Cunghvaz vwnzmingz haj cien nienz,

Ciuhgeq riuzcienz daengz ngoenzneix;

Sibsug daegdiemj ceiq hableix,

Byaij daengz ngoenzneix lij saedhengz.

Gingj ndei heiq raeuj rim gwnzbiengz,

Singz mbanj gvaq cieng caen cix hoengh;

Gizgiz cih “fuk” diep baenz boengj(baiz),

Rumzcin ci doengh diegdieg heu.

Vadauz vamaenj cingq angj hai,

Gwnzhaw lajgai saeceij foux;

Gyong nyenz dauqcawq yiengj hwnjdaeuj,

Doengzcaez angqcoux ngoenzciet daengz.

Gya’gya hohhoh vunz habyuenz(团圆),

Vah ndei vah nuenz(gitsiengz) miz cien fanh;

Goenghoh bouxlaux ndangdaej cangq,

Daengx ranz sim’angq gvaq ndwenngoenz.

Bae ranz caencik doengz hohfuk,

Rengz ak lumj guk gwn cieng moq;

Bet fueng cienzcaiz daeujfofo,

Vut bae ngoenzhoj gvaq ngoenzndei.

Cungguek cih “fuk” venj youq gwnz,

Cunghvaz hoenghmwn youq seiqgyaiq;

Cukhoh guekcoj engq giengzdaih,

Biengzdeih seiq baih va hai hoengz.

Ndei nungz cwngcwz rumzcin daeuj,

Lajmbanj mbwn raeuj gizgiz mwn;

Boux guh reihnaz lai miz gwn,

Bouxboux riunyumj ngaenz rim daeh.

Byajraez seizcin doengh diendeih,

Gwnzbiengz fanh saeh cingq haidaeuz;

Lajmbanj ndawsingz yienghsiengq gyaeu,

Mienhmauh dieg raeuz ngoenzngoenz moq.

Hwnj miz ranzlaeuz youh ranzcien,

Hoengqheiq singjsien ceiq hab vunz;

Najranz raemx lae singsing yunz(ndei dingq),

Bo baq bungz cwn(cin) faex va hoengh.

Raemxloeg byaheu dwg gimngaenz,

Dauzyenz guh baenz youq ndaw mbanj;

Roeg heuh va rang cingsaenz sangj,

Saenzsien hix angq gvaqdaeuj cunz.

Yamq haeuj siujgangh bongh baenaj,

Bouxboux siusaj daenj mingzbaiz;

Ngoenz youq ranzlaeuz miz ci hai,

Byaij doh sigai(seiqgyaiq) hix fungh-

gvangh(vifung).

Gomiuz miz raemx cix majsang,

Saehnieb miz dangj cix giengzdaih;

Gyoengqraeuz naek sim riengz de byaij,

Cien bi fanh daih cungj vuenyungz.

Dwg dangj hai daeuj mboqraemxdiengz(dangz),

Daiqlingx daengx biengz bongh baenaj;

Guekgya fouqmiz raeuz rengz yax(hung),

Gwnzgwnz lajlaj gvaq ciet ndei.

Bineix gwn cieng gig siusaj,

Biengzdeih gwnzlaj angqfaengfaeng;

Ciengnyied cibngux youh daeuj daengz,

Guhlumj aendaeng gya youz rongh.

Ciengnyied cibngux angq dangqmaz,

Roq gyong ndaek laz yiengj mungqmangx;

Foux hwnj duzlungz raezrangrang,

Sing riu sing angq cienz seiq fueng.

Daeng’va ronghlwenq hoengzlili,

Gwnz gai gizgiz vunz lumj haij;

Caimoiz ngonz daeng angq raixcaix,

Cungqvunz sim maij daeuj habyuenz.

Dangyuenz rouxringx youq ndaw rek,

Bouxcawj bouxhek angq dangqmaz;

Gwn liux dangyuenz youh gwn caz,

Sim raeuz hai va lumj mbaliengj.

Ciengnyied cibngux caen nauhyied,

Gwnzbiengz gak dieg venj daeng’va;

Gak cungj saek ndei rongh yap da,

Fukheiq daiq ma hawj biengzdeih.

Maxdaeng cienq byaij gwnz gai hung,

Duzfungh duzlungz soengq fuk daeuj;

Sai mbwk laux coz caez daeuj gaeuj,

Vunzlai sim raeuj lumj byoq feiz.

Bauqrengh bumzyiengj bongh hwnj mbwn,

Baihlaj baihgwnz rongh lumj ngoenz;

Saekcaij cien diuz ok riux hoenz,

Ciuq rongh gyang roen caeuq gyang mbanj.

Ngoenzneix foux lungz foux saeceij,

Yiengh de vuenheij youh vifung;

Ngauz gyaeuj baet rieng saenzheiq hung,

Saet hwnj saet roengz caen ndei yawj.

Saegim soengq fuk soengq gitsiengz,

Ngangx gyaeuj bi rieng daengx ndang doengh;

Bouxyawj angq hemq gizgiz hoengh,

Couh lumj deih doengh bya yaek lak.

Daek vanj dangyuenz hwnj gwnz gyongz(daiz),

Vunzlai naengh roengz doengz gangj goj;

Bouxboux vuenyungz riuhoho,

Lungz sae doengz hoh ndaej habyuenz.

Ronghndwen luenzluenz venj gwnz mbwn,

Baihlaj baihgwnz ronghsagsag;

Lwgsau hamzcingz riugakgak,

Lwgmbauq sim ak(angq) lumj va hai.

