3 nyied 4 daengz 10 hauh、5 daengz 11 hauh， Aen Hoih Cunghgoz Yinzminz Cwngci Hezsangh Veiyi Gaiq Cibseiq Daengx Guek Veijyenzvei Baez Hoih Daihsam、Aen Hoih Gaiq Cibseiq Daengx Guek Yinzminz Daibyauj Daihhoih Baez Hoih Daihsam gonqlaeng youq Yinzminz Daveidangz hainduj hai. Mboengq hai “song hoih”, 2000 lai boux veijyenz Daengx Guek Cwnghez hopheux gij anbaiz baijbouh Cunghgung Cunghyangh, gaenndaet aen cungsim yinvu dangj caeuq guekgya bae guhhong, gaenxmaenx ok geiqmaeuz coengh guh hongsaeh cwngci、gak baih doxcomz caezhoz, gyonj baenz gij dungxcaiz caeuq goengrengz doihaeuj saehnieb hungmbwk hwnqguh aen guek ak、 fukhwng minzcuz miz yendaiva yiengh Cungguek. Ca mbouj geijlai 3000 boux daibyauj Daengx Guek Yinzda dawz gij vahdaengq lwgminz naeknumj de bae camgya hai hoih, dawz ndei diuzrap fapguek caeuq faplwd dingh hawj de.

3 nyied 4 hauh gvaqringz, Yinzminz Daveidangz dalijdangz daeng ronghsagsag, nauhyied raixcaix, 2154 boux veijyenz Daengx Guek Cwnghez miz 2110 boux camgya aen hoih hainduj. Bouxdaeuz dangj caeuq guekgya Siz Ginbingz、Lij Gyangz、Cau Lozci、Cai Giz、Dingh Sezsiengz、Lij Hih、Hanz Cwng daengj youq cujsizdaiz naengh, cukhoh aen hoih hai. Daengx Guek Cwnghez cujsiz Vangz Huningz coh daihhoih guh baugau, de naeuz, 2025 nienz dwg bi satbyai aen gviveh “cibseiq haj”, hix dwg bi youqgaenj haeujyamq cienzmienh gyalaeg gaijgwz. Yinzminz cwnghez yaek dingjmaenh aeu aen swhsiengj sevei cujyi miz daegsaek Cungguek seizdaih moq Siz Ginbingz bae dazyinx, cienzmienh gvancez doeksaed gij cingsaenz Cunghgung Ngeihcib Daih caeuq Ngeihcib Gaiq Ngeihcung、Samcung Cienzhoih, gvancez doeksaed gij cingsaenz gangjvah youqgaenj Siz Ginbingz cungjsuhgi youq Aen Hoih Angqhoh Cungguek Yinzminz Cwngci Hezsangh Veiyi Laebbaenz 75 Hopbi naeuz haenx, caen rap hwnj diuz rap aeu gij gezcwz baijbouh Cunghgung Cunghyangh caeuq gij iugouz guhhong yinzminz cwnghez doeksaed roengzbae、aeu gij dungxcaiz nem goengrengz lwg Cunghvaz ndaw guek rog guek doxcomz hwnjdaeuj, dingjmaenh hopheux cungqgyang、fugsaeh daihbuenz, coenghrengz guhsat aen moegbiu yinvu aen gviveh “cibseiq haj” ndei saed bae, bang saedyienh “cibhaj haj” haidaeuz ndei roengzgiek maenhdwd.

3 nyied 5 hauh banhaet, ca mbouj geijlai 3000 boux daibyauj Daengx Guek Yinzda doxcomz Yinzminz Daveidangz. Siz Ginbingz、 Lij Gyangz、Vangz Huningz、Cai Giz、Dingh Sezsiengz、Lij Hih、Hanz Cwng caeuq daihhoih cujsizdonz cwngzyenz youq cujsizdaiz naengh. Daihhoih cujsizdonz cangzvu cujsiz、caephengz cujsiz Cau Lozci naeuz Gaiq Cibseiq Daengx Guek Yinzda Baez Hoih Daihsam hainduj le, Gozvuyen cungjlij Lij Gyangz guh cwngfuj gunghcoz baugau. Lij Gyangz youq ndaw baugau naeuz, bineix dwg bi satbyai aen gviveh “cibseiq haj”. Gij moegbiu bineix dajsuenq aeu guhdaengz: Swnghcanj cungjciz ndaw guek demlai 5% baedauq; aen beijlwd diucaz duenhhong hawsingz 5.5% baedauq, hawsingz lingh miz 1200 fanh vunz doxhwnj miz hong guh; gij gyagwz gihminz siufeiq hwnjsang 2% baedauq; gihminz souhaeuj demmaj caeuq ginghci demmaj doengzyamq; gozci soucei dingx youq daihdaej doxdaengh; haeuxgwn canjliengh 1.4 fanh ik gaen baedauq; gij hauqnaengz danhvei swnghcanj cungjciz ndaw guek doekdaemq 3% baedauq, swnghdai vanzging laebdaeb bienq ndei. Lij Gyangz youq ndaw baugau dwen ok, gij yinvu ginghci ndawbiengz hwngfat bineix naek dangqmaz. Raeuz aeu dawz ndei cungdenj、 gaemmaenh gvanhgen, comz rengz ca ndei geij fuengmienh hongsaeh lajneix：Haenq- rengz coihoengh siufeiq、hawj douzswh lai raenhamq, cienzbouh gyadaih gij aeuyungh ndaw guek； ciuq saed dingh geiq hwngfat yiengh swnghcanjliz rengzmoq, gyavaiq hwnqguh aen dijhi canjyez ciuhneix；haeujlaeg saedhengz aen canloz baengh gohgyau hwng guek, gyaak hawj aen dijhi cauhmoq guekgya lai ndaej cingjdaej langh rengz; coinyoengx gij guhfap gaijgwz hungnaek gyavaiq doeksaed, engq lai hawj ginghci dijci bae ragyien gaijgwz; hwnjmbaek gyahung doiq rog hailangh, roengzrengz onjdingh vaimou vaiswh；mizyauq fuengzre vaqgej gij fungyiemj ndaw gvaengx youqgaenj, soujmaenh diuz daejsienq mbouj hawj ok yiemj baenzroix; baedrengz dawz ndei gaiq hong “sam nungz”, haeujlaeg doihaeuj guh- hoengh lajmbanj liuxliux；doihaeuj gij hawsingzvaq yienghmoq caeuq rangh- dieg doxdaengh hwngfat, gek ndei nda ndei aen gyanghoeng hwngfat; doxgap doihaeuj gij hong gyangq danq gemj uq gya heu, gyavaiq hawj ndawbiengz nem ginghci hwngfat yienghyiengh cienjbaenz saekheu; gyarengz bauj- cang caeuq gaij ndei minzseng, hawj ceihleix ndawbiengz lai raen mizyungh.(ciuq Sinhvazse)