Laujcangh youq baihrog dajgoeng sam bi mbouj dauq ranz lo, gij vahriuz caeuq de mizgven haenx doxcaenx doxnap daeuj, mehyah de engqgya simvueng.

Ngoenzhaenx, sawqmwh raen Laujcangh youq aen haw nauhyied ranzmbanj haenx. Henz ndang de, lij riengz boux mehmbwk gyaeundei ndeu.

“Neix mbouj dwg Laujcangh ma? ”

Geij boux mehmbwk laux ndaw mbanj ceijceij diemjdiemj.

Laujcangh bonjlaiz siengj gvaqbae dongx, hoeng gyoengqde cix lumj ndoj binghraq nei, dauqcawq sanq bae.

Laujcangh caeuq dah sau neix, fwngz gaem fwngz couh yiengq ranz de byaij bae lo.

Youq bakdou, Laujcangh dingqnyi ndaw ranz de sing riu cienz okdaeuj, de rox neix dwg gij sing mehyah caeuq dahlwg de.

Laujcangh nyoengx dou haeujbae, sing iq heuh naeuz:“Mehyah, gou dauqma lo. ”

Mehyah doeksaet dwk cienq gvaq gyaeuj, gvaengzda yaepyet hix hoengz lo. Hoeng de yawjraen boux mehmbwk henz ndang Laujcangh, yaep ndeu naj hawq lo.

Laujcangh miz di mbouj swhyienz dwk gaisau naeuz :“Neix dwg Dahcinh, gou youq ndaw cangj roxnaj de. ”

Mehyah ngaem da yawj Laujcangh, mbaet mbouj ok sing.

Gienh saeh neix mbouj rox baenzlawz riuz okbae lo, ndaw mbanj sikhaek lumj raemxndat ndaw cauq goenj hwnjdaeuj, daihgya miz saeh rox mbouj miz saeh, cungj buet daeuj ranz Laujcangh.

Gij byoem henz rwz Laujcangh, loq miz loq ndoq, daegbied dwg gaemz heuj henj haenx, baez riu hwnjdaeuj couh hawj vunz mbouj gamj cim. Caiq gangj, song boux nienzgeij cengca cib geij bi, Laujcangh aeu caiz mbouj miz caiz, aeu siengq mbouj miz siengq, Dahcinh dauqdaej doz de gijmaz? Vunzmbanj gangjbyangbyang yied cienz yied geizheih.

Dahcinh lumj ma daengz ranz swhgeij nei, gaen Laujcangh guh haeuxcaeuz haemhndaep. De rox gaj gaeq gaj bit、ronq byaek cauj byaek, dinfwngz suglienh youh lauxlienh. De gig roxsoq mbouj gangj saek coenz vah, cij ngomxgog guh neix guh haenx.

Dahlwg youq bangxhenz yawj Dahcinh, nanz mbouj nanz haenh coenz ndeu. Gij saeknaj mehyah Laujcangh, engqgya yakyawj lo. Ndawsim miz cien fanh siengjfap gangj mbouj ok ndwnj mbouj roengz. Naemj caeuq Laujcangh doxceng hoeng youh gvaq cieng, caen mboujnyaenx guh dwk daengx ranz gaeq mbin ma diuq, mboujnex cieng cix mbouj baenz cieng lo.

Gwn gvaq caeuzhaemhndaep, Lauj- cangh daiq dahlwg caeuq Dahcinh daengz gyang hongh cuengq bauq. Bauqrengh yiengj hwnjdaeuj lo, dahlwg ndoj haeuj ndaw rungj Laujcangh bae, cix nyaenx mbouj ndaej iet gyaeuj okdaeuj yawj gij bauqva haenx. Dahcinh ndwn youq henz, dinghdingh yawj song bohlwg, gaeubak hix riunyumj.

Ma ndaw ranz, mehyah gaenq ceh ndei caz ndat. Daengx ranz vunz humx naengh youq henz feiz, yawj aen cieng ndaw densi vuenvuen heijheij. Laujcangh dawz mbaw gaendukhoz moq ndeu okdaeuj soengq hawj mehyah, youh ndenq aen daehsaw moq ndeu hawj dahlwg. Yawj gyoengqde cungj angqfwngfwng, ndawsim Laujcangh hix dwg vuenyungz.

Mbwn laep lo, Laujcangh anbaiz Dahcinh youq ranzhek ninz.

Mehyah beng Laujcangh cam naeuz:“Mwngz baenzlawz ndaej seizbienh daiq mehmbwk najseng ndeu ma ranz? ”

“De mbouj miz bohmeh, ndaej caeuq raeuz gvaq cieng mbouj dwg gig ndei ma? ” Laujcangh naeuz.

Mehyah nauh dwk da daengx naeuz:“Gig ndei? Gou yawj de dwg iucing ne, geij bi daeuj, vunz gangj naeuz mwngz youq baihrog miz lwgsau, gou cungj mbouj saenq, daengz ngoenzneix, gou cungj rox mwngz geij bi mbouj dauq ranz dwg vih gijmaz lo.”

Laujcangh song fwngz got gyaeuj, sing’yaem miz di hep naeuz:“Mwngz lijgaij loeng lo, gou youq aen gunghcangj cinwngz ndeu hwnjban, guh dai guh lix vih le aen ranz raeuz, mwngz cungj mbouj rox, hawj gou baenzlawz gaijnaeuz?”

