Boh’au gizsaed mbouj huk, mboujgvaq dwg mbouj daiq gyaez gangjvah, bingzciengz noix caeuq vunz baedauq, hoeng de cix dwg boux vunz gamjcingz gig lai ndeu.

Boh’au doekseng youq 50 nienzdaih, de maij doegsaw, hoeng seizhaenx mbouj miz ngaenz, de doeg daengz siujyoz sam nienzgaep couh dingz hag lo, de youq henz loh gip ndaej bonj saw manva ndeu, cungj dang bauj ityiengh maij. Boh’au gietvaen le, gij sibgvenq maij yawj saw haenx caemh mbouj gaijbienq, moix baez de byaij geij goengleix roen, de cingznyienh mbaet gij cienz gwn haeux, hix aeu cawx saw baema, couhdwg yienghneix, de mbouj noix deng yah gvaiq. Aenvih gig gyaez doeg saw, boh’au ndaw ranz gig gungzhoj cixbah, lij genhciz soengq lwg bae doegsaw, de maqmuengh gyoengq lwg de guhbaenz gij simnyienh de caengz guhbaenz haenx.

Gvaq ngoenzseng, haujlai vunz cungj siengj baenzlawz cij ndaej angqyangz gvaq ngoenzseng, baenz- lawz cingj baengzyoux bonjfaenh roxnaeuz vih bonjfaenh bae cawx laex ngoenzseng.

Hoeng boh’au mbouj doengz, ngoenzseng de, de mbouj vih swhgeij bwh gij byaek ndeigwn haenx, hix mbouj vih swhgeij cawx buhvaq moq, cix dwg cawj 30 aen gyaeqgaeq, yungh rokraemx coux bae hawj daxbuz gwn, de doiq daxbuz naeuz:“Meh, ngoenzneix dwg ngoenzseng gou, dwg ngoenz haemzhoj mwngz, gou mbouj miz gijmaz doxgaiq ndei, gou cij cawj di gyaeqgaeq ndeu hawj mwngz gwn, mwngz dwgrengz lo. ” Daihgya rox gij hingzveiz “geizheih” boh’au gvaq ngoenzseng neix le, miz mbangj vunz haenh de hauqswnh bouxlaux, miz mbangj vunz “riu” de naeuz, vunz doegsaw couhdwg caeuq gij vunz itbuen mbouj doxdoengz.

Boh’au miz roek caet beix- nuengx, hoeng de caeuq daxboh gou gamjcingz ceiq naekna. Geiq ndaej miz baez ndeu, daxboh baenzbingh youq yihyen yw yaek ndaej ndwen ndeu, bingh ndei le dauq ranz ciengxyw, daxboh ngamq dauq ranz, boh’au couh daeuj yawj, ndaw rungj lij umj duz gaeq ndeu. De caeuq daxboh gangj ndaej haujlai nanz, de saeqsim cam daxboh bingh ndei di mbouj caengz, vanzlij daengq daxboh aeu ndeindei re ndang. De naeuz daxboh baenzbingh, ndaw sim de couh mbouj onj. Gvaq geij bi le, daxboh cungj mbouj ndaej hoenxhingz ciengz bingh neix, vanzlij dwg byag dou bae lo. Ngoenz daxboh bae haenx, boh’au coenz vah ndeu cungj mbouj gangj, raemxda itcig youq ndaw da de baenq. Daxboh bae le, dou lij dwg lumj gaxgonq ityiengh heuh boh’au daengx ranz vunz daeuj ndaw ranz dou gwn haeux, hoeng daj daxboh bae le, boh’au couh mbouj daeuj gwn haeux gvaq, hix gig noix daeuj ndaw ranz naengh lo, cam de vihmaz mbouj daeuj, de youh yousieng naeuz:“Godaih gou cungj bae lo, gou youh miz gijmaz eiqsei, cij rox gya naek gij siengsim gou. ”

Boh’au yaek ndaej 60 bi lo, ndangdaej mbouj lumj gaxgonq, lai cungj bingh hawj de caengz laux couh geqgoem, gyoengq lwg de cungj youq hawsingz miz hong habhoz, guhbaenz gij simnyienh gaxgonq de caengz guhbaenz haenx, boh’au ciengzseiz yienghneix ndaengndiengq.

Gyoengq lwg de heuh de itheij gvaq, hoeng boh’au mbouj nyienh lizhai ranzmbanj, de naeuz gaenq gvenq youq lajmbanj, bae ndaw singz aiq roxnyinh mbouj cwxcaih. Gyoengq lwgnyez aeueiq gietdingh boh’au, youq lajmbanj ranzcoj de hwnq le aen laeuz iq ndeu, caemhcaiq hawj de cukgaeuq gwndaenj, daengq de mbouj caiq guh hong reihnaz, ngoenz cuengqgyaq hix ciengz ma ranz yawj boh’au.

Gyoengq lwg boh’au hix maij yawj saw, cawz bingzseiz soucomz gij saw guhhong, gij saw seiq daih mingzcu caeuq mbangj saw vwnzyoz deihleix hix mbouj noix soucomz. Gyoengqde rox boh’au haengj yawj saw le, moix baez baema cungj soengq hawj geij bonj. Moix baez daengz seizneix, boh’au cungj angq dwk lumj lwgnyez nei, umj saw sim’angq raixcaix. Boh’au mboujdan gyaez yawj saw, doengzseiz hix gig in saw, lwgmbauq dawz saw hawj de, de yawj sat le cungj dwg siujsim yo dawz, lau mbouj siujsim loengh vaih lo. Caj daeglwg caiq daiq saw daeuj hawj de seiz, de couh dawz gij saw gaxgonq yawj gvaq haenx boiz hawj de, de naeuz gij vunz gyaez doegsaw itbuen cungj dwg ciq saw hawj bouxwnq, mbouj miz soengq saw. Lwg de raen de baenzneix gyaez saw couh soengq saw hawj de, de lumj ndaej bauj nei, gikdoengh dwk naeuz:“Gou baenz ciuhvunz mbouj maij gijmaz, couhdwg maij yawj saw, siengj mbouj daengz gou baenz laux lij ndaej yawj gij saw gak loih ndei neix, caen dwg angq lai lo!”

Seizneix youq ranzmbanj boh’au, mboujlwnh dwg haetromh roxnaeuz banhaemh, cungj ndaej yawjraen gij ngaeuzndang de yawj saw haenx, gyoengq ranznden youh hainduj naeuz de dwg “cihsiz fwnswj” lo, doiq gij cwng neix, boh’au cungj mbouj fanjdui.