Gaenh geij bi daeuj, Dwngzyen yungh “feihyiz +” doidoengh hong minzcuz doxgiet baenaj, hawj gak minzcuz doenggvaq samgyau couqmaenh gij eiqsik caezcaemh Cunghvaz Minzcuz. Seizneix, Dwngz- yen miz feihyiz hanghmoeg 67 hangh, ndawde guekgya gaep hangh ndeu, swcigih gaep 8 hangh, si gaep 20 hangh, yienh gaep 38 hangh, cwgoemq daengx yienh 17 aen yanghcin.

Gyalaeg dijhi “feihyiz + gyauyuz”, cuknet gij giekdaej cienzciep. Cizgiz doidoengh feihyiz cienzciep hwngfat, cuknet gij giekdaej gak cuz ginzcung vwnzva gagsaenq. It dwg doidoengh feihyiz haeuj hagdangz, nab gij hanghmoeg feihyiz lungzsae vwnzva、 heiq daengj haeuj gocwngz hagdangz, saedyienh daengx yienh cunghyoz siujyoz “feihyiz vwnzva haeuj hagdangz” 100% cwgoemq, gyagiengz bouxcoz nyezrauh vwnzva nyinhdoengz; ngeih dwg giengzvaq gungganq vunzcaiz, doenggvaq banyenzsiuh bouxcienzciep feihyiz、 hagdangz giyez lienzhab beizyangj daengj vunqsik, gyahung aen duivuj vunzcaiz feihyiz, seizneix daengx yienh bouxcienzciep feihyiz miz 156 vunz. Daezsang gij eiqsik cienzciep caeuq baujhoh feihyiz vwnzva gak cuz bouxcoz nyezrauh.

Gya’gvangq lienh “feihyiz + canjnieb”, coicaenh caezcaemh fouqmiz. Gij dinfwngz feihyiz mboujdan dwg vwnzva cienzciep, engq dwg gunghcwngz minzswngh, doenggvaq cauhmoq yungzhab hwngfat coenghrengz lajmbanj saenqhwng. It dwg gij doxgaiq feihyiz canjyezva, doidoengh faenj doengzsim、 bingjhaeux Daibingz、 dajcang lungzsae daengj feihyiz dinfwngz caeuq canjnieb yungzhab, cauxbaenz diuz lienh canjnieb miz daegsaek, coenghrengz gak cuz ginzcung demsou; ngeih dwg vwnzva lijyouz yungzhab cauhmoq, guh lungzsae doxdax daengj hozdung seiz caez guh ciet gijgwn ndei、 vwnzva lijyouz daejniemh, dajcauh aen binjbaiz “vwnzva lijyouz yungzhab + gak minzcuz samgyau”, doidoengh lijyouz coicaenh gak minzcuz samgyau giva lai hwngfat, daezswng gij ginghci gyaciz feihyiz.

Dajcauh binjbaiz “feihyiz + hozdung”, daphwnq gyauhliuz bingz- daiz. Yungh gak cuz ginzcung sihgiuz guh dazyinx, cizgiz daphwnq bingzdaiz vwnzva gyauhliuz baedauq, yungh vwnzva cimqnyinh bae coicaenh minzcuz doxgiet. It dwg doxdax coicaenh doxyungz, guh Cungguek lungzsae goenghai doxdax、 Cungguek —— Dunghmungz gozci ruzlungz doxdax daengj doxdax hung, supyinx gak cuz ginzcung doengzciengz doxdax、 caemh yawj vwnzva, Dwngzyen 2024 nienz ndaej bingz “aen yienh nienzdoh ceiq miz dijyuz daegsaek”; ngeih dwg ciengzseiz guh minzsug hozdung, cizgiz guh lungzsae hoh cieng cunzyouz、 Dwngzyen caet nyied caet、 Dwngzyen heiq niuzgoh canjyienj daengj hozdung, moix bi bingzyaenz guh hozdung daihgaiq 100 ciengz, gyagiengz gak cuz ginzcung nyinhdoengz Cunghvaz vwnzva, coicaenh gak cuz ginzcung samgyau.

Cauhmoq vunqsik “feihyiz + bujfaz”, coenghrengz gihcwngz ceih- leix. Damqra loh moq feihyiz caeuq fapceih vwnzva hwnqguh yungzhab hwngfat. It dwg neiyungz heiq cauhmoq bujfaz, baengh ginzcung gyaez heiq niuzgoh naekna, hawj heiq niuzgoh caeuq minzfazdenj、 fap baujcang gienzik bouxlaux daengj giethab, yungh vah dangdieg lwnh faplwd cihsiz, gyagiengz gij eiqsik fapceih gak cuz ginzcung； ngeih dwg minzsug hozdung yienhciengz bujfaz, Dwngzyen Daibingz Cin aeu bouqdiemq iq bujfaz “cauzbaiz” —— “fap” gau miz daegsaek haenx haeuj caet nyied caet hozdung yienhciengz bae, bang gak cuz ginzcung bouj gij naengzliengh “fapceih”, daezswng gak cuz ginzcung roxnyinh ancienz、roxnyinh vuenyungz.

（Moz Swgyauj/莫世佼）