Go’ndoek mwnnoengq, gofaex mwncup, ranzlaeuz sang daemq doxcab, roenmbanj suijniz doeng haeuj gak hoh, laj gorungz bak mbanj geij bouxlaux cingq gangjgoj……Laizbinh Si Siengcouh Yen Cunghbingz Cin Mbanjsangbingz caeuq saek aen mbanj Guengjsae cungj doxlumj, mbouj miz maz mbouj doengz. Hoeng byaij haeuj mbanj bae, dingq gij gojgaeq de, dingzlai cungj geizheih——Song ranz mbouj dwg beix- nuengx caen caemh youq aen ranz ndeu lai bi; aen giyez 1700 goengleix gyae ndeu gien ngaenz youq neix hwnq hagdangz. Youq gizneix, vunz doxndei doxbang couh lumj go- ndoek henz roenmbanj、haeuxyangz ndaw reih nei baez yawj couh raen, daihdaih ciepcienz.

Aen Ranz Ndeu, Youq Song Ranz Vunz

Yaek naeuz aen ranz Mbanjsangbingz lawz “ndeiyawj” lai, couh mbouj ndaej mbouj dwen aen ranzcoj Vwnz Siujlanz lo. Naeuz aen ranz neix lizsij miz geijlai naih ma, de ngamq miz 30 bi, naeuz aen de hwnq ndaej geijlai gyaeu ma, aen de cij dwg cungj ranzvax 20 sigij bet goujcib nienzdaih ciengz raen haenx, dan dwg aenvih aen neix caemh youq gvaq song ranz vunz mbouj doengz dieg, cij hawj vunz miz yinxdaeuz lai. Moix baez miz vunz daeuj yawj aen ranzcoj neix, dingq daengz gij gojgaeq song ranz vunz mbouj doengz yienhsingz、mbouj doengz minzcuz soh caemh youq aen ranz ndeu, cungj haenhnaeuz geizheih lai lo.

Doiq bouxwnq daeuj gangj dwg geizheih, hoeng doiq Vwnz Siujlanz caeuq vunzranz de daeuj gangj ne bingzciengz lai lo. Vwnz Siujlanz ndaejgeiq, youq bi 1985 baedauq, ranz bonjfaenh caeuq ranz “goeng’au” Vwnz Ginhyenz caez hwnq sam aen ranzvax, song ranz vunz gag youq buenq ndeu. Lw aen ranz sam gan gvangq、song gan laeg haenx dwg song ranz caez yungh. Aen ranz hwnq ndei le, daihgya caemh aen doulaux ndeu haeujok, youq aen rogding ndeu gangjgoj, miz nanz miz hoj hix doxbang, gijneix couhdwg gij ndwenngoenz gouj boux vunz laeng song ranz neix.

Vwnz Siujlanz cam gvaq daxgoeng de Vwnz Yihwngz, vihmaz bouxwnq cungj dwg gak ranz gag youq, raeuz cix caeuq bouxwnq caemh aen ranz ndeu? Daxgoeng yienghneix han: “Gaxgonq gungz, raeuz mbouj miz faex guh loz, gyoengqde ndei gangj, gyoengqde ok faex, raeuz ok rengz, gaiq dieg neix daihgya miz faenh, aen ranz hwnq hwnjdaeuj le, gak ranz gak buenq.”

Seiz hwnq ranz Vwnz Siujlanz ngamq doeg siujyoz, gij saeh seizhaenx de dingzlai geiq mbouj hwnj lo, hoeng de ndaejgeiq, aen ranz neix dwg gyoengq beixnuengx caeuq bouxau、 bohlungz ndaw mbanj bang hwnq hwnjdaeuj, daxgoeng caeuq “goeng’au” doxndei, song ranz vunz mbouj miz maz ngaekngeu gvaq, gvaq ciet gvaq cieng lij ciengzseiz caez youq rogding baiqcoj dem.

Vwnz Siujlanz heuh Vwnz Ginhyenz song gvanbaz “goeng’au” “buzau”, saedsaeh song ranz vunz mbouj dwg caen beixnuengx. Ranz Vwnz Ginhyenz goxgonq dwg youq Ginhsiu Yauzcuz Swciyen Dacangh Yangh Sanghva Cunhveij Mbanjvangzmauz, haenx dwg aen mbanj iq ndaw Byadayauzsanh, bya lai reih noix, gyaudoeng mbouj bienh. Vihliux ndaw ranz ra ndaej gwn, Vwnz Ginhyenz couh bae lajbya co reihnaz ndaem, gij reihnaz couh youq henz Mbanjsangbingz. Seiz ndai reihnaz, Vwnz Ginhyenz roxnaj Vwnz Yihwngz boux vunz Mbanjsangbingz neix, song vunz baenz baengzyoux lo, ndei lumj beixnuengx nei.

Vwnz Dazcouh caeuq daxboh Vwnz Ginhyenz、daxmeh、dahbeix youq Mbanj- sangbingz caemh youq duenh ndeu gvaq, aen ranz laux neix geiqloeg le ciuhvunz de geij duenh ndwenngoenz youqgaenj haenx, lumjnaeuz baenzgya seng lwg. Bi 1992, yah de mizndang lo, lwg neix dwg lwg hung songde. Ngoenz ndeu, yah de roxnyinh yaek seng lo, Vwnz Dazcