Mboengqgonq, gou ndaej camgya aen hozdung Gvangjsih Minzcuz Bause “caezcaemh byaij Gvangjsih · camh Liujcouh” daengx meizdij hengzdoengh, dou bae daengz Liujcwngz Yen, caenda raen Liujcwngz Yen guh hong dajcauh yiengh minzcuz doxgiet cinbu guh ndaej gig ndei, ndawsim laeglemx gyaez gizde.

Liujcwngz Yen miz Cuengh、Gun、Mulauj daengj lai aen minzcuz comz youq, lij miz daihbuek vazgyauz doenghbaez daj guekrog dauqma, gak cuz yinzminz ndaej youq aen ranz hung neix doxndiep doxgyaez、doxbang doxcoengh, doengzcaez guh gwn.

Dou youq Liujcwngz guh caijfangj song ngoenz, daengx aen duenzdoih baen baenz seiq aen siujcuj, couh lumj seiq aen senhfunghdui, ndonj daengz gak gehgungx bae damqyawj gyoengqde baenzlawz hengzguh hong dajcauh yiengh minzcuz doxgiet cinbu. Aen siujcuj dou youq Liujcwngz Yen Hingzcwng Swnjbihgiz、 Aen Cungsim Yenzgiu Oij、 Fuzhuj Vazgyauz Gvanjlijgih geij giz neix ndaejnyi aen doek aen gojsaeh gamjdoengh vunz, seizneix dauq- ngeix hwnjdaeuj lij lumj denyingj baez muq baez muq nei yienh’ok najda.

Dou caijfangj giz daih’it dwg Hingzcwng Swnjbihgiz. Byaij haeuj ndaw ding, gwnz ciengz venj miz baenz fuk baenz fuk dozveh caeuq byauhyij, yienh’ok gak aen minzcuz Liujcwngz Yen doxgiet haenqguh、doengzcaez hwngfat, hawj vunz yawj le roxnyinh daengz daengx ndang raeujrub rengzrwd. Gizcangj Lij Myauz cingzndat fwgfwg coh dou ciengzsaeq gaisau naeuz, gaenh bi daeuj gyoengqde ciuq hong baijbouh gak gaep dangjveij、cwngfuj baihgwnz, yungzhab gij eiqsik caezcaemh Cunghvaz Minzcuz haeuj hong ngoenz- naengz bae. Bouxguhhong ndaw giz mboujdan sug guh yezvu, lij rox caeuq vunzlai doxgyau, naihsim dap mizgven vwndiz, fugsaeh cwngvu caeuq gij leixniemh minzcuz doxgiet yungzhab ndaej ceiq ndei, hawj moix boux vunz ndaw hoz cungj roxnyinh daengz bonjfaenh youq gyang ranz hung lai minzcuz guek raeuz. Baengh aen cawjdaez “lamz cwng’vu” ingj- ciuq “sigloux hoengz” de, haenqrengz haiguh hong dajcauh minzcuz doxgiet cinbu, aeu ndaej cingzyauq yienhda, caux ok aen gugmienh moq ndaw danvih hingzcwng gihgvanh, sawj Liuj- cwngz Yen banhsaeh bienq baenz daengx guek ceiq fuengbienh ceiq yinzsing’va.

Dingq Lij gizcangj gaisau gvaq le, gou lumj yawjraen le benq dieg miz vuedlig caeuq maqmuengh ndeu, ndaw hoz gag mboen naeuz：

Hong minzcuz cwng’vu,

Liujcwngz guh baenz ndei,

Cig ndaej vunz ciuqei,

Wnggai caez doigvangq.

Biek Hingzcwng Swnjbihgiz le, dou youh bae caijfangj Liujcwngz Yen Aen Cungsim Yenzgiu Oij. Baez yamq haeuj yenzgiu cungsim, raq heiq singjsien ndeu ci gvaq naj daeuj. Yawj daengz gaiq baizbenj hoij bangxciengz de couh gag rox, gizneix bietdingh dwg gizdieg cienmonz ung saehnieb diemzvan, dwg gizdieg yienjloh ukgvai boux gohyenz yinzyenz.

