（ciep geiz gonq）

Yamq daih’it gejnaeuz:

Youq hot Fwencuengh ndawde, coenz daih (1) cih saw doeklaeng dwg bingzsing“haiz”，coenz daih (2) seiq cih saw youq gonq ndawde cih saw haeujyinh hix dwg bingzsing “gvai”.

Doz：

(1)0 0 0 0 △(bingz)

(2)0 △(bingz)0 0 ▲(caek)

Lumj:

（1）Hawj youx soengq gouhhaiz,(bingz)

（2）Mbouj gvai(bingz) lumj mbungqmbaj;(caek)

Yamq daihngeih gejnaeuz:

Youq hot Fwencuengh ndawde, coenz daih (2) caeuq coenz daih (3) cih saw haeujyinh cungj dwg caeksing “mbaj”caeuq “cax”.

Doz:

(2)0 △(bingz)0 0 ▲(caek)

(3)0 0 0 0 ▲(caek)

Lumj:

（2）Mbouj gvai(bingz) lumj mbungqmbaj;(caek)

（3）Ding yamq deih yamq cax,(caek)

Yamq daihsam gejnaeuz:

Youq hot Fwencuengh ndawde, coenz daih (3) cih saw haeujyinh “cax” caeuq coenz daih (4) cih saw haeujyinh “naj” dwg caeksing.

Doz:

(3)0 0 0 0 ▲(caek)

(4)0 0 ▲(caek) 0 △(bingz)

Lumj:

（3）Ding yamq deih yamq cax,(caek)

（4）Mbouj miz naj(caek) doiq vunz.(bingz)

(Seiq) Caeksing caeuq caeksing haeujyinh, bingzsing caeuq bingzsing haeujyinh.

Doz：

（1）0 0 0 0 ▲ (caek)

（2）0 0 ▲(caek) 0 △(bingz)

（3）0 0 0 0 △ (bingz)

（4）0 0 △(bingz)0 ▲ (caek)

Lumj:

（1）Bae doengh mbouj raek cax,(caek)

（2）Aeu maz gaj(caek) goliu;(bingz)

（3）Bae youq mbouj gangjriu,(bingz)

（4）Aeu maz siu(bingz) dungxheiq.(caek)

Yamq daih’it gejnaeuz:

Youq hot Fwencuengh ndawde, coenz daih (1)cih saw doeklaeng dwg caeksing“cax”，coenz daih (2) cih saw haeujyinh hix dwg caeksing “gaj”.

Doz：

（1）0 0 0 0 ▲ (caek)

（2）0 0 ▲(caek) 0 △(bingz)

Lumj:

（1）Bae doengh mbouj raek cax,(caek)

（2）Aeu maz gaj(caek) goliu;(bingz)

Yamq daihngeih gejnaeuz:

Youq hot Fwencuengh ndawde, coenz daih (2) caeuq coenz daih (3) cih saw haeujyinh cungj dwg bingzsing “liu” caeuq “riu”.

Doz：

（2）0 0 ▲(caek) 0 △(bingz)

（3）0 0 0 0 △ (bingz)

Lumj:

（2）Aeu maz gaj(caek) goliu;(bingz)

（3）Bae youq mbouj gangjriu,(bingz)

Yamq daihsam gejnaeuz:

Youq hot Fwencuengh ndawde, coenz daih (3) cih saw “riu” caeuq coenz daih (4) seiq cih saw haeujyinh cungj dwg bingzsing “riu” “siu”.

Doz：

（3）0 0 0 0 △ (bingz)

（4）0 0 △(bingz)0 ▲ (caek)

Lumj:

（3）Bae youq mbouj gangjriu,(bingz)

（4）Aeu maz siu(bingz) dungxheiq.(caek)

Gyoep naeuz：

Bingzsing hwnj bingzsing sou,

Bingzsing caeuq bingzsing haeujyinh,

Caeksing caeuq caeksing haeujyinh.

Caeksing hwnj caeksing sou,

Caeksing caeuq caeksing haeujyinh,

Bingzsing caeuq bingzsing haeujyinh.

