2024 nienz 12 nyied 12 hauh daengz 15 hauh, gou riengz gyoengq benhciz、gicej Gvangjsih Minzcuz Bause bae Liujcouh Si Liujcwngz Yen caijfangj. 12 hauh banngoenz daihgya caemh youq Gvangjsih Liujgungh Gihgai Gujfwn Youjhan Gunghswh cazyawj. Banringzgvaq, gyoengqdou baen baenz seiq aen cuj guh caijfangj. Cuj dou daengz Liujcwngz Yen Vwnzcangh Siujyoz caijfangj.

Yamq haeuj douhung hagdangz seiz, dou doeksaet yat, dangqnaj cauhcangz miz bak lai boux hagseng cingq lienh raiz cihmauzbit, ciengzmienh sekda, gij yiengh ciensim haeujeiq gyoengq hagseng gig damhdingh youh dwggyaez, lumj bouxhung iq onjwt ndeu. Gij cih gyoengqde miz goek miz byai, miz vunq miz yiengh, hawj dou bouxngonz mbouj ndaej mbouj haenh.

Cauhcangz dangqnaj dwg daizheiq, doihlijyiz cingq yienjheiq, hagseng daenj gij buhvaq gyaeundei ciuhgeq, gij dungcoz、 ronghda、 biujcingz cungj yienh’ok yiengh gyaeundei gujdenj haenx, dou ngonz ndaej maezmwd, gou laihnaeuz swhgeij daengz aen guek gig miz lijyiz ciuhgeq.

Laxlawz, Vwnzcangh Siujyoz dawz conzdungj vwnzva——sijfap、lijyiz buen haeuj hagdangz, yungzhaeuj sonhag. Vwnzcangh Siujyoz yawjnaek beizyangj hagseng baenz boux vunz yendai“rox leix doeng leix souj leix” Cungguek. Couh dwg aeu “leix” daeuj “coi” hag, aeu yendaiva lijyiz son’gyauq guh haedsim, daeuj hwnqguh vwnzva hagdangz; beizyangj vunz yendai yinzgwz caezcienz、simsaenz cangqheiq，byaij diuz roen miz daegsaek hwngfat swhgeij. Vihliux yienjok gij leixniemh sonhag, hagdangz cauhlaeb diuz cangzlangz conzdungj vwnzva he.

Cangzlangz gizneix miz gij lijyiz seiqgyaiq; miz lijyiz gozci; miz lijyiz Cungguek, miz lijyiz gak minzcuz. “Mboujlwnh gwn byaij, bouxlaux gonq bouxcoz laeng” “miz ciq miz boiz, caiq ciq mbouj nanz” “vunz miz duenj, gaej bae giet; vunz miz sei, gaej bae lwnh” daengj doenghgij vah neix, cihsaw hotvah gig ginghdenj, coenzcoenz laegdaeuq. Cangzlangz heiqfaenh vwnzva naekna, hawj gou roxnyinh dangqnaj gvangqlangh ronghsag; lij lumjbaenz sup ndaej gij hom lijyiz vwnzva conzdungj; hawj vunz roxnyinh hoenzvunz bienq ndaej gaugviq. Cangzlangz mboujdan dwg gij gingjsaek gyaeundei hagdangz, engq dwg aen daemz conzdungj vwnzva hawj gyoengq hagseng dajcaemx ndeu.

Neix hawj gou siengj daengz: “Vunz fouz leix cix dai; saeh fouz leix cix baih; guek fouz leix cix luenh” “vunz miz leix cix onj, fouz leix cix yiemj” daengj doenghgij vah mizmingz conzdungj neix.

Mungz yaucangj lij lwnh dou nyi: “Gij daegsaek hagdangz lijmiz dajcauh cozbinj seiswz、sijfap daengj. Doenggvaq ‘Ranzguhhong Vangz Gangmeij Sawgun Vwnzva’ daeuj hwngfat sawsei vwnzva hagdangz, cujciz lauxsae hagseng guh doxdax dajcauh cozbinj, couhdwg doenggvaq sijfap raiz gij sei swhgeij daeuj bingzbeij. Guhbaenz gaiq vwnzva daegsaek “sei saw hab ndeu” .

Mungz yaucangj daiq dou bae “Ranzguhhong Vangz Gangmeij” ngonz sijfap cozbingj. Gizneix ndaej naeuz dwg aen canjlanjgvanj sijfap cozbingj ndeu, gwnz ciengz venj rim sijfap cozbingj, miz cozbingj bouxmizmingz, miz cozbinj lauxsae caeuq hagseng ndaej ciengj haenx. Cihsaw roengz bit miz rengz, raeuzret, bitveh miz goek miz byai, ndeiyawj dangqmaz. Baenz fuk bae ngonz, roxnyinh cihcih rox gangjvah, hothot miz gojgaeq, seizneix simhoenz caeuq rizmaeg caemh yungzhab, hawj vunz roxnyinh daengz ndwenngoenz an’onj.

Ngoenz daihngeih, dou youh daengz Liujcwngz Yen Sizyen Siujyoz caijfangj. Dou haeuj hagdangz seiz, hagseng cingq guh gogenhcauh, gogenhcauh gig daegbied, caijdiu、baujcauh、vujsuz caemh guh, guhbaenz cungj dijcauh moqsak geizheih ndeu, hawj dou roxnyinh gig singjsien.

Gij daegsaek Sizyen Siujyoz couh dwg dawz conzdungj caijdiu haeuj hagdangz, bien baenz cungj dijcauh yungzhab lai cungj yenzsu haenx, hagseng gig maij. Caijdiucauh ndaej gikfat hagseng nyinhdoengz caeuq maijgyaez heiq conzdungj vwnzva, neix mboujdan ndaej hawj hagseng lienhndang, lij ndaej hawj hagseng roxnyinh daengz gij heiq vwnzva Cungguek gvangqlangh naeklaeg, neix hawj ndwenngoenz hagdangz demlai yinxdaeuz, hix ndaej hawj conzdungj vwnzva sanqfat rengzhoengh. （1）