(ciep geiz gonq)

Ndaw mbanj ranz lawz miz hoengzsaeh begsaeh, gyoengqvunz cungj gag bae bang roxnaeuz ok faenh. Vwnz Siujlanz ndaejgeiq, 2022 nienz 1 nyied 30 hauh (liggaeuq ndwenlab ngeihbet), ngoenzlaeng couhdwg haemhndaep, ngoenzgonq de ngamq daj mbanj ma Liujcouh, haetcaeux couh ciep daengz dienhvah, cij rox daxboh fat binghgaenj gvaqseiq lo, “gou roxnyinh mbwn cungj doemq lo, uk luenh liux, mbouj rox baenzlawz guh”. De hai ci ganj dauq mbanj, ngeix mbouj daengz baez daengz ranz, ndaw ranz cungj dwg vunz, gyoengq beixnuengx、 boh’au mehsimj 、bohlungz mehbaj bonjranz daeuj lo, vunz Siengcouh、Ginhsiu ndaw mbanj hix daeuj lo, daihgya doxyaeng baenzlawz banh ndei gij saehlaeng daxboh. “gou gyo’mbaiq gyoengqde dahraix!” Ngeix daengz neix, Vwnz Siujlanz gikdoengh dangqmaz.

Mbanjsangbingz moix di cinbu cungj miz gij rengz vunzmbanj. Bi 1990, Mbanjsangbingz deng bingzbaenz daengx guek minzcuz doxgiet cinbu senhcin cizdij; bi 1991, garoen moq Mbanjsangbingz daengz Da’gya cunhveij coih doeng, gaijgez gij vwndiz “byaij roen” vunz Mbanjsangbingz; bi 1998, aen gunghcwngz cauh daemz coux raemx guhbaenz, vunzmbanj miz swlaizsuij gwn lo; bi 2017, Mbanjsangbingz daengx mbanj duet mauhgungz; bi 2022, Mbanjsangbingz an le lohdaeng, vunzmbanj byaijlaep cungj raen cingx liux; bi 2023, Mbanjsangbingz laeb aen vwnzva gvangjcangz doengzsim、 dingz doengzsim…… 30 bi daeuj, Mbanjsangbingz bienqvaq lai lo, hoeng gak minzcuz gij conzdungj doxbaengh doxing、doxgiet buekguh、caezcaemh hwngfat mbouj bienq gvaq.

Diuz Sei Ndeu, Lienzciep Song Aen Swngj

2024 nienz 5 nyied 30 hauh, Gvangjsih Yingzcunh Swhcouz Mizhanh Gunghswh (baihlaj heuh Yingzcunh Swhcouz Gunghswh) bouxfucungjginghlij Dwng Limingz daiqdoih baedaengz Vazgyah Hihvang Siujyoz Mbanjsangbingz naicam, soengq gaiqgwn、bitmaeg daengj doxgaiq hawj gyoengq lauxsae hagseng. Daj bi 2011 doxbae, Gyanghsuh Vazgyah Gungguj Cizdonz Mizhanh Gunghswh (baihlaj heuh Vazgyah Cizdonz) moix bi cungj daeuj Mbanj- sangbingz Vazgyah Hihvang Siujyoz naicam.

Aen siujyoz neix youq bi 1973 hwnq baenz, dwg aen cunhgaep siujyoz youz Siengcouh、Ginhsiu song dieg caemh hwnq caemh guenj ndeu, it daengz roek nienzgaep seiz ceiqlai miz 170 boux hagseng、7 boux lauxsae. Geij bi neix, hagseng nienzgaep sang laebdaeb bae ndaw cin roxnaeuz ndaw yen doegsaw lo, aenhag seizneix lij lw it nienzgaep, gungh 4 boux hagseng、boux lauxsae ndeu.

Aen cungjbu Vazgyah Cizdonz youq Gyanghsuh Swngj Suhcouh Si, liz Mbanjsangbingz miz 1700 goengleix baedauq, song dieg baenzlai gyae vih gijmaz ndaej lienzhaeh hwnjdaeuj ni? Neix couh yaek daj diuz sei ndeu naeuz hwnj lo——Vazgyah Cizdonz daengz Siengcouh, dwg vih gij sei duznonsei.

