Gwn caeuz gvaq daengz haeujninz gaxgonq duenh seizgan neix hawj vunz cwxcaih: Youzbyaij、diuq foux、ciengq go、dwk giuz daengj, siengj baenzlawz guh’angq couh baenzlawz guh, ndaejnaeuz duenh seizgan neix dwg “vangzgim seizgan”.

Hoeng, de mbouj miz “vangzgim seizgan” cungj gangjfap neix. De dwg bouxguenjroen, gyangngoenz dawz gvak gaem canj, dak ndit rwed fwn, youq gwnz loh coih roen, gwnrengz dangqmaz. Gyanghaemh de mbouj maij okdou, youq ranz ngonz densi, doiq de daeuj gangj dwg gij yiengjsouh ceiq daih de, hoeng, di yiengjsouh genjdanh neix de lij vut bae.

Moix haemh gwn caeuz gvaq le, ciepdwk guh hong roix caw. Gij caw haenx miz hung miz iq, iq lumj naed haeuxfiengj、naed haeuxsan、naed duhheu, hung lumj naed duhhenj、naed duhnamh, aeu cim daeuj roix, siuq youq gwnz haiz roxnaeuz gwnz buh, gouh haiz cuengz buh caengz guhbaenz haenx, gaenq siuq baenz gak cungj dozanq. Cungj hong neix cienzhong noix, dwg gyoengq yahgeq dawz daeuj gaijmbwq ndwi, bouxcoz yawj mbouj hwnj cungj soujgoeng neix.

Aen congz seiq fueng iq ndeu, gwnzde bu mbaw baengzndaij ndeu, neix dwg fuengz naed caw ringx bae. Gak cungj caw baenz gong doi youq gwnz congz, gak cungj saek mae venj youq bien congz, geij fag cim mbouj doengz haenx caixngwg baek youq gwnz baengzndaij. De fwngzgvaz dawz cim, fwngzswix gaem baengz, cim coh gong caw “ciu” bongh bae, mbouj cijdingh con naed lawz, lumjbaenz luenh daeu luenh canj nei, bakcim loq yaengx doxhwnj. Canj baez nduj ndaej song naed, fagcim daengjhwnj, song naed haenx gyod gvaq rwzcim, camhseiz deng anbaiz gaenjmae youq giz liz rwzcim ceiq gaenh haenx; gaenriengz canj baez daihngeih，hoengq； baez daihsam canj ndaej naed ndeu······Roix gaeuq naed soq le couh siuq youq gwnz baengz. Fagcim baez canj baez daengj, din fwngz de riengjret. Roix naed caw iq dwg yienghneix canj, roix naed hung cix baenz naed roix aeu, mboujguenj canj aeu roxnaeuz roix aeu, de cungj dwg da raeh fwngz riengj.

Hoeng, caih mwngz din fwngz baenzlawz vaiq, lingz diemj cung gaxgonq ceiq lai guh ndaej 15 maenz, couh dwg ngaenz gaen nohmou he. Cungj soujgoeng neix dwg hong geiq gienh, guh lai ndaej lai. Hoeng, caih mwngz baenzlawz gaenx guh, hix mbouj ndaej baenz bouxmiz, de rox aen dauhleix neix. Hoeng, de mbouj yiemz mbouj vut, genhciz guh le sam bi, cawz ndeu cungj mbouj nguh, yienghneix baeg da baeg fwngz, gyanghwnz, da gaemh, fagcim mbouj ei coi, coeg deng fwngz, ok lwed, in raixcaix, cix youq ndaw bak hoemq mbat ndeu, mizseiz lienz hoemq cungj mbouj hoemq dem, cix laebdaeb roix.

Seizhoengq de cungj maeuq youq ranz, mbouj bae gapvunz, aen gien swnghhoz de iq ndaej cij miz aen ranz de. Haemhhaenx, hujgeiq daeuj cunz ranz, heuh de bae youzbyaij, de naeuz banngoenz guhhong baeg lai, banhaemh youq ranz yietnaiq. Hujgeiq hemq:“Mwngz neix dwg yietnaiq ha? Gaenxguh lumj maez nei.” De riuhihi naeuz:“Youqndwi goj mbwq, guh di soujgoeng gaij mbwq.”