Eu fwen doiqdap cingzngeih naek,

Lwgdomq dep aek siengj hawj mwngz;

Haemhneix seizndei fwngz gaem fwngz,

Ronghndwen youq gwnz ingj song boux.

Ndaundeiq myabmyab ingj ndaw daemz,

Gingjsaek gyanghaemh caen miz feih;

Va ndei ndwen luenz sim vuenheij,

Nanz lumz haemhneix cingzngeih raeuz.

Gai hung gai iq nauhhuhu,

Ciengnyied cibngux caen ndei maez(angq);

Roq gyong roq nyenz gingq seizndei;

Haeuj neix doxbae engq hoenghhwd.

Diuzcag saekcaij biulala,

Vunz guh ruzva cuengq roengz daemz;

Minzsuz biujyienj ndei guhcaemz,

Bouxboux hai saem(sim) riu mbouj duenh.

Bauqrengh bumzbengz rongh angjdangx,

Daeng iq yaepgyangx youq gwnz faex;

Cungqvunz vaiqlag caez vuenheij,

Yenzsiuh(元宵) ngoenzneix saeh angq lai.

Dangyuenz haeuxnah saek hau nomj,

Lwgraz duhdoem coq baihndaw;

Youq rek fangoenj rang daengx haw,

Vunzlai bouxlawz mbouj myaiz rih.

Daengx ranz vunz heux youq henz daiz,

Sim’angq lailai fwen goksa;

Caez gwn dangyuenz van dangqmaz,

Beij gwn laeuj caz lij miz feih.

Ronghndwen lumj raemx saj gwnz gai,

Caijdaeng va hai ingj daengz ciengz;

Cungqvunz bouxboux sim van diengz(dangz),

Dangyuenz gwnzbiengz ceiq vannyiemh.

Ciengnyied cibngux gouz bingzan,

Coemh yieng homrang gingq mbwn deih;

Maqmuengh fwn rumz cungj swnhleih,

Haeuxnaz haeux reih ndaej rim cang.

Daengloengz saekcaij venj baenz sienq,

Geiqdak simnyienh angqfaengfaeng;

Yak rwix siubae fuk ndei daengz,

Daj neix bae laeng cungj hoenghhwd.

Heiq ndei haeujdaeuj rim gyang dien,

Fuknyinh lienzlienz heux dou ranz;

Cungqvunz bouxboux cungj bingzan,

Gouz aeu gwn van bae baihnaj.

Doengh boux youq rog bae dajcuenz(dajgoeng),

Gaeuj ronghndwen luenz siengj ranzmbanj;

Gonq mwh lwgnyez lod(guhcaemz) mbouj anj(baeg),

Siengj daengz ranzmbanj raemxda lae.

Dangyuenz ranzmbanj ceiq cix hom,

Bohmeh hwnzngoenz muengh lwg ma;

Youq rog gwn haeux lumj gwn nya,

Naih siengj raemxda dumz genbuh.

Gwnzmbwn ronghndwen sang’vidvid,

Ngaiznaengj haeuxcid hom doh biengz;

Boux youq rog langh nyi sim liengz,

Baihnaj miz diengz hix mbouj ngah.

Cibngux ronghndwen luenz lumj banz,

Gij daeng gok ranz ingj mbwn deih;

Nyezdoih guh’angq caez vuenheij,

Nanz lumz haemhneix seizgei bengz.

Youq gwnz Gvangjcangz vunz baenz gyoengq,

Fwngz gaem daengloengz riuhoho;

Ciengq go diuq foux daeuj angqhoh,

Vuenyungz swnghhoz van dangzrwi.

Ndaundeiq lwenqmyab ingj byadah;

Youq laj dienyah vunz angqyangz;

Caenhcingz caenh’eiq naengh doengz dangz,

Riuriu gangjgangj angq mbouj duenh.

Cibngux gingj ndei caen mbouj doengz,

Daeng’va lumj ngoenz rongh mbouj laep;

Lungz sae seiz foux seiz youh saet,

Gyanghaemh gyanghaet cungj maezvunz.

Ciengnyied cibngux ciet conzdungj,

Gangj gij neiyungz ceiq fungfouq;

Hengzguh gak cungj hozdung daeuj,

Cujyau gouz aeu fukheiq ndei.

Yenzsiuh fungsug neiyungz na,

Bae yawj daeng’va gwn dangyuenz;

Caicai daengmiz(灯谜) bauqrengh cuengq,

Cienzdungj minzsuz bouxboux maez

Caezgya cungj gouz bimoq neix,

Bingzan swnhleih ndaej yiengjfuk;

Bouxboux ndangcangq rwz mbouj nuk,

Rengz ak lumj guk bae guh saeh.

Minzsuz cienzswnj cien bak bi,

Vwnzva gaiq ndi(ndei) cungqvunz gyoh;

Seiq haij ciengq go doengz goenghoh,

Vwnzva gyangzgoz dingh guh baenz.

Ndawsingz gizgiz cungj nauhyied,

Lajmbanj diegdieg gyuk(nauh)huhu;

Fwen haenh fwen danq mbin daengz huj(fwj),

Ngoenzciet cibngux daihdaih cienz.

Ngoenzneix byaij haeuj seizdaih moq,

Ndaw cauq feiz oq cingq habseiz;

Ngoenzciet vwnzva ca ndaej ndei,

Daegsaek mbaw geiz dingh mbouj laemx.

Daengngoenz okdaeuj angj baenz gim,

Cienzminz naek sim riengz dangj guh;

Caj daengz bimoq cieng cibngux,

Raeuz dingh yied guh yied vuenyungz.