“Mwngz dwg gijmaz eiqsei? O, hawj mwngz youq baihrog luenh bae ra lwgsau, gou couh youq ranz guh max guh cwz mwngz?” Mehyah song fwngz capeiq naeuz.

Laujcangh hix mbouj hozndat, de mbut saenj ien okdaeuj cup amq ndeu, yienzhaeuh naeuz: “Mehmbwk gij sou couh dwg dungxheb, mwngz yawj gou baenzlai geq, lij miz lwgsau ma? Ndaw ranz sam faen naz cae cungj cae mbouj ndaej lo, lij gangj gijmaz lwgsau?” Gangj le riu coh mehyah, aeu fwngz got mbaq mehyah.

“Deuz, bakma mwngz, bouxlawz rox mwngz, angq moq mbwq gaeuq, miz saek ngoenz ngaiz vunz nyaeuh, aeu ngaenz aeu daep aeu mak bae caez, gou yawj mwngz ak.” Mehyah baet fwngz de ok.

Laujcangh naeuz: “Mwngz mboujndaej baenzlai hozndat, mwngz caiq hozndat, gvaq geij ngoenz gou couh dauqbae aen gunghcangj cinwngz hwnjban, hawj mwngz gag youq ranz guhhong.”

“Hw, gangj ndaej baenz mbaeu, mwngz dwg mbouj dwg youq baihrog nanz lai, ndawsim cungj mbwq la? Gou mboujguenj mwngz youq gunghcangj cib nwngz roxnaeuz gunghcangj gouj nwngz, mwngz itdingh aeu aen gangjfap ndeu hawj gou. ” Mehyah rongx sing sang ndeu.

Couh youq mwh mehyah Laujcangh hozndat daejfwtfwt, Laujcangh ganjgip yaek gaijnaeuz gij caensiengq saeh neix hawj mehyah de. Hoeng denva Laujcangh ngamjhab hongz lo.

“Vei, Laujcangh ha, ndwencieng angqyangz! Mwngz daiq Dahcinh dauqbae de rox guhhong lwi? Gyo’mbaiq mwngz gaisau gij dinfwngz boux vunzgihgi, bouxdaeuz ndaw cangj cibfaen maij mwngz, hoh mwngz bimoq yienghyiengh moq!”

Laujcangh dingq le, caen siengj dawz gienh saeh neix lauxsaed naeuz hawj mehyah, bonjlaiz caeuq mehyah guhriu, hoeng de yawj mbouj ok saek di geizheih. Mehyah Laujcangh nyinhnaeuz dwg caen dahraix, ndigah hozndat lo.

Yienghneix, Laujcangh aeu sa uet raemxda mehyah naeuz:“Mbouj daej lo, gou dwg caeuq mwngz gangjriu ha, mwngz lijgaij loeng lo. Danghnaeuz gou naeuz Dahcinh dwg boux vunzgihgi, mwngz saenq mbouj saenq?”

“Mwngz okrog geij bi, doekfwn byajraez, ngoenznit ngoenzndat, ranz ndaw ranz rog gou bae guh mbouj dingz, gou cij dwg vunzgihgi.” Mehyah de mbouj saenq saek di.

Laujcangh got mehyah gaijnaeuz baedauq, hoeng yied gangj mehyah yied guengz, din fwngz youh baed youh dik, lumj duzmou yaek gaj gvaq cieng nei, baenzlawz gaemh hix gaemh mbouj dawz.

“Aen cieng neix mbouj miz banhfap gvaq lo! ” Laujcangh dawz gyoengq moeg dajsuenq byaij ok ndaw rug bae.

“Ndwn daengx, mwngz bae giz- lawz? ” Mehyah gaem dawz genbuh Laujcangh.

Laujcangh naeuz:“Gou bae rogding ninz. ”

“Caen mbouj aeu naj ba, mwngz ha? ” Mehyah baez rag, Laujcangh baez saemxsax couh laemx daengz gwnz mbonq bae. Mehyah ceij haeuj najbyak Laujcangh bae naeuz:“Gou couh rox gij geiqmaeuz mwngz, yienghneix mwngz cij ndaej bae caeuq meh iucing de ninz, mwngz nyinhnaeuz gou mbouj rox……”

Rog cueng aen mbwn ronghsag, dwg gij bauqva saek loeg saek henj. Haemhhaenx, Laujcangh gvanbaz cungj mbouj miz sim yawj.

Ngoenzlaeng, Laujcangh baez hwnq, couh naeuz hawj Dahcinh caeuq dahlwg sousib ranzdajcawj.

Song boux ngamq haeuj daengz ndaw ranzdajcawj, gig vaiq couh cienz daeuj sing yiengj “ba” ndeu, aen vanj doek daengz gwnz namh, soiq lo.

Dahlwg buet haeuj ndawrug daxmeh de bae naeuz:“Meh, Dahcinh dwg boux vunz- gihgi. ”

“Mwngz luenh gangj! ”

“Dwg caen. Gou raen de gaeuz roengzdaeuj gip aen vanj seiz, gwnz hwet de miz naed gaihgvanh ndeu, gou baez gven giz gaihgvanh, de couh mbouj guhhong lo……”

“Mwngz……” Mehyah fwt roxyiuj lo, leuxcih yawj bae coh Laujcangh.

Yaep ndeu, ndaw ranz Laujcangh sing riu caeuq sing bauqrengh doengzcaez yiengj doh daengx mbanj.