3 nyied 6 hauh， denyingj 《Fazgvanh Gwnz Fwj》 youq Nanzningz cuengqingj baez nduj. Bouh denyingj neix youz Swcigih Gaugaep Fazyen caeuq Swcigih Minzcunghveij daengj lienzhab ingjguh, dwg bouh denyingj nduj daezcaiz comzyawj fazgvanh siujsoq minzcuz, vunzlai raen haeujrwz raixcaix.

Denyingj aen vunq dwg Vangz Dwnghlinz “boux fazgvanh guhyiengh daengx guek”. Vangz Dwnghlinz, Yizcuz, caengz gvaqseiq gaxgonq dwg Lungzlinz Gak Cuz Swciyen Yinzminz Fazyen dangjcuj cwngzyenz、fuyencangj, youq fazyen guhhong 22 bi, de ndaej beksingq haenh baenz “fazgvanh byaijdin diegbya”“fazgvanh ndei beixnuengx Yizcuz”, ndaej haujlai hangh mingzdaeuz guekgya gaep. Bi 2017, Vangz Dwnghlinz aenvih gyaban fatbingh, ngaiz dai.

Denyingj cujyau lwnh gij ginglig Vangz Dwnghlinz gvansim mbanjranz, cawjdoengh dauq daengz diegbya bienbik Dwzngoz Yinzminz Fazdingz guhhong. De yungh faplwd caeuq gij sibgvenq minzcuz yungzhab ndeindi, gaijgez ndaej baenzroix vwndiz hojguh, guhlawz bang dahsau iq Yizcuz doilaex dauqbae hwnjhag、guhlawz cawqleix vunzmbanj uqlah seiqhenz deigyouq daengj, langhbaij le swhfaz youq baujhoh beksingq swnghhoz caeuq swnghdai vanzging miz yungh lailai, dwg aen sukingj sengdoengh seizdaih moq cwngfaz ganbu siujsoq minzcuz swhfaz bang beksingq.

Mwh aen yizsiz cuengq ingj baez nduj,《Fazgvanh Gwnz Fwj》 cujcang donzdui caeuq gak gyaiq daibyauj doxcomz giz ndeu, caez lwnh gij gojgaeq raeblaeng cauhguh, caemhcaiq yaenglwnh damqra diuz roen cauhmoq yungh denyingj senhconz fapceih.

Ciuq cam rox, geij bi neix daeuj, Gvangjsih fazyen hidungj gaenxmaenx vatcimh gij sucaiz denjhingz swhfaz bang beksingq, cauh ok buek fapceih vwnzva cozbinj haeujgyawj beksingq、raeuj sim vunz, ndawde 93 bouh cozbinj ndaej mingzdaeuz guekgya caeuq swcigih gaep.

(Ciengj Yiyinh Vuz Giz)