Boux fucwz dazyinx de naeuz dou nyi, aen yenzgiu cungsim seizneix gungh miz 10 boux vunz guhhong, 8 boux dwg vunzgohyenz, gyoengqde bouxboux ukgvai miz dungxcaiz, daegbied dwg Luz Vwnzsiengz caeuq Cwngh Gizsuz song boux lauxhangz neix, songde dazyinx daengx ban vunzgohyenz, mbouj lau dwgrengz, haenqguh lai bi, ciengzciengz bae daengz gyaeujnaz gyaeujreih, caeuq boux ndaem oij gangjgoj doxgyau, doengzcaez damqra diuz roenloh hwngfat canjnieb ndaem oij. Doengzseiz lij caeuq baihrog lai aen dayoz、gohyenz danvih guh gisuz doxgap. Gyoengqde gonqlaeng ung ok haujlai oij binjcungj moq, ceiq mizmingz dwg Gveiliuj 05136, cungj oij neix mbouj yungzheih dai, lij ndaem ngaih, canjliengh sang, hamz diengz lai, senq youq Gvangjsih、Yinznanz、Gvangjdungh daengj dieg doigvangq ndaem, gijgvangq daemx 500 fanh moux. baenz aen binjcungj byauhcising oij daih daihhaj vuenhcungj guek raeuz. Vihneix, aen yenzgiu cungsim caemh ndaej “daengx guek nungzyez hidungj senhcin danh- vei”“Gvangjsih gohyoz gisuz senhcin ciengj itdaengjciengj” daengj lai yiengh mingzdaeuz.

Gyoengq vunzgohyenz neix guh gij hong de caen doiq ndaej gvaq gij mingzdaeuz neix lo. Gyoengqde yungh cienzbouh simgei caeuq raemxhanh, guh ok fan saehnieb hung diemzvan, mboujdan dwg vih daezsang canjliengh caeuq caetliengh oij, engq youqgaenj dwg gvansim gij saedceij boux guh reihnaz lajmbanj baenzlawz cij gvaq ndaej ndei. Couh lumj Luz Vwnzsiengz gangj coenzvah de naeuz:“Maqmuengh boux ndaem oij yied ndaem yied van, mboujdan ndaej duetgungz, lij ndaej baenzfouq.”

Gou youq ndaw hoz gingqfug gyoengq vunzgohyenz neix, nyaenx mbouj ndaej gag ngon fwen naeuz：

Cangh gohyenz gaenxgyaek，

Cingznaek ganq “ceh van”，

Ndaem oij canjliengh sang，

Ranzranz caez vuenheij.

……

Haet daihngeih gwn ngaiz- romh gvaq, dou dingq bause anbaiz, laebdaeb bae caijfangj Fuzhuj Vazgyauz Gvanjlijgih.

Bae daengz Fuzhuj Vazgyauz Gvanjlijgih, roxnyinh daengz benq diegnamh gizneix lai unq lai raeuj, gizgiz cungj miz raq heiq rang caz. Gvanjlijgih fucujyin giem Nungz- cangz Cazcangj cangjcangj Hoz Haijvaz lwnh naeuz, gizneix caz canjnieb hwngfat hoenghhwdhwd, gaenq baenz hangh ginghci souhaeuj youqgaenj ndaw gvanj- lijgih ndeu. Gaenh bi daeuj, aen cazcangj de yinxhaeuj gij hong guhcaz senhcin, guh ok caz engq ndei, mboujdan gai daengz daengx guek gak dieg, lij gai daengz guekrog bae, aeu ndaej ginghci yauyiz cingq ngoenz beij ngoenz ndei.

