Mboengqneix, Gvangjsih gaenq douzroengz buek cienzngaenz daezgonq guh giekdaej sezsih laeng ndaw yawhsuenq Cunghyangh bi 2025 gungh 29.12 ik maenz ngaenz. Neix caeuq yiengh caiqguek daegbied seizgan gig nanz、gijcaiq cwngfuj cienhangh doxciep, daemxcengj hwnqguh gij canloz hungnaek guekgya、nungz linz suijli、hwnqguh hawsingz daengj, gaenxmaenx doinyoengx gyalai douzngaenz dinghmaenh swhcanj caeuq giekdaej sezsih, caenhrengz henndei caeuq gaijndei gwndaenj beksingq.

Ndawde, dietloh cienhangh 10 ik maenz, coenghrengz guh diuz roen moq baihsae doeng haij; suijli cienhangh 6.83 ik maenz, cw daengz gyamaenh coih doengh aen raengzromraemx cungh siujhingz gih raeuz; gij lwt lajdeih ndaw hawsingz cienhangh 6.46 ik maenz, hwnq ndei、vuenh ndei buek lwt bae fuengzre raemxrongz、hai raemx dumh; aen dijhi fugsaeh veiswngh yw bingh youh ndei youh vaiq cienhangh 2 ik maenz, guh ndei gunghcwngz hwnq yihyen; saenqhwng lajmbanj cienhangh(aeu guhhong dingj gouqhaen) 2.25 ik maenz, cihciz guh roen、mieng、canjnieb dieggiek daengj hanghmoeg; henhoh coih ndei swnghdai cienhangh 1.58 ik maenz, haeujcoengh gij gunghcwngz gamcaek feiz coemh ndoengfaex、gij hanghmoeg gyoebhab fuengzceih raemx namh Dahraemxhoengz riuzsaet caeuq deihnamh bienq deihrin.

(faenzcieng daj 《Gvangjsih Yiz Bau》senj aeu)