De maij dingq “ciu ciu” cungj sing roix caw neix, laihnaeuz sing neix ndei dingq lumj sing go bouxsien nei, baez siuq ndaej aen dozanq ndeu, de sim’angq raixcaix, maz nyapnyuk cungj lumz bae lo. De maz cungj habsim, couh dwg naj miz di fonx, miz di raizlaej, neix dwg dak ndit cauhbaenz. Vihneix daeggvan seiz mbouj seiz naeuz de dwg yah Feihcouh, seiz mbouj seiz gangjriu naeuz de lumj vunz Feihcouh. De mbouj hozndat, miz maz baenz hozndat ni? Youh mbouj dwg de maij baenz yienghneix. De nyapnyuk dwg daeggvan vihneix cix damh de.

Gizsaed, gij raizlaej neix mbouj itdingh dwg dak ndit ngaiz, aiqdwg swnghhoz yazliz cauhbaenz. De camgya gunghcoz cib bi cij gezvwnh, cib bi haenx, naj de mbouj miz raizlaej, yienznaeuz naj mbouj suenq hau, hoeng, hix dwg boux byauhcunj vunz naenghenj ndeu. Caeuq daeggvan gezvwnh mbouj geij bi, aen gunghcangj daeggvan couh doemq lo, de cijnaengz guh honglingz ciengx aenbak de. Seizhaenx, vunzranz laux iq haj boux, lij ndei, de miz faenh souhaeuj onjdingh ndeu, yienznaeuz mbouj suenq lai, ciengx ranz cengqgengz gvaq ndaej bae, mboujgvaq, ndwenngoenz miz di gaenj. Daj seizhaenx hwnj, saeknaj de yied daeuj yied amq, lij hwnj raizlaej dem, byoemhau hix okdaeuj lo.

Geiqndaej baez gwn daizlaeuj ndeu, bouxsai caemh congz naengh youq doiqnaj de haenx, mbouj doxsug, hoeng, ndaek neix cungj cim de, cim dwk de miz di mbouj cwxcaih, ndigah de fanjganj ndaek sai neix.

“Daj gij saeknaj、byoem、saenzcingz mehmbwk couh rox gij ndwenngoenz de gvaq ndaej ndei mbouj ndei.” Ndaeksai naeuz. Geiq mboujndaej seizhaenx dwg maz vahdaez hawj ndaek neix fwt gangj coenz vah neix, gangj coenz vah neix seiz, ndaek neix cungj cim de.

“Ndaek dwgcaengz neix, laxlawz dwg yawj ronz gij ndwenngoenz gou!” De engq fanjganj ndaek sai neix. Hoeng, coenz vah de hableix. De itcig geiqndaej coenz vah neix.

Ndigah, danghnaeuz daeggvan mwngz roxyiuj, wnggai gag singj swhgeij mbouj miz leixyouz damh gou. De ciengzseiz baenzneix naemj. Hoeng, bouxsai lajbiengz cungj dwg yienghneix, mwngz dawz de baenzlawz guh? De cijnaengz gag nyapnyuk. Vihliux hawj aennaj hauseuq, de yungh gvaq haujlai doxgaiq: Sijmennaij duet naengqdai, nu dwk song gemj youh manh youh in; aeu diengzrwi ndau hauxgyaeq daeuj daz naj; aeu raemx swiq haeuxsan ndau、 cijvaiz daeuj swiq naj daengj, yungh gvaq lai cungj fuengfap daeuj cawqceq aennaj, hoeng cungj mbouj miz yauq.

Engq hawj de nyapnyuk dwg daeggvan simgeng neix, daj de bae bouq gai gyadienh bang lauxbanj gai huq le, sihfuz gya lingjdai baenz siengq baenz yiengh, engq ndaengmoj dem. Seizgan hwnjban de

dwg 9:00~21:00, hoeng, de ciengzseiz 0:00 cij haeujranz. Baez haeujdou swiqndang gvaq le, muengz hwnj mbonq, gyaeuj bungz swiz couh gyaenfofo, mbouj lai rah de saek da.

Song bouxgeq gaenq gvaqseiq, lwgnyez youq rog doegsaw. Aenranz sam fuengz song ding neix cijmiz gvanbaz de youq, song boux caemh ranz, de souh mbouj ndaej cungj damh neix. De gietdingh nengh sim daeggvan dauq.

Ceiqgaenh, dahlwg hujgeiq hai aen bouq canggyaeu meijyungz iq ndeu, gizde ndaej hawj mwngz naj haumaeq, hawj mwngz bienq gyaeu, lij naeuz bouxguenjroen bae ndaej dajciet, daj caetciet. Dahlwg neix cang daxmeh de ndaej naj haumaeq lumj vadauz nei. Daxmeh neix ngoenz- ngoenz saenqsim cibcuk okdou. Mwngz rox lwi, cib bi gaxgonq, daxmeh neix aenvih naj fonx naj raizlaej deng daeggvan yiemz, lij deng vutgveng dem. Baenzlai bi daeuj, mehlwg doxing doxbaengh gvaq saedceij. Daj seizhaenx hwnj, dahlwg daen naeuz cog hung le aeu guh canghcanggyaeu, hawj gyoengq daxmeh lajbiengz cangnaj, hawj gyoengqde bouxboux gyaeundei.