Fuzhuj Vazgyauz Gvanjlijgih guenj miz 3000 lai vunz, dingzlai cungj dwg gij lwg gij lan doengh boux Vazgyauz daj Yeznanz dauqma ndaw guek haenx, gyoengqde daiq vwnzva caeuq conzdungj bonjfaenh dauqma, youq benq dieg neix comz giet baenz ndaek ndeu. Gyoengqde caeuq doengh gij vunz bonjdieg guhdoih cab youq, dox aeueiq, dox bauyungz, doxhag doxbang, caez- caemh caux ok gij ndwenngoenz gyaeundei. Ndaej cazcangj daiqdoengh, gaenxgyaek guhhong, doxcanj ndaem caz, caux ok gij saedceij vuenyungz. Gyoengqde gag mbangj gag gangj gij vah bonjfaenh, miz gangj Cuengh, miz gangj Gun, miz gangj Begvah, miz gangj Yinghyij, hoengz ngoenz- naengz cungj ndaej doxhuz caemh youq, gangjgangj riuriu, lumj dwg caemh ranz vunz ndeu.

Youq Fuzhuj Vazgyauz Nungzcangz Cangzsijgvanj, aen caijden hung bangxciengz ndawding cuengqingj senhconz sibinz, gou daj gyaenx ndaej yawj daengz gij cingzgingj nauhnauh yiedyied gak cuz yinzminz angqcomz guhdoih. Gyoengqde daenj gak cungj gak yiengh buhvaq ndeiyawj angjda, angqyangz diuq foux、vuenlag eu fwen, doxcaeuq angq gvaq ngoenzciet “sam nyied sam”. Yawjraen faenh cingzngeih naekna lai aen minzcuz neix, gou fwt roxnyinh lumj ndaej ndoet gwn cenj raemxcaz ndeu, heiqhom iemq haeuj daep haeuj bwt bae, sawj vunz gag mbouj rox mbouj nyinh haengjgyaez cungj gwzgiz lai aen minzcuz Cungguek raeuz neix.

Ndwn youq gwnz Gvangjcangz Fuzhuj Vazgyauz Gvanjlijgih, gou roxnyinh minzcuz doxgiet couh lumj diuzsai nyangqnyat ndeu, nangq lienz gak minzcuz yinzminz hwnjdaeuj ndaetndwtndwt bae, hawj gyoengqde giendingh saenqsim, doengzcaez haenqrengz guh, doengzcaez hoenghvuengh, doengzcaez veh aen lamzdoz daihfukhwng Cunghvaz Minzcuz.

Yawj lai cix gvai, raen lai cix rox, baez caijfangj hozdung neix, gou cingqcaen ndaej roxyiuj, gij eiqsik caezcaemh Cunghvaz Minzcuz raeuz, gizsaed couh yo youq gak aen fuengmienh gwnzbiengz raeuz. Mbouj saenq mwngz yawj Liujcwngz Yen, mbouj guenj dwg boux guh fugsaeh cwngvu cauhmoq, roxnaeuz boux- gohyenz gaenxgyaek ung ceh’oij, roxnaeuz gyoengq Vazgyauz daj guekrog dauqma doxgap haenq- rengz guh caux ngoenz moq, cungj dwg yungh saedsaeh hengzdoengh geqlwnh gij gojsaeh sawj vunz yaek maez yaek fiz haenx.

Mwh dou guh sat caijfangj yinvu le naengh ci dauqma Namzningz, gou miz di sij mbouj ndaej biek bae, daj cueng ci caiq yawj benq dieg cingz naekgywggywg Liujcwngz haenx baez ndeu. Gizde moix goengq bya moix diuz rij, moix go faex moix go nywj, cungj lumj yaek hah dou gaejbah lizgyae, laebdaeb dingq gyoengqde gangj gij goj vunz haenx. Gou fwtfwh fwen yinx lo, langh sing gag eu hwnjdaeuj：

Gizneix dieg gyaeu lai，

Vunz ukgvai rox guh，

Raemxmba lae conghmuh，

Etceiz guh baenz gwn.

Lai minzcuz doxgiet,

Yied guh yied baenz ndei,

Dangq caemh ranz doxgyaez,

Doengzcaez gvaq ngoenz moq. Gou siengsaenq, daengzcog, Liujcwngz Yen gij hong dajcauh guhyiengh minzcuz doxgiet cinbu bietdingh guh ndaej engq ndei. Gou hix yaek aeu lailai guh fwen ndei daeuj danqhaenh, sawj engqlai vunz roxnaj Liujcwngz、gyaez Liujcwngz!