Youq gwnz dieg gvangqlangh Liujcwngz Yen Fungsanh Cin Mbanjfungsanh Hajdoih, reih oij heu lumj aen haij, rumz baez boq daeuj, loegauau lumj raemxlangh hwnjhwnj roengzroengz, yiengjsasa mbouj dingz, lumj lwnh gij goj aen dieg neix. Denz Yenz couh dwg boux vunz ndaw goj ndeu. Boux vunz neix ndaem oij ndaej geij cib bi, ciuhvunz de lumj souj sei nei sij rim gengrengz、buekguh caeuq maqmuengh, fatsanq gij heiq hom rang.

Denz Yenz bineix 53 bi, najbyak gaenq nyaeuqnyatnyat lo, haenx dwg de ciengzseiz youq ndaw naz guh hong deng ndit dak、deng fwn rwed cauhbaenz, haenx dwg gij geiqhauh sinhoj caeuq gaenx guh. Song fwngz de cocat youh rengzrwd, moix diuz rizfwngz cungj yo miz feih namh caeuq mok oij. De couh lumj gooij maj youq reihnaz gwnz doengh neix, lauxsaed、giengiengz, caprag daengz giz laeg, sup gij yangjfwn diegdeih, coh ndit roengzrengz maj hwnjdaeuj, yungh gij fuengsik bonjfaenh sij aen saehnieb neix haeuj ndaw sei sengmingh de bae.

Denz Yenz dwg hoh duetgungz ndeu. Dauqngeix gaxgonq, gij gungzhoj de lumj duzngaeuz nei, gaen ranz vunz Denz Yenz byaij. Aen ranz youh daemq youh rwix, gwn hoj daenj hoj, saedceij gyoengqde haemzhoj raixcaix. Hoeng, gaijbienq minghhoen mbouj siujsim couh daengz, doiq Denz Yenz daeuj gangj, haenx couh dwg oij. Benq dieg neix lumjnaeuz caeuq oij miz cungj yienzfaenh he, Denz Yenz bi gvaq bi guhhong, cugciemh rox gij fuengfap ndaem oij. Daj codaeuz geij moux reih, siujsim sisi bae ganq moix gooij, daengz gyoengqde maj hung maj laux, Denz Yenz sai haujlai lwedsim caeuq raemxhanh. Ciemhciemh, oij baenz gij souhaeuj ceiq lai ranz de, gwndaenj hix hainduj bienq ndei hwnjdaeuj, daengx ranz vunz gaenx guh benq oij neix, siengjmuengh daengzcog gvaqngoenz ndei, youq gwnz roen duetgungz byaij baenaj maenhdwd.

Seizgan daeuj daengz 2024 nienz, bi neix doiq Denz Yenz daeuj gangj, youh dwg giz hwnjdin moq ndeu. Ndaej daengz Liujcwngz Yen cwngfuj lwnhgangj dazyinx “saehnieb diemzvan”, Liujcwngz Nungzsangh Yinzhangz haeujcoengh ciqcienz “cienz diemzvan”, de ciqcienz 10 fanh maenz gietdingh yungh daeuj gyalai ndaem oij. 10 fanh maenz neix, lumj ciengz fwn gibseiz ndeu, nyinhdingh gij maqmuengh ndaw sim de. Miz cienz daeuj bang le, Denz Yenz mbouj miz saek di yaemhywx cigsoh vuenh ceh’oij moq——05136, de rox gij oij moq ngamq yenzgiu okdaeuj haenx, ndaej dingj laemx, hamz dangz lai, de caiq lai ndaem 36 moux oij. Geizgonq genj miuz、 ndaem, geiz laeng rwedraemx、 dwk bwnh、 fuengz non, moix yamq cungj dwg de caenfwngz bae guh, mbouj gamj cuengqsoeng saek di. De couh lumj bouxciengq cijveih cien bing fanh max, youq gwnz cancangz ciensim maeuzsuenq, saeqsim baijbouh, cij vih hawj moix gooij cungj majhung hwnjdaeuj, hawj ranz vunz ndaej gvaq ndwenngoenz ndei.

Seizhah, ndit ndat yaek dai. Denz Yenz daenj aen mauhmbinj ndeu, ndonj haeuj ndaw doengh oij, cazyawj gooij maj ndaej baenzlawz yiengh. Mbaw oij youq ndaw rumz iq menhmenh biufefe, fatok gij sing yiengjsasa, lumj angqcoux de daeuj daengz. De sijsaeq cazyawj mbaw oij, yawj dwg mbouj dwg miz gij riz bingh non, aeu fwngz menhmenh lumh gij ganj oij, gamjsouh maj ndaej baenzlawz yiengh. Hanh dumz geu buh de caez, swnh gemj de mbouj dingz lae roengz, hoeng ndaw lwgda de cij dwg gvansim gooij. Doiq de daeuj gangj, doengh gij oij neix mboujdan dwg gomiuz, engq dwg gij maqmuengh de、gij siengjmuengh de, de baengh gij oij neix gvaq saedceij gyaeundei.

Yamqdin seizcou cugciemh daeuj gyawj, nazoij coux daeuj le aen geiqciet ceiq gyaeundei de. Gooij maj ndaej loegsausau, youh sang youh hung, lumj baenz baiz baenz baiz bing ciepsouh cazyawj. Mbaw oij youq laj daengngoenz ronghsagsag, rumz cififi, fatok gij sing haeuj rwz ndeidingq haenx, lumjnaeuz ciengq souj go daeuj hoh fungsou nei. Denz Yenz yawj benq oij neix, ndaw sim vuenheij caeuq miznaj dangqmaz. Bineix, de ndaem 70 lai moux oij, yaek baenz cienz 22 fanh maenz, neix dwg diegdeih hoizbauq gij sinhoj gaenxguh de, hix cingqmingz de lai bi daeuj soujmaenh le aen saehnieb ndaem oij neix.

