Vangz Gencingh yawjraen bakdou diep miz mbaw ceijhau ndeu, gwnzde sij “Lij Danenz”, bakdou ngeih laeuz hix miz, de rox lauxdoengz Lij Danenz gaenq daiq gunghyinz daeuj lo.

Cib’it

Dieghong nauhnauh yiedyied, sing’yaem hongdawz dienhdoengh cauz rwz yaek nuk. Canghfaex gawq benj dingq denva, bouxgvethoi aeu suijniz hau fung congh geh, suijdengungh mizmbangj gvej ciengzcauz， mizmbangj haemq guenjraemx, mizmbangj rag dienhsienq, gizgiz mijraq mbin, bouxboux daenj goujcau.

Vangz Gencingh fwngz gaem dendungz rongh, yawjraen gizlawz mbouj bingz couh heuh vunzmbanj caij lae hwnjbae yungh fouj raemj giz dod bingz bae, gij gehciengz mbouj soh, aeu suijniz caeuq hoi gyaux gvet hwnjbae, yienzhaeuh dawz “cik” raez gvet soh cingq.

Vangz Gencingh dwk denva hawj Lungzingh aeu hoi. Lij Danenz ngoenz daihsam caengj daiqdoih daeuj dieghong, couh heuh Lungzingh rag song bak bau nizswj- fwnj daeuj gonq, Vangz Gencingh aeu hajcib bau.

Lungzingh gig geizheih, Vangz Gencingh doq hai cienz, naeuz:“Lauxdoengz rag baez hoi daeuj gou couh hai baez cienz, seizneix caengz yungh lai, gvaq geij ngoenz caengj rag lai di.”

Dendih hwnj roengz mbouj daengx, Vangz Genhuj naeuz:“Caengz daihsam mbouj suenq sang, raeuz umj hwnjbae.” Vangz Gensaiz doq umj song bau hwnj sam laeuz, Vangz Gencingh gyaux hoi baenz le gvet hwnj ciengz, roxnyinh mbouj ndei, aenvih gij naez dawz caxhoi gvet hwnj ciengz bae mbouj nem ciengz geijlai, de gvet song bingzfueng sawq yawj, yienzhaeuh heuh gyoengqvunz daengx roengzdaeuj mbouj gvet lo, daihgya hwnj gak laeuzcaengz bae yawj gizlawz ciengzmienh miz congh iq laeg lai couh aeu suijniz dienz bingz, daegbied dwg giz gyaeuj gokyaem mbouj soh, aeu fagsiuq siuq bingz siuq soh.

（14）