Lij Danenz naeuz:“Mienhciengz gvethoi ndei le, daz song baez caet goemq hwnj mienhciengz, hoi hix mbouj lau fwn buet lo.”

Laujuj fanj buek：“Hoi mbouj nem youq gwnz ciengz， aeu caet goemq hwnjbae, mwngz naeuz hawj gou nyi, ciengz hau neix yungh ndaej geijlai bi?”

Lij Danenz ngoemxngwd.

Laujuj aeu fwngz bae gaeu mienhciengz geij giz, gig byoiq, de seizbienh dawz di ceijna cat bae cat dauq, mba hau faenfaen doek roengzdaeuj, de gyangznaek, ngauz- ngauz gyaeuj, dawz soujgih okdaeuj dwk denva, cam vihmaz dwg cungj cingzgvang neix. Doiqfueng naeuz dwg nizswjfwnj daih yaez lai.

Laujuj dingz denva, doiq daihgya naeuz:“Sou sikhaek conx gij hoi ciengz hau roengzdaeuj caez bae, gij lw haenx aeu sauqbaet sauq seuqseuq bae.”

Laujuj caen lumj vuengzdaeq, cibcuk vuengzmbwk “Vujcwzdenh!”Vangz Gencingh yawj de vunz sang hix mbouj gig sang, aenvih ndang iq raen sang, lumj diuz faexgoenq ndeu, hwnj sang le hwet miz di goz. hix mbouj dwg goz, Vangz Gencingh caen siengj daezsingj de, vuengzmbwk ha, mwngz seizneix ngiengx gyaeuj couh ndeiyawj lo, vunz ndang loz hix ndeiyawj, daengxcungq yawj hwnjbae seuqsaw sienhsoh, cungj vunz neix lauxsaed bonjfaenh, hoeng banhsaeh miz di ngaizbanj. Naj Laujuj najmax, naengbak iq, bwnda na, lwgda lumj da yiuh. Vangz Gencingh naemj daengz raennaj ngoenz daih’it Laujuj mbouj baenzneix yak ha, vunz daih fukcab lo!

Lij Danenz lumj giuz laeuhheiq bejbyadbyad, maqmuengh henzndang miz aen congh ndeu sikhaek ndonj haeujbae!

Cinz lauxbanj naeuz:“Gvaq cibhaj doengh bae yawj.”

Daihgya naengh dendih roengzdaeuj gvaq cibhaj doengh bae, Laujuj naenx dendih hwnj cib laeuz bae, de cigsoh bae yawj seiq aen ranz conghcueng song henz, youh byaij roengz gouj laeuz bae, yawj caez haeuj dendih, Cinz lauxbanj caeuq Vangz Gencingh hix gaenriengz roengz roek laeuz, yawj caez youh yawj mienhciengz veiswnghgenh, raen ciengz dumz hoi mbouj bok roengzdaeuj, de aeu ribfwngz bae gaeu ciengz dumz haenx, gig geng. Vangz Gencingh siengj naeuz, mwngz dwg Vujcwzdenh ce ribfwngz conq ndeu raez couh gvat hoiciengz okdaeuj. Hoeng Vangz Gencingh mbouj gamj ok sing, Laujuj youh ra ceijna daeuj nyaenj baenz ndaek ndeu okrengz bae cat ciengz, cat mbouj ok mba, giz cat ce miz di riz uq, Vangz Gencingh riu naeuz:“Baugau vuengzdaeq, ciengzhoi neix gou aeu gihgai dajmozgih cij cat ndaej doengh.”(17)