Doz:

0 0 0 0 △(bingz)

0 0 △(bingz)0 ▲(caek)

0 0 0 0 ▲(caek)

0 0 ▲(caek) 0 △(bingz)

Lumj：

Bienq baenz duz roeggae,(bingz)

Bae(bingz) gyaeuj canz mwngz duh;(caek)

Bienq baenz roeggutguh,(caek)

Bae din buh(caek) mwngz caemz.(bingz)

Doz：

0 0 0 0 ▲(caek)

0 0 ▲(caek) 0 △(bingz)

0 0 0 0 △(bingz)

0 0 △(bingz)0 ▲ (caek)

Lumj：

Beixnuengx haemhneix daeuj,(caek)

Mbouj miz laeuj(caek) miz bya;(bingz)

Gingq song boi raemxcaz,(bingz)

Cingzngeih na(bingz) daengx ciuh.(caek)

Seiq、 Raiz Fwencuengh

Fwencuengh miz lai yiengh raiz fap，yungh ceiq lai dwg doxbeij raiz caeuq cigsoh raiz song cungj fuengfap neix.

(It) Doxbeij raiz. Couhdwg aeu gofaex、gomak、gova daengj bae beij yienghsiengq sau mbauq gyaeundei, beij simcingz vaiqvued, beij ndawsim naemjngeix；aeu duzroeg、cwz vaiz daengj bae beij sau mbauq ndangcangq；aeu bya’bya raemxraemx beij bouxvunz simcingz daengj.

Lumj:

1.Biek mwngz bae liux youx,

It go goux it ing;

Biek mwngz bae liux gim,

It gonj rin it naengh.

2.Miz daemz cij miz bya,

Miz naz cij miz haeux;

Gungcanjdangj okdaeuj,

Raeuz cij miz ngoenzndei.

3.Daemz dek mbouj miz bya,

Naz dek mbouj miz haeux;

Guekgya mbouj giengzfouq,

Vunz couh rox daeuj hei.

4.Hwnj bya bae caux daemz,

Lau gyaeng raemx mbouj youq;

Heuh gvan vunz guh youx,

Ndaej youq geijlai nanz.

5.Gofaex youq bangxgeng,

Ceng mbouj ndaej ndoj raemh;

Songraeuz vunz caemh saemq,

Ndaenq mbouj ndaej caemh ranz.

6.Mwngz ndaej dawz sim dog,

Hazndok baenz vengzdiuz;

Mwngz ndaej dawz sim ndeu,

Hazheu baenz benjcamh.

7.Hwnj bya bae cauh daemz,

Gwn raemx mbouj lumz mboq;

Bouxlawz cix yaek rox,

Gaem faexsoh lot fwngz.

8.Gaxgonq byaleix dah,

Bouxlawz ngah cix yaemz;

Seizneix byaleix daemz,

Miz boux gaem boux hah.

9.Gou daeuj dieg neix naengh,

Raen vaengzraemx miz bya;

Naemj cuengq bit bae ra,

Lau raebbya miz yiuh.

(Ngeih) Cigsoh raiz. Couhdwg naemj daengz gijmaz couh cigsoh raiz gijmaz. Lumj:

1.Ndwencieng daengz ngoenzndouj(nduj)，

Bouxboux okbae youz;

Daegmbauq bae dwk gouz（giuz）,

Dahsau bae youzlangh.

2.Geij beixnuengx gangjgoj,

Riuhoho mbouj dingz;

Ndoet laeuj daengz najnding,

Caiq oksing caimax.

3.Bibi ndwencieng bibi gvaq,

Gwnzhaw lajmbanj gizgiz ndei;

Siengj aeu maz saeh cungj ndaej caez,

Vunzlai doxgyaez haeuj bimoq.

4.Raeuz miz Gungcanjdangj lingjdauj,

Daengx guek lauxnyaeq caezsim riengz;

Vunzlai coenghhoz doengz okrengz,

Yienghyiengh giengz gvaq vunz rog guek.

Linghvaih, raiz fwen gaej yungh cih “dih”,ndaw Fwencuengh miz cih “dih” mbouj hab yijfaz Vahcuengh, hix mbouj dwg gij daegsaek Fwencuengh, cijaeu haeujsim, cih “dih” yungzheih baex hane.

Lumj：

1.Ngoenzneix dih swnghhoz,

Gij hoj bae mbouj dauq,

Ndaej gaij baenz：

Ngoenzneix gwndaenj ndei,

Gij hoj bae mbouj dauq.

2.Banseiz dih sevei,

Yienghyiengh ndei liuxnauq.

Ndaej gaij baenz：

Aenseiq banseiz neix,

Yienghyiengh ndei liuxnauq.