Sawgaeuq naeuz: Bya sang mbouj sang mbouj youqgaenj, miz sien couh okmingz, dah laeg mbouj laeg mbouj gaenjaeu, miz lungz couh lingz. Mbanjranz aen lumj aen, ndaej ndaem doenghgo, ndaej ciengx doihduz, ndaej daih ciep daih ciengx vunz majhung. Mbanjgamjhanq caeuq gij mbanjdoih ityiengh bingzciengz, hoeng youh caeuq gij mbanjdoih mbouj doxdoengz, aenvih Mbanjgamjhanq miz goj. Miz fwen naeuz:

Mbanjgamjhanq miz goj,

Ciuhcoj couh riuzcienz,

Fanh boux daengz cungj nien(niemh),

Cien boux daengz cungj lwnh.

Dieg neix dieg duzsien,

Cien boux daengz cien haenh,

Vunzmbanj bouxboux gaenx,

Yienghyiengh haenq(ak) gvaq vunz.

Mbanjgamjhanq youq Bingzgoj Si Haijcwngz Yangh Mbanjvangangh, aen mbanj neix youq giz gapgyaiq Bingzgoj Si Haijcwngz、Giucwngz、Bangjhih sam aen yanghcin, dwg aen dieg samgak ndeu. Daengx mbanj miz hajcib lai ranz, miz Vangz、Cangh、Liu、Cinz、Dangz、Veiz roek aen singq, song bak lai vunz.

Daj ciuhgonq daengz seizneix, Mbanjgamjhanq couh dwg aen dieg gyoengqvunz geij aen yanghcin neix gyauyoux yietnaiq、doxvuenh doxgaiq、guh gai guh cawx. Ciuhgeq couh fwen naeuz:

Yaek cawx rox yaek gai,

Byaijdin bae Gamjhanq,

Bouxhaw caeuq bouxmbanj,

Ganq gvaqdaeuj doxcomz.

Boux cawx cwz cawx vaiz,

Boux gai bit gai gaeq,

Daengz neix aeu couh ndaej,

Fanh saeh cungj rimhoz.

Lwgsau caeuq lwgmbauq,

Dauq Gamjhanq doxraen,

Gangj coenzcoenz dwgcaen,

Gyau baenz youx gvaqciuh.

Byaij haeuj bakmbanj Mbanjgamjhanq, yienh youq doiqnaj dwg ranzlaeuz aen nem aen, ciengzciengz vaxvax moqsaksak, miz siengq miz yiengh. Laengmbanj bya rangh bya, faexfaex nya’nya loegauau, va hai roeg ciengq; najranz dah- iq utut eujeuj raemx sawdikdik, bya saet nyauh youz.

Mbanjgamjhanq, reihnaz um, fwnraemx cuk. Ndaw doenghnaz, bi seiqgeiq maj rim doenghgo: seizcin gomiuz heu, seizhah goduh va, seizsou gohaeux henj, seizdoeng gomak rang.

Daeujdaengz Mbanjgamjhanq,

Ga nanq(dot) hix simhai,

Raemxsaw faex youh lai,

Ngaiz mbouj gwn hix imq.

Daeujdaengz Mbanjgamjhanq,

Ga nanq(dot) hix haisim,

Gwnzbya miz roeg mbin,

Lajdin miz bya diuq.

Bakmbanj Mbanjgamjhanq miz aen gamj he, sang cibhaj roek mij, gvangq caet bet mij, bakgamj rongh, ndawgamj laep, mbouj miz vunz rox aen gamj neix miz geijlai raez.

Dingjgamj hoij rim rinyagnywx, miz ndaek luenz lumj aen loz, miz ndaek hung lumj gagoek, miz ndaek raez lumj fajgen, vumzvauz nem youq gyang rinyagnywx, fonxrubrub lumj vunz youq gwnzdieg vanq lwgraz nei. Daejgamj, rinrouj cien geiz bak gvaiq, miz ndaek lumj dahsau yawj mbwn, miz ndaek lumj duzmax yaek mbin, miz ndaek lumj faggiemq baek gwnznamh, ndaekndaek rinrouj miz siengq miz yiengh, ndeiyawj dangqmaz. Ndaw gamj seizdoeng raeuj, seizhah liengz, Mbanjgamjhanq couh dwg aen gamj neix okmingz. Miz fwen naeuz:

Gamjhanq mboujsuenq hung,

Doeng rumz youh doeng heiq,

Aen gamj neix geizheih,

Seiqdaih riuz mingzdaeuz.

Riuznaeuz gig nanz gig nanz gaxgonq, miz geij boux vunz diegrog gvaq roen Mbanjgamjhanq, gyoengqde raen aen dieg neix ndei lai, doxnaeuz daengz laj dinbya guh ranz youq. Gyoengqde aeu rinbya caep ciengz, raemj faexnyienq、faexgauj guh saeu, aeu faexseih、faexrenh guh vengz, aeu haz hoemq dingj, aeu go’mbueng、go’em humx baihrog seiqfueng, youq aen ranz baenzneix haifeiz cawjgwn, yietnaiq haeujninz, gvaqlaeng aeu baz seng lwg, caiq mbouj dauqbae.

Gyoengqvunz neix ngoenzngoenz ranzrongh bae guh reih guh naz, haemhlaep dauq ranz guh gwn gangjgoj, saedceij gvaq ndaej soengswdswd, hoeng aen dieg neix mboujcaengz miz mingzcoh, hix yaepseiz heuh mboujrox guh mbanj gijmaz.

Miz ngoenz ndeu, ndawdah najmbanj sawqmwh mbin daeuj duzhanq ndeu, duzhanq neix ndang hung lumj aen loz, hoz raez lumj ganj go- byaz(gomungz), ga ndingfwgfwg, bak hung lumj aen siggeng, rouj hoengz lumj rouj gaeqciengq, song aen lwgda ronghrigrig, vunz mbanj gyae mbanj gyawj cungj gvaqdaeuj yawj, bouxboux haenh duzhanq neix ndeiyawj, hoeng bouxboux cungj naeuz duzhanq neix mboujdwg duzhanq swhgeij, bouxboux cungj naeuz mboujcaengz raen gvaq duzhanq baenzneix hung.

Duzhanq neix ngoenzngoenz youq ndaw dah gaeb bya, youq gyang gongoz ra gungq ra sae gwn, banngoenz de youq gyangdah youz bae youz dauq, banhaemh de youq biendah haeujninz. Haetromh daengz ranz yaek rongh de couh “goengqgat, goengqgat” heuh geij sing. Vunzmbanj baez dingq daengz sing hanq heuh, couh rox ranz yaek rongh lo, bouxboux hwnqdaeuj haifeiz cawj ngaiz, ranzranz nyaengq hwnjdaeuj.

Gaxgonq ciengzciengz miz duznyaen duzdoengh haeuj mbanj daeuj caeg bit caeg gaeq. Ciengzciengz miz bouxcaeg haeuj ranz bae caeg ngaenz caeg haeux. Ndaw mbanj daj miz duzhanq neix le, mbouj miz ranzlawz ra bit ra gaeq mbouj raen, mbouj miz bouxlawz ndwi ngaenz ndwi haeux.

Ngoenz ndeu banringz, nditndat lumj feiz, gyoengq vunzmbanj cingq youq ndaw reih ndaw naz nyaengq guhhong. “Goengqgat, goengqgat.” “Goengqgat, goengqgat.” Sawqmwh, duzhanq coh ndaw mbanj heuh mbouj dingz, vunzmbanj raen geizheih, boux youq ndaw reih guhhong, boux youq gwnzbya aeu fwnz cungj doxiu dauq daengz ndaw mbanj. Yaep he, gwnzmbwn fwj nanwtnwt, lajdeih laepngaungau, ciepdwk byajraez rumrum, fwn lumj miz vunz youq gwnzmbwn dauj raemx nei doek roengzdaeuj. Yaepseiz, gwnz bya raemx laehumhum, gyangluengq raemxrongz bonghfwdfwd, ndaw dah raemx gienjfwfw, ciengz fwn hung neix doek daengz banhaemh cij dingz.

Fwn rumz ngamq dingz, ndithaemh couh seq okdaeuj, ciuq ndaej ndaw mbanj rongh lumj gimhenj, gwnzmbwn venj miz duzdoengz caetsaek ndeu, vunzmbanj bouxboux okdaeuj yawj duzdoengz. Sawqmwh, vunzmbanj raen gyang duzdoengz miz duzhanq ndeu, duzhanq neix yaengyaeng coh baihnamz youz bae, doeklaeng youz haeuj ndaw gamj gyaeujmbanj bae lo, duzdoengz hix mbouj raen lo.

Daj baezhaenx hwnj, duzhanq youq ndaw dah haenx mbouj caiq raen lo, vunzmbanj nyinhnaeuz duzhanq neix dwg hanqsaenz hanqsien, nyinhnaeuz dwg duzhanq neix daiq fukheiq daeuj hawj vunzmbanj, vihliux geiqniemh duzhanq neix, vunzmbanj couh heuh aen gamj bakmbanj guh Gamjhanq, aen mbanj neix couh heuh guh Mbanjgamjhanq.

Gamjhanq okmingz lo, Mbanjgamjhanq okmingz lo. Doeklaeng, boux gvaq roen, boux deuz dieg daeujdaengz Mbanjgamjhanq couh youq roengzdaeuj, bi ciep bi, daih ciep daih, gyoengqvunz daj seiq fueng bet baih doxcomz daengz neix youq, doxgingq doxgyaez, doxbang doxcoengh, doxgiet doxhuz gvaq saedceij, seng lwgmbwk baenzsau, seng lwgmbauq coengmingz, ndaem haeux gogo fag, ndaem mak gogo baenz, ndaw dah miz bya, ndaw naz miz haeux, ranzranz gwn imq daeuj raeuj, bouxboux miz ngaenz miz cienz……

(1)