Haetlaeng, Vangz Gencingh dawz saceij bae cat giz ciengz ngoenzlwenz gvethoi haenx. Mbwn ha! Saceij ngednged cat gvaqbae, gij faenj lumj deq mbouj gib nei foenxfoenx mbin roengz.

De doq heuh Vangz Genhuj dawz caxhoi canj hoiciengz ngoenzlwenz geij boux vunzmbanj gvet haenx, de swhgeij byaij roengz sam laeuz bae naengh cigunghgyauh bae hawciengz gencaiz yawj geij aen bouqmienh cienmonz gai nizswjfwnj haenx, yawjraen “geiqmaenh”baiz daegbied wenjda, laixlawz dwg Cinz lauxbanj cawx hawj yungh gvaq.

Bouxgaihuq dwg dah sau ndeu, raen bouxcawx daeuj yawj huq naj maeqsisi haenx lumj duj va ndeu riunyumnyum cam naeuz:“Beixhung, aeu nizswjfwnj lwi?”

Vangz Gencingh cam:“Bau ndeu geijlai ngaenz?”

Lwgsau naeuz:“Cibhaj maenz haj gak.”

Vangz Gencingh naeuz:“Bengz lai lo.”

Lwgsau naeuz:“Beixhung, gij nizswjfwnj neix gai mbouj bengz ha, dou dwg gag cauh gag gai, mbouj miz ca’gyaq, bouqdiemq lai aen faenbouh youq Namzningz gak dieg, gai ndaej gig ndei, mwngz naemj ndei caiq daeuj cawx.”

Vangz Gencingh naeuz:“Gou aeu haj cien bau doxhwnj, noix di ndaej mbouj?”

Lwgsau naeuz：“Mwngz caj yaep ndeu.”Gangj sat, dawz denva dwk hawj lauxbanj. Buenq aen cung, boux vunzgeq roekcib bi ndeu coh bouqdiemq byaij daeuj, doiq Vangz Gencingh ngaek gyaeuj, youh heuh lwgsau cung caz.

“Daeuj, get cenj caz ndeu.”Vunzgeq heuh Vangz Gencingh naengh daengq, Vangz Gencingh miz di suksouj, de ceiq yawj mbouj gvenq gij yienzbauq dangz duk haenx.

Vunzgeq gangjvah unqswnh hix amq hamz yiemzsuk, daengz hauhneix nienzgeij, de yawj gvaq gwnzbiengz geijlai fwnrumz.

De mbouj gaenj mbouj menh, naeuz:“Gwn cenj caz ndeu nyinh conghhoz, mboujguenj dwg gaicawx roxnaeuz gvaq roen, gwn cenj caz ndeu caengj roxnaj.”

Vangz Gencingh gwn gaemz caz ndeu, cam:“Lauxbanj, mwngz couh gangj coenz vah ndeu, bau nizswjfwnj mwngz aeu geijlai ngaenz?”

Lauxbanj naeuz:“Gou gai okbae bau ndeu couh cibhaj maenz haj, mwngz siengj hawj geijlai?”

Vangz Gencingh naeuz:“Cibsam maenz bau ndeu.”

Lauxbanj najgeq nyaeuq guh doi ndeu, naeuz:“Cibsam maenz? Mwngz saedcaih dwg youq goekga gou heh gaiq noh deuz.”

De yawj Vangz Gencingh dwg boux vunz lauxsaed ndeu, cam:“Mwngz aeu geijlai bau, gangj byotbyat di.”

Vangz Gencingh naeuz:“Camhseiz aeu haj cien bau.”

Lauxbanj fwngzgvaz seiq lwgfwngz roq roengz mienhdaiz:“Cibseiq maenz!”

Vangz Gencingh naeuz:“Bau soengq daengz dieghong?”

Lauxbanj cam:“Soengq daengz lawz? Soengq ndaw si Namzningz ndaej soengq, bae daengz lajmbanj hix aeu hai ngaenzdoz.”(15)