第 十 一 期

原文: 爆竹声中一岁除，春风送暖入屠苏。 千门万户曈曈日，总把新桃换旧符。 ——宋代·王安石《元日》

Sungciuz·Vangz Anhsiz《Ndwencieng Coit》

译文：

1

Bauqrengh hongz gok cawz bigaeuq,

Rumzcin ci raeuj duzsuh rang.

Cien ranz fanh hoh ronghmyanmyan,

Dauzfuz dou ranz gaeuq vuenh moq.

（南宁市青秀区：莫锡新/Moz Sizsinh）

2

Youq ndaw sing bauq hongz de, bi gaeuq gaenq gvaqbae lo, rumz raeuj boq daeuj, gyoengqvunz youq laj nditndat sim hai angqyangz ndoet laeuj duzsuh. Daengngoenz swng hwnj ciuq rongh cien gya fanh hoh, daihgya cungj nyaengq dawz mbaw fouz gaeuq ok, vuenh hwnj mbaw fouzdauz moq.

(西林县：黄玉梅/Vangz Yimeiz）

3

Bauq hongz bibwng bi gaeuq gvaq,

Rumzcin raqraq raeujremrem；

Bouxlaux lwgnyez lumj ceiz nem,

Comz caem duzsuh gingq bimoq.

Ndit ciuq lajdeih raeujrubrub,

Bouxgeq nyaengq duk faengx dumq gwn；

Lwgnyez angq lumj roeg gwnz mbwn,

Bouxcoz muengz nem doiq gwnz dou.

(平果市：黄秀碧/Vangz Siubiz)

4

Bauqrengh bwngbwng baengbaeng yiengj, bi he gvaqbae lo, bimoq daeuj daengz le, vunzlai angqangq yangzyangz gwn laeuj duzsuh. Gyanghaet daengngoenz ciuq daengz mbanjranz, vunzmbanj cungj muengz aeu gij monzsaenz gaeuq roengzdaeuj, nem hwnj gij monzsaenz moq.

（西林县：韦海健/Veiz Haijgen）

5

Ndwencieng ngoenz coit, youq ndaw sing bauqrengh “bibi baba”, gyoengqvunz laux nyaeq angqfwngfwng biekbae bigaeuq, angqcoux bimoq. Rumzcin raeujrubrub nyignaj ci daeuj, gyoengq- vunz bouxboux naj riunyumnyum, langhdungx boi dem boi nyaemh ndoet gij laeuj duzsuh.

Aen daengngoenz daj baihdoeng ngamq swng hwnjdaeuj hoengzdoengdoeng、ndongqmyanmyan、ronghsagsag, gij ndit raeujrubrub, ciuqdoh gya’gya hohhoh. Gyoengqvunz cingq nyaengq sik gij monzsaenz caeuq mbaw ceijfouz gaeuq bi’gvaq gwnz dou, cienzbouh vuenh hwnj monzsaenz moq caeuq mbaw ceijfouz moq.

（平果市：谭喜花/Danz Hijvah）

6

Cuengqbauq roebroeb caiq gvaq bi,

Rumzcin ci raeuj haeuj laeujcieng；

Daengngoenz ngamq hwnj ciuq gwnzbiengz,

Cungj riengz laeh gaeuq venj fouz moq.

（南宁市武鸣区：黄淑然/Vangz Suhyenz）

7

Ndawsing lwgbauq youh gvaq bi,

Rumzcin ci raeuj ndoet duzsuh；

Cien gya fanh hoh daengngoenz ndongq,

Cungj aeu fouz moq vuenh fouz gaeuq.

（宾阳县：凌少华/Lingz Sauvaz）

(3)