1 nyied 17 hauh banhaet, Gvangjsih Bouxcuengh Swcigih Gaiq Cibseiq Yinzminz Daibyauj Daihhoih Baez Hoih Daihsam youq Gvangjsih Yinzminz Veidangz hai sat.

Swcigih Dangjveij suhgi、Swcigih Yinzda Cangzveijvei cujyin、daihhoih cujsizdonz cangzvu cujsiz、caephengz cujsiz Cinz Gangh cujciz aen hoih bixmuq caemhcaiq gangjvah.

Daihhoih caephengz cujsiz Fangh Cunhmingz、Cangh Yaujginh、Hoz Vwnzhau、Vangz Veijgingh、Luz Yenbenj、Yangz Cingvaz、Liuz Youjmingz youq cujsizdaiz baiz daih- it naengh.

Swcigih Cwnghez cujsiz Sunh Daveij, youq Nanzningz Daengx Guek Yinzda Vanzging Caeuq Swhyenz Baujhoh Veijyenzvei cujyin veijyenz Luz Sinhse, caeuq Swcigih lizduiyouh cwngswngjgiz dungzci geq daengj youq cujsizdaiz naengh.

Aen hoih faenbied byaujgez doenggvaq le gij gezyi mizgven cwngfuj gunghcoz baugau、swcigih bi 2024 gozminz ginghci caeuq sevei hwngfat giva caephengz cingzgvang caeuq bi 2025 gozminz ginghci caeuq sevei hwngfat giva、daengx gih caeuq swcigih bonjgaep bi 2024 yawhsuenq caephengz cingzgvang caeuq bi 2025 yawhsuenq、Swcigih Yinzda Cangz- veijvei gunghcoz baugau、Swcigih Gaugaep Yinzminz Fazyen gunghcoz baugau、Swcigih Yinzminz Genjcazyen gunghcoz baugau, byaujgez doenggvaq le 《Aen Diuzlaeh Baujhoh Caeuq Guenjleix Bingzluz Yinhoz Gvangjsih Bouxcuengh Swcigih》.

Cinz Gangh daegbied gangj daengz, Gaiq Ngeihcib Samcung Cienzhoih Dangj veh le mbaw lamzdoz hungmbwk caenh’itbouh cienzmienh haeujlaeg gaijgwz、doinyoengx gij yendaiva yiengh Cunghguek. Bi 2025 dwg bi satbyai “cibseiq haj” gviveh, Aen Hoih Gaiq Cibngeih Baez Gouj Swcigih Dangjveij Nem Aen Hoih Hong Ginghci anbaiz baijbouh hong daengx bi, swcigih song hoih guhsaeq gij moegbiu yinvu banhfap daengx bi ginghci sevei hwngfat. Moegbiu couh youq baihnaj, yinvu naek yaek aeu haenqguh. Raeuz aeu caensim yungjhu “song aen dinghlaeb”、caensim hengzguh “song aen henhoh”, gaenjndaet hopheux aen cwngci ceiq hung gij yendaiva yiengh Cungguek neix, dingjmaenh aeu couqmaenh gij eiqsik caezcaemh Cunghvaz Minzcuz guh diuz sienqmeh daengx gih gak hangh hong, geiqmaenh vahdaengq、 gyo’mbaiq haenqguh baenaj, caezhoz gyavaiq aen “yaem’wenq daeuz” hwngfat ndei saed, itloh caeuq daengx gih 5700 lai fanh gak cuz bouxminz naemj doxlumj、guh doxcaez, aeu cingzcik daeuj gangj、hawj bouxminz bingzgyaq, gaenjndaet gaemdawz gij iugouz seizdaih doxgiet buekguh, comz gij rengz hung hwnjdaeuj doxcaez guh saeh hung hwnqguh aen Gvangjsih maenghndei seizdaih moq, yawjcinj moegbiu、hengzdoengh riengjret, cienzmienh guhsat daengx bi gak hangh moegbiu yinvu, haenqguh mbouj soeng bae saedyienh gij yendaiva Gvangjsih.

Cinz Gangh daegbied gangj daengz, aen cidu yinzminz daibyauj davei dwg aen cwngci cidu gaenbonj guek raeuz, dwg gij caidij cidu youqgaenj saedyienh daengx aen gocwngz bouxminz minzcuj. Daengx gih gak gaep dangjveij aeu haeujlaeg hagsib gvancez gij swhsiengj youqgaenj dingjmaenh caeuq guhndei aen cidu yinzminz daibyauj davei Siz Ginbingz cungjsuhgi, gyagiengz caeuq gaijndei cienzmienh lingjdauj hong yinzda, hawj yinzda guh hong caeuq yinzda daibyauj ciuqfap hengz cizcwz miz cwngci baujcang maenhdwd. Gak gaep yinzda caeuq aen cangzveijvei de aeu cietsaed hengz gak hangh cizcwz fapguek faplwd hawj de, mboujduenh daezswng gij caetliengh caeuq suijbingz hong yinzda, doidoengh hong yinzda engq ndei gaenhwnj seizdaih、gaemdawz gvilwd、miz cauhguh. Gak gaep “it fuj it veij song yienh” aeu gagrox ciepsouh yinzda gamduk, mboujduenh daezsang ciuqfap hingzcwng、ciuqfap gamcaz caeuq goengcingq swhfaz suijbingz. Gak gaep yinzda daibyauj aeu insik mingzdaeuz、geiqmaenh sawjmingh, engqgya gaenxmaenx cawjdoengh bang bouxminz gangjvah、bang bouxminz hengz cizcwz, cietsaed rap mbaq rap naek bouxminz gyau hawj de. (daj《Gvangjsih Yizbau》 aeu daeuj genj hoiz Cinz Yizcwz Gungh Vwnzyingj Loz Canghlieng Cungh Siujgij)