Liuz Fanghfangh daj ndaw ranz buet okdaeuj, hanh dumz najbyak, byoem raez yaek cw naj, de song fwngz baet byoem raez gvaq song mbiengj rwz, song gemj ngaiz daz baenz danqndaem. Vangz Meijyen riugaekgaek cam:“Mwngz guh gijmaz?” Liuz Fanghfangh naeuz:“Gou cawj haeuxcaeuz, feiz dawz youh ndaep, gou aeu gyongh boq le, boq dwk ndaep bae gou dauqcungz caux feiz, feiz yaek dawz, ndaejnyi mwngz heuh le, gou couh buet okdaeuj lo.”

Vangz Meijyen naeuz:“Daxboh gou miz hong guh lo, siengj heuh daxboh mwngz bae guh, boh mwngz youq ranz lwi?”

Liuz Fanghfangh sikhaek buet gvaq baihlaeng ranz bae, cib lai faen cung, boux vunzsai seiqcib bi ndeu gwed gofaex samoeg ndeu gvaqdaeuj, gang youq gwnz ciengz, de caengz raen naj mehyah Vangz Gencingh, ngaekngaek gyaeuj dongx naeuz:“Lauxbiuj daeuj la, haeuj ranz naengh bae.” Vangz Meijyen naeuz:“Dwg daxmeh gou, dou daeuj ra mwngz, dwg daxboh gou heuh mwngz bae Nanzningz guhhong, gou naeuz denva hauhmax daxboh gou hawj mwngz dwk hawj boh gou.”

Daxboh Liuz Fanghfangh youq gwnznamh gip di vaxsoiq ndeu sij youq gwnz ciengznamh, sij sat, heuh song mehlwg haeuj ranz gwn caeuz caengh bae ranz. Daxmeh Vangz Meijyen naeuz:“Mbouj gwn lo, mbwn yaek laep, gaenj baema.”

Liuz Fanghfangh umj gaem nye makywd gvaqdaeuj, gwnz nye makywd aen’aen henj hung singj- sien, hawj vunz ndwnj myaiz, Vangz Meijyen yawjraen le youh swenj youh buet gvaqbae ciep aeu, “makywd makywd,” doq mbaet gwn doq angqfwngfwng byaij baema, meh de doiq Liuz Fanghfangh caeuq daxboh de vadvad fwngz, gaenj riengz Vangz Meijyen baema.

（Cibroek）

Rumzbaek lumj boux goenggeq ndeu gaemh dwngx menhmenh daj giz gig gyae gig gyae haenx byaij daeuj, bouxguhhong hanh dumz buh mbaeq ndang, raen goeng rumzbaek daeujdaengz, caezgya angq dwk hemq naeuz:“Angqcoux mwngz daeuj ci dou, goeng rumzbaek ha, mwngz caengh dwg caencin lauxgoeng dou!”

Vangz Gencingh daiq song bang vunz ngamq guh ndwen lai seizgan gvethoi couh ndaej daih’it.

Rumzbaek ci daeuj, guhhong mbouj ok hanh, guhhong mizrengz, mbouj miz yazliz, mbouj miz baufug, cijmiz baenzlawz guh ndaej vaiq, guh ndaej ndei, guh sug cij baenz saeh, hangzhangz ok canghyienz.（20）