doeng、vunz noix daengz、ginghci haemq doeklaeng, rap mbouj hwnj cienzgoek gaekyaenq saw.

Ngeih、Cangsik Dwg Cangbwn Lai, Dinfwngz Cangding Haemq Genjdan

Gij cangsik sawceij ciuhgeq guek raeuz ginglig gienjsug caeuq cekyieb song duenh. Yiengh saw gienjsug dwg ciepswnj yiengh sawgepduk、sawbaengzsei, hwng youq Nanzbwz- cauz daengz Vujdai seizgeiz, de cungjdaej yienghsik lumjbaenz gij vehgienj caeuq suhfaz daihneix. Gij fuengfap dajcang de dwg aeu diuzsug guh cungsim, mbawceij daj baihswix gienj gvaq baihgvaz. Ceijgienj bingzciengz aeu lai mbaw ceij lienzciep baenz, dohraez bingzciengz gouj daengz cib mij, engq raez lij lai daengz cib lai mij. Gienj ndeu dwg aen danhvei ndeu, bonj saw ndeu ndaej youz gienj ndeu roxnaeuz geij gienj gyoebbaenz. Gienjsug cang mbouj ndaej cihsaw lai, bingzciengz yungh youq suhfaz、vehdoz、sawging.

Yienznaeuz gienjsug cang caeuq gienjboz geizcaeux doxbeij lai ndei haujlai, hoeng gizyaez hix gig yienhda, ceiq cujyau couh dwg gienj saw ndaej sij cih noix, mbouj hab aeu daeuj causij faenzcieng raez; daihngeih dwg yawjdoeg caen mbouj fuengbienh dahraix. Gienjsug dohraez 10 mij lai, yawjdoeg seiz yaek mbe okbae, yawj liux yaek gienj hwnjdaeuj, hojguh dangqmaz. Danghnaeuz yaek youq ndaw saw cungqgyang roxnaeuz baihlaeng ra cih saw ndeu roxnaeuz coenz vah ndeu, couh yaek hai gienjsug liux bae, ra raen le youh caiq gienj hwnjdaeuj, dwgrengz youh hong lai.

Dangzcauz geizlaeng le, saw gienjsug gvaqdoh coh saw cekyieb, neix dwg guek raeuz ciuhgeq cangding saw hwngfat daengz duenh cingzsug, hix ceiq daibyauj ndaej gij yisuz cangding sawgeq ciuhgeq Cungguek. Saw cekyieb cujyau daegdiemj dwg youz yiebsaw mbaw ndeu guh danhyenz caebcomz cangding baenz cek, dwg gij saw caeuq saw gienjboz、 saw gienjsug mbouj doengz saek di, dwg gwnz lizsij guek raeuz saw cangding baez gwzming ndeu.

Saw cekyieb gaengawq gij fuengfap cangding mbouj doengz youh yienjbienq ok lai cungj lai yiengh, daihdaej ginglig daebsaw cang、baenqcienj cang、mbungqmbaj cang、duk laeng cang, daengz Mingzdai cij cingqsik raen miz saw mae cang. Mae cang, yawj mingz couh rox dwg cungj yienghsik cangding aeu mae daeuj cangding, aeu mae lienz yiebsaw caeuq fungmienh cangding baenz cek saw, diuz mae ding laeuh youq baihrog. Gij saw seizneix saedceiq couh dwg ciuqyungh gij cangsik saw mae cang ciuhgeq, mboujgvaq dwg noix yungh mae ding, gaij baenz gyau ding mbouj yungh mae roxnaeuz gwihmax dingcang.

Saw mae cang dwg hongfwngz cangding, miz gij gisuz iugouz yiemzgek, gij bouhloh dinfwngz hix haemq fukcab. Gij saw mae cang ciuhgeq cienz haenx aeu ginggvaq leixliuh、boebyieb、boiqyieb、dogbingz、atbingz、lanz bingz、mbon congh、con ding ceij、nem fungmienh、raed saw、bau gok、fuk bak、mbon congh con mae ding saw、nem ciemsaw、yaenqsaw yaenq cihgoek cib geij yamq, menh guh cix baenz hong. Lwgsae yaek lienh haujlai bi cij rox guh.

Aenvih sawgeq cihsaw minzcuz vunz noix Guengjsae dwg bonjcau lai, daj lijlun fuengmienh daeuj duenhdingh loih sawgeq neix mbouj yungzheih raen miz gij cangsik haemq gyaqciq, youq ndaw hong bujcaz hix cwngmingz, gij cangsik sawgeq cihsaw minzcuz vunz noix Guengjsae ca mbouj lai cungj dwg cangbwn. “Cangbwn” mbouj dwg aen swz gveihfan banjbonjyoz gangjheuh haenx, cix dwg baenzneix heuh doengh gij cangsik ndawbiengz yungh fuengfap aeu mae cang saw haenx. Saw cangbwn hix heuhguh saw bien bwn, caeuq saw mae cang cengca haemq yienhda:

It dwg saw cangbwn seiqhenz mbouj raed bien, yieb saw mbouj hanhdingh giz doiqcingq, cangding le baenzlawz couh baenzde.

Ngeih dwg saw cangbwn seizbienh mbon congh cangding, aen congh song aen daengz haj aen mbouj doxdoengz, aen congh doxgek hix mbouj yiemzgek.

Sam dwg bonj saw cangbwn diuz mae ding saw de dwg youq dangdieg aeu caizliu, mae’ndaij、maefaiq、maemuenzceij、baengzdiuz cungj miz, co saeq cungj ndaej, miz mae maz couh aeu mae maz daeuj cang.

Seiq dwg saw cangbwn gig noix dajcang, genjdan seizbienh, engqlij ciemsaw hix mbouj miz, cix gaej dwen bienlanz、hangzgyaiq、vehcap doengh yiengh dajcang neix.

Hoeng saw cangbwn hix mbouj dwg mbouj miz saek yiengh ndei, gij ndeicawq de ceiq ndei dwg cienzgoek noix, cangding mbouj yungh geijlai nanz, genjdan hag ngaih. Saw cangbwn cawzliux youq gyoengqvunz ndawbiengz gvangqlangh riuzcienz, haujlai boux mizmingz hung hix gyaezmaij. Lumjbaenz Lujsin nyinhnaeuz saw cangbwn “sam mienh hawj de lumj yienghgaeuq, mbouj aeu cax bae gat”, de sij saenq hawj Siuh Ginh boux cozgyah daihneix naeuz: “Gou gyaez saw cangbwn, langh raed bae, saw bien bingz lumj bouxvunz gyaeujndoq nei —hozsiengh roxnaeuz naezgu.” Yawj ndaej ok saw cangbwn hix dwg gij doxgaiq seizdaih cauhbaenz, de ndaej hawj gak boux vunz aeu yungh haenx yungh, gag miz gij gyaciz de.

（caengz sat）