Vazgyah Cizdonz youq bi 1969 laeb cangj, guh seng’eiq baengzsei 50 lai bi, 2006 nienz 9 nyied, cizdonz han’wngq aen canloz “gosang baihdoeng senj baihsae” guekgya, baedaengz Siengcouh Yen douzngaenz hwnq aen diegranz nonsei, laebbaenz aen gunghswh faennga——Gvangjsih Vazgyah Swhcouz Mizhanh Gunghswh (gvaqlaeng gaij coh baenz Gvangjsih Yingzcunh Swhcouz Mizhanh Gunghswh). Yingzcunh Swhcouz Gungh- swh dwg aen giyez guh gij hong ndaem gosangh、ganq faenz nonsei、ciengx nonsei、gip reh、yot sei、guh fandenz sei. Seizneix aen de miz 20 cuj swdung yot sei sengcanj sienq, moix bi canjok 600 dun sei, miz gaiqdieg ciengx rehnon moix bi canjok 30 fanh fan rehnon caeuq aen yendaiva nonsei sengcanj sifan gihdi 500 moux hung ndeu, canjbinj gai daengz Yidali、Fazgoz、Yuisw daengj Ouh Meij guekgya.

Siengcouh youq dieg yayezdai, moix bi miz 6 ndwen baenz ndaem gosangh ciengx nonsei gip reh. Mbanjsangbingz haujlai vunz hix ndaem gvaq ciengx gvaq. Miz baez ndeu, Vazgyah Cizdonz dungjswcangj Vangz Cunhvah daiqdoih daengz Mbanjsangbingz sou reh, dingjlingz raen miz hagseng youq laj gorungz hwnjdangz.

“Vihmaz gyoengq hagseng neix youq laj gorungz doegsaw ni? Dingq hagseng naeuz aenhag gaxgonq deng bya lak dongj vaih lo, seizneix mbouj miz ngaenz hwnq yozyau, yienghneix gou couh naeuz, gou hwnq aen ndeu ba.” Seiz Vangz Cunhvah ciepsouh gicej caijfangj naeuz.

Bi 2011, Vazgyah Cizdonz gien ngaenz hawj aen siujyoz neix hwnq aen hag moq, daj neix aen minzcuz digih yozyau caeuq dunghbu digih giyez couh dapnangq doxrangh lo.

Mbouj caih gyoengq lwgnyez Mbanjsangbingz, haujlai vunzdajndaem Siengcouh cungj aenvih Vazgyah Cizdonz ndwenngoenz bienq lo. Dwng Limingz gaisau, Yingzcunh Swhcouz Gunghswh youq Siengcouh Yen Siengcouh Cin Beizswnh Cunh hwnq aen yendaiva nonsei sengcanj sifan gihdi, yungh cungj “gunghswh + gihdi +hozcozse + boux ndaem ciengx lai” neix, baugvat daengz 8 aen mbanj, daiqdoengh vunzdajndaem 200 lai boux gyahaeuj gihdi gensez caeuq nonsei sengcanj, ndawde vunzduetgungz miz 38 vunz. Gunghswh lij youq Siengcouh laeb miz 11 aen camh daeuj sou、gangq reh nonsei, bi 2023 youq Siengcouh Yen gih raeuz caeuq mbangj dieg Yinznanz Swngj sou、gangq 677 dun reh, daiqdoengh 2300 ranz ndaem gosangh ciengx nonsei. Geij bi daeuj, gunghswh gungh son’gyauq boux ciengx nonsei 1.5 fanh vunz, boux ciengx nonsei daezsang gisuz ciengx nonsei, gij ndwenngoenz sengcanj bienq ndaej gaen hwnj seizdaih lo.

Youq Siengcouh 18 bi, Yingzcunh Swhcouz Gunghswh bienqbaenz Laizbinh Si aen giyez baengzsei sengcanj gveihmoz ceiq hung ndawde aen ndeu, bi 2023 sengcanj caensei 260 dun, canjciz 1.6 ik maenz ngaenz, leihgvaeh 800 lai fanh maenz ngaenz, ndaej “daengx guek siujsoq minzcuz dinghdiemj sengcanj giyez” “swcigih nungzyez canjyezva cungdenj lungzdouz giyez” “swcigih gaep banggungz lungzdouz giyez” “swcigih hangzdajcauh sinsizva gunghcwngz sifan giyez” “Gvangjsih cib ndei baengzsei gyagoeng giyez” daengj cwnghauh miznaj.

Danghnaeuz daj aen ranzlaux Mbanj- sangbingz ndaej raen Guengjsae gak minzcuz dox baedauq dox gyaulouz dox yungzhab, yienghneix Vazgyah Cizdonz caeuq Siengcouh couhdwg dieg doengsae gaem fwngz caez baenaj、caez fouqmiz. Yawj doxdauq, gij gojgaeq song ranz vunz doxndei haenx lij hawj vunz simdoengh, yawj dangqnaj, fuk veh gak minzcuz caez byaijhaeuj ndwenngoenz yendaiva ndeu cingq menhmenh mbehai.

(sat)