Vih doidoengh minzcuz doxgiet baenaj engq haeujlaeg simvunz， geij ngoenz neix， duenzlwnhgangj Bwzswz Si daengz Lozyez Yen hai hoih baugau ciendaez lwnhgangj gij eiqsik caezcaemh Cunghvaz Minzcuz.

Aen hoih baugau hopndaet gij swhsiengj youqgaenj Siz Ginbingz cungjsuhgi gvendaengz gyagiengz caeuq gaijndei hong minzcuz bae hai, daj “couqmaenh gij eiqsik caezcaemh Cunghvaz Minzcuz dwg gijmaz”“vih gijmaz couqmaenh gij eiqsik caezcaemh Cunghvaz Minzcuz”“baenzlawz couqmaenh gij eiqsik caezcaemh Cunghvaz Minzcuz”“aeu gijmaz couqmaenh gij eiqsik caezcaemh Cunghvaz Minzcuz” daengj seiq aen fuengmienh, giethab Gvangjsih caeuq Bwzswz hwnqguh gih guhyiengh couqmaenh gij eiqsik caezcaemh Cunghvaz Minzcuz bae guh hidungj lwnhgangj, lwnhgangj cingcuj, neiyungz fungfouq, cekgej laegdaeuq mingzbeg, doiq Lozyez Yen guh ndei hong couqmaenh gij eiqsik caezcaemh Cunghvaz Minzcuz miz cijdauj yiyi ndei.

Lozyez Yen mizgven lingjdauj naeuz, baihlaeng aeu yungh ndei baez lwnhgangj neix, laebdaeb gya’gvangq gyalaeg son’gyauq couqmaenh gij eiqsik caezcaemh Cunghvaz Minzcuz. Daengx yienh gak gaep gak bouhmonz aeu haeujlaeg roxyiuj gij youqgaenj caeuq gaenjgip couqmaenh gij eiqsik caezcaemh Cunghvaz Minzcuz, aeu hagsib gvancez gij swhsiengj youqgaenj Siz Ginbingz cungjsuhgi gvendaengz gyagiengz caeuq gaijndei hong minzcuz guh cwngci yinvu youqgaenj seizneix caeuq baihlaeng； aeu haeujlaeg vatra caeuq senhconz gij denjhingz sinhcin caeuq saehsaed gamjdoengh youq ndaw saehnieb minzcuz doxgiet baenaj nyoenx okdaeuj haenx, caux heiqfaenh ndei daengx biengz gvansim、 daemxcengj、 bae guh saehnieb minzcuz doxgiet baenaj； aeu gvancez couqmaenh gij eiqsik caezcaemh Cunghvaz Minzcuz haeuj daengx gocwngz daengx yienh gak hangh hong， hawj minzcuz doxgiet baenz daejsaek ceiq gyaeundei， coenghrengz ginghci sevei aen yienh hwngfat ndei saed yamq coh mbaeklae moq.

Mbat hoih baugau lwnhgangj neix mboujdan miz gihgvanh ganbu, lij daegbied iucingj le bouxguhhong segih、 hagdangz lauxsae hagseng daibyauj、 giyez cizgungh daengj camgya. Gyoengqvunz daj mbouj doengz dieg daeuj comz youq giz ndeu, doengzcaez supaeu gij ligliengh minzcuz doxgiet baenaj. Gyoengq lauxsae hagseng hagdangz foenxfoenx naeuz miz daezsingj lai, yaek yungz gij hag ndaej haeuj swnghhoz ngoenz- naengz sonhag caeuq hagsib； gyoengq cizgungh giyez roxyiuj gij youqgaenj youq ndaw swnghcanj ginghyingz gyagiengz gak cuz yenzgungh doxgiet doxgap, laebceiq vih giyez hwngfat、 yienh ginghci hwngfat ok rengz.

（卢梦桃/Luz Mungdauz）