Haujlai vunz bae gizde canggyaeu, dauqdaeuj haenh yaugoj ndei raixcaix, daegbied dwg gij yaugoj siuraiz demhau gig ndei. Yawj gyoengq hujgeiq bienq gyaeu bienq nomj, ndaw sim de roxnyinh miz muengh.

Guh baez ndeu 4000 maenz, boux “mbaeu” cij aeu guh baez ndeu couh raen yaugoj lo, boux “naek” aeu song sam baez cij miz yaugoj, gaenriengz dwg gak cungj baujyangj. Danghnaeuz yungh cienz ndaej hawj naj haumaeq, maihcaiq saej bae fanh song fanh de hix raen dij.

Hojsik, daehngaenz de beb lai. Lij ndei, miz gak cungj soujgoeng ndaej dawz dauq ranz guh, de gaemdai “diuzroen fatcaiz” neix, ganj cawz guh, sing “ciu ciu” roix caw hawj de dwgmaez, angq youq ndawde, couh lumz baez gij nyapnyuk gwnz ndang.

Gizsaed, fanh baj song fanh maenz de dawz ndaej ok fwngz, hoeng, de mbaetyungh gvenq lo, moix faen ngaenz cungj aeu yungh youq “bakcax”, gij cienz goj saej goj mbouj saej haenx, de sij mbouj ndaej ok fwngz.

Haemhhaenx 0:00, de ngamq swiqndang sat, daeggvan haeuj ranz daeuj. “Bang gou cat laeujyw.” De naeuz. Hoeng daeggvan mbouj dap de. De miz genhcouhyenz，dienheiq baez bienqvaq mbaq couh inyumyum, gag cat yw hix ndaej, mboujgvaq miz vunz bang cat caemh engq cwxcaih, mwhgonq daeggvan ndaej bang de cat gvaq.

Daeggvan mbouj oksing, mbouj rox dwg caen dingq mbouj nyi roxnaeuz gyaj dingq mbouj nyi, de hix gik heuh baez moq, seizneix sim de lumj deng doxgaiq naek haenqrengz dub mbat ndeu, in ha! De cijndaej gag cat yw.

Ngoenz daihngeih, de byaij haeuj bouqcanggyaeu meijyungz bae. Caen dahraix, gizneix ndaej hawj vunz bienq nomj. Aen liuzcwngz ndeu roengzdaeuj, saek raizlaej bienq oiq lo. Song aen liuzcwngz roengzdaeuj, raizlaej siubae liux lo, aennaj hauseuq. De yawj ndaw gingq swhgeij, yied ngonz yied simhai. Vahsug naeuz “najhau gaij ndaej couj”, gizsaed de mbouj couj, yienghsiengq ndeiyawj, raizlaej siusat le, de nomj dauq cib bi. “Gou wnggai caeux di doiq swhgeij ndei di.” De gag naeuz.

Daj seizhaenx hwnj, de saenqsim cibcuk, haethaet dawz gij sairiu ronghsag ciepcoux daengngoenz ngamq hwnj haenx. Banhaemh, de cujdung ciu hujgeiq bae youzbyaij、gwn caz、 ciengq go. Couhmoz, de ciu gyoengq hujgeiq haici bae seiqhenz yienhsingz youz, ingjsiengq guh’angq. De mbouj caiq doi gij hoihcomz doengzhag、baengzyoux. Daeggvan damh de lai bi haenx, de gik dapleix.

Hoeng geizheih lai lo, daeggvan gaenx dauq ranz lo, caemh dauq ndaej caeux, vah hix lai lo. De dauq yiemz dem. Banhaemh, baez yaek okdou, daeggvan cungj cam bae gyawz、 caeuq byawz, dauq ranz mbouj raen yah youq ranz hix denva yienghneix cam. Moix baez, de cungj dwg laekgaek naeuz: “Bak lai, nyaphoz!” Aenbak gyajcang hozndat, ndawsim cix riunyumj!

Roix caw de lij guh, mboujgvaq mbouj lumj mwhgonq baenzneix buekmingh lo.

Caeuzyah ha caeuzyah, aeu doiq swhgeij ndei di!