3 nyied 5 hauh, Swcigih Dangjveij Dungjcanbu cangzvu fubucangj Linz Vaizyungj daiq cujdiuyenz daengz Ningzmingz Yen diuyenz hong dajcauh rangh guhyiengh couqmaenh gij eiqsik caezcaemh Cunghvaz Minzcuz.

Cujdiuyenz daengz Ningzmingz Yen Caianh Yangh Yaden Cunh Mbanjmajdaih 、 Aiden Cin Aiden Segih Mbanjnazfungz、 Aiden Cin Ganh’ai Cunh Mbanjbanjganh，saeddieg bae cunz yawj gij cingzgvang dajcauh gak giz diemj guhyiengh. Cujdiuyenz haengjdingh le gij cingzyauq hong dajcauh gak aen diemj guhyiengh, nyinhnaeuz Ningzmingz Yen dangjvei、 cwngfuj gig yawjnaek, haenqrengz cihciz, siengjfap cingcuj, banhfap miz rengz, fwnhveiz dajcauh couqmaenh gij eiqsik caezcaemh Cunghvaz Minzcuz naekna. Cujdiuyenz ceijok, it dwg gak diemj guhyiengh aeu doek’ok gij neiyungz sienqmeh “couqmaenh” daeuj doicaenh, yungz haeuj dungjcan caeuq minzcuz doxgiet yenzsu, guh daengz “saedguh dwg gaenjaeu, cauhmoq guh hoenz”； ngeih dwg laebndei swzgangjgaij, aeu habdangq loihhingz diemj yienhciengz (cauhlaeb suenranz cingsaenz caemh miz Cunghvaz Minzcuz、 doidoengh gak minzcuz doengzcaez byaij coh sevei cujyi yendaiva、 coicaenh gak minzcuz samgyau、 daezswng minzcuz swvu ceihleix suijbingz caeuq ceihleix naengzlig dijhi yendaiva、 fuengzre minzcuz lingjyiz fungyiemj huxndumj) gangjgaij, caemhcaiq yungz gij laeh sengdoengh doxgven haeujbae； sam dwg aeu caenhvaiq caz laeuh bouj vangq, bouhfaenh diemj yienhciengz aeu engq daezswng fwnhveiz, doed’ok gij neihanz ndaej coicaenh gak minzcuz “sam gyau”.

Gaenlaeng, Ningzmingz Yen yaek itcig aeu couqmaenh gij eiqsik caezcaemh Cunghvaz Minzcuz guh diuz sienqmeh gak hangh hong, haeujlaeg vat gij neihanz Cunghvaz conzdungj vwnzva maenhndei, yungz “haj aen caezcaemh” caeuq gij neiyungz gak minzcuz samgyau haeuj swzgangjgaij bae, gangj ndei gij goj caezcaemh Cunghvaz Minzcuz. Haeujlaeg saedhengz giva lijyouz coicaenh gak minzcuz samgyau, laebndei gak hangh banhfap, guh ndei fuzvu, mboujduenh lai hawj gak cuz ginzcung roxnyinh ndaej daengz、 roxnyinh vuenyungz、roxnyinh ancienz, doidoengh Ningzmingz Yen hong dajcauh diemj guhyiengh couqmaenh gij eiqsik caezcaemh Cunghvaz Minzcuz yamq coh mbaek moq.

（梁宇晴/Liengz Yijcingz)