2024 nienz 12 nyied 13 hauh, gou caeuq boux gicej Gvangjsih Minzcuz Bause bae caijfangj Denz Yenz seiz, de cingq caeuq gyoengq minzgungh nyaengq raemj oij ne. Dou raen de hanh lae hanh conh, de hix mbouj guenj baenzlai lijdwg nyaengqnyatnyat, ndaw sim gou gingqfug cingsaenz mbouj lau gwnhoj de dangqmaz, vih de ndaem oij baenz soulai caemhcaiq diemzsubsub hemq ndei.

Gij goj Denz Yenz, cij dwg aen sukingj guenj ndaem reih oij Fungsanh Cin ndeu. Youq benq diegdeih neix, lij miz haujlai bouxguhnaz lumj de nei, baengh song fwngz swhgeij gaenxguh caeuq ndiepgyaez diegdeih, youq diuz roen ndaem oij neix roengzrengz bae guh. Gyoengqde gungzhoj gvaq, gwndaenj haemzhoj hawj gyoengqde diemheiq mbouj ndaej. Hoeng caijsoq ndei dwg gyoengqde seng youq aen seizdaih miz gihvei caeuq gvansim lai ndeu. Liujcwngz cwngfuj gig yawjnaek caeuq haenqrengz senhconz dazyinx “saehnieb diemzvan”, bang gyoengq bouxguhnaz ceijmingz le fuengyiengq, hawj gyoengqde yawjraen le gij rengzndumj hungloet canjnieb ndoj youq baihlaeng. Caiqlij Liujcwngz Nungzsangh Yinzhangz okdaiz haujlai ginhyungz cihciz cwngcwz, cix lumj bang gyoengqde cap gaiq fwed ndeu nei, hawj gyoengqde ndaej gyalai swnghcanj、 gaijndei gwndaenj.

Gyoengq hoh dajndaem neix, miz mbangj dwg ngamqngamq byaij hwnj diuz roen ndaem oij, doiq daengzcog siengjmuengh ndaw sim mbouj onj, youq baihlaj bouxlaux daiqlingx caeuq yinzhangz cihciz, siujsim riri ndaem buek oij daih’it; miz mbangj cix dwg lumj Denz Yenz nei, youq gwnz benq reihnaz neix ndaem lai bi lo, baengh gij gingniemh fungfouq caeuq gij rengznyangq maenh’ak, mboujduenh lai ndaem, baenz le dangdieg ranz baengh dajndaem mizmingz ndeu. Gyoengqde yienznaeuz mbouj caemh ranz, beigingj hix mbouj doxdoengz, hoeng gyoengqde cungj miz aen saenfaenh doxdoengz ndeu —— bouxguhnaz; cungj miz aen loqsiengj caezcaemh ndeu —— doenggvaq bonjfaenh roengzrengz, hawj vunz ndaw ranz gvaqngoenz vuenyungz, hawj benq reihnaz neix fatok gij senggei caeuq rengzhoengh engqgya hoenghhwd.

Youq gwnz doengh reihnaz gig miz maqmuengh neix, ndaem oij mboujdan dwg hangh hozdung guh nungzyez swnghcanj, engq dwg cungj ciepswnj caeuq cingzgamj ndeu. De cingqmingz le daih dem daih nungzminz sinhoj gaenxguh mbouj dingz, hix miz gij siengjmuengh caeuq gyaepgouz saedceij gyaeundei gyoengqde.

Liujcwngz Nungzsangh Yinzhangz vanzlij cizgiz camgya saehnieb hwngfat minzcuz doxgiet baenaj. Youq benq diegdeih lai aen minzcuz comzyouq neix, gyoengqde rox minzcuz doxgiet dwg gij ringiek ginghci hwngfat、 sevei onjdingh. Doenggvaq cihciz ndaem oij, bang gak minzcuz bouxguhnaz daezhawj gij ginhyungz fuzvu gihvei bingzdaengj, bang gyoengqde doengzcaez byaij hwnj diuz loh baenzfouq, coicaenh le gak minzcuz doxgyau、 doxgap caeuq doxgiet.

Youq gyang naz oij, gak minzcuz bouxguhnaz doxhag、 doxbang, doengzcaez faenyiengj gij sim- angq fungsou caeuq gij saedceij doxndei haenx, cauxbaenz le fuk dozveh gyaeundei minzcuz doxgiet huzndei caemhyouq.

Ndwn youq henz reih oij, lwgda Denz Yenz raen ndei fouzbeij. De rox benq oij neix guhcingq le gij saedceij vuenyungz de caeuq vunz ndaw ranz, hix guhcingq le gij saeh gig mbouj bingzciengz caeuq loqsiengj diegdeih neix. De hix yaek laebdaeb baengh song fwngz swhgeij, cae ndai aen saehnieb gvangqlangh caeuq vandiemz neix, hawj faenh dieg van neix youq ndaw dah raez lae bae mbouj dingz, bang benq diegdeih neix demgya engq lai senggei caeuq rengzhoengh, bang gyoengqvunz daiq vuenyungz caeuq maqmuengh daeuj engq lai.