Hagdangz lij cauhlaeb “aen giekdeih beizyin caijdiu”, beizyangj ndaej lai boux caijdiu vunzcaiz iq, gyoengqde camgya heiq doxdax lwgnyezrauh guek raeuz, lai baez ndaej gak cungj ciengj, vih ranzhag、giekdeih ceng ndaej haujlai mingzdaeuz. Ranzhag lij beizyangj ndaej bouxswnjciep caijdiu iq ndeu, coh de heuhguh Vangz Gyahsan, de ndaej aen mingzdaeuz “lwgnyezrauh ndei seizdaih moq” neix, engq daiq gij cienzswnj、 hwngfat caeuq doigvangq feihyiz hanghmoeg(caijdiu) ranzhag neix haeuj aen duenh moq bae.

Seizneix, gou siengj daengz caijdiu ranzmbanj gou. Caijdiu ranzmbanj gou caeux couh doiqok daizheiq, cij youq ndaw beksingq lij miz, cij miz geij boux laux seiz mbouj seiz ciengq daeuj gaijmbwq ndwi, mbouj miz bouxcoz swnjciep, gaiq vwnzva neix yaek goenq lo, neix hawj vunz gaetsim. Conzdungj vwnzva haeuj hagdangz, gij yozyau Liujcwngz guh ndaej miz sing miz saek, caen baenz hagsib.

Ranzmbanj gou hix guh “feihyiz haeuj hagdangz”, dajbeij: Foux sae、 san lamzva ganjmed、 gvaibanj、 fwendoj daengj, hix miz cingzyauq, hoeng beij mbouj ndaej Liujcwngz.

Bi 2024, minzcuz gauhcungh yienh dou, hix heuh gou bae sou hagseng ciengq fwendoj. Hainduj, hagseng mbouj haengj cungj fwendoj neix, naeuz fwen neix lumj fwendaej nei. Caen miz di lumj fwendaej dahraix, ndigah bouxcoz gig mbouj gyaez de.

Fwendoj dwg cungj gyauhliuz fuengsik ndeu, dwg gyoengq cojcoeng ciuhgeq raeuz youq ndwenngoenz swnghcanj ndawde cauxbaenz, gvaqlaeng bienqbaenz cungj vwnzva hingzsik ndeu, hix deng vwnzyinz geiqloeg roengzdaeuj, youq ndaw beksingq riuzcienz doigvangq, baenz gaiq youqgaenj fuengsik beksingq biujdaz gamjcingz、fanjyingj ndwenngoenz haenx, seizgan nanz le baenz cungj vwnzva ndaw beksingq ndeu, gaendwk caemh baenz minzcuz vwnzva.

Vwnzva dwg hoenz guekgya、minzcuz. Vwnzva hwng, guek cix hwng; vwnzva giengz, guek cix giengz. Siz Ginbingz cungjsuhgi giengzdiuh: Gak cuz aeu miz minzcuz gagsaenq、vwnzva gagsaenq. Beksingq raeuz baenzlawz gagsaenq ne? Couhdwg yawjnaek caeuq ndiepgyaez gij conzdungj vwnzva raeuz. Ndigah, cienzswnj conzdungj vwnzva dwg gij cizcwz mbouj ndaej doi haenx.

Gou sonyinx lai baez, hagseng cij ciepsouh cungj fwendoj neix, cij nyinhcaen hag. Swnh “haexgaeq lij ndat”, gou sikhaek sawq gaijndei cungj fwendoj neix, yungzhab gij yenzsu goriuz, diuh de bienq angqyangz lo, hagseng gig maij. Hoeng, gaijndei conzdungj fwendoj gou miz di simhaw, lau gyoengq bouxgeq ndaq gou luenh gaij luenh coih, ndigah sim cungj mbouj onj.

Bwzswz Si bi 2024 aen ban hong baujhoh feihyiz youq Cingsih Si guh, gwnz hoih, Aen Cungsim Baujhoh Feihyiz Gvangjsih Lij Cwngz lauxsae naeuz: “Conzdungj vwnzva raeuz, baujlouz gij giekdaej de le, danghnaeuz gaijndei de, neix dwg caeuq sevei hwngfat doxhab, caeuq vwnzva hwngfat doxhab……”

Gou dingq ndaej coenz vah neix, sim soengswt. Dauqdaeuj le gou damjlaux son hagseng ciengq fwen gaijndei. Youq gwnz vanjvei yindungvei hagdangz, gyoengq hagseng gou bien hot fwen“gyo’mbaiq” ndeu, guhbaenz “langh sing doeg saw + fwendoj + fwen gaijndei” cungj vunqsik neix hwnj daiz yienjok, gaeuq moq doxhab, miz gij yaugoj liuh mbouj daengz haenx, ndaej daengx hagdangz lauxsae hagseng haenh.

Conzdungj vwnzva ciuhgeq louz roengzdaeuj haenx, dingzlai gaenq yaek goenq lo, neix hawj vunz gaetsim. Conzdungj vwnzva baengh youq ndaw beksingq cienzboq、cienzswnj, diuz roen neix yied bae yied gaeb, cijmiz yungz haeuj hagdangz bae, gij cienzboq cienzswnj neix cijndaej yied bae yied gvangq, yied bae yied gyae.

Bae Liujcouh dauqdaeuj, gou sim’angq siengj daengz: Danghnaeuz moix aen hagdangz cungj vatra gaiq conzdungj vwnzva ndeu yungz haeuj sonhag bae, daengx guek ciencien fanhfanh aen hagdangz, gij conzdungj vwnzva raeuz couh ndaej laebdaeb fatyiengz ronghsien; gij minzcuz vwnzva raeuz lij dwg lai yiengh lai cungj; minzcuz gagsaenq couh gag gietcomz; couqmaenh gij eiqsik caezcaemh Cunghvaz Minzcuz raeuz couh yied byaij yied saed.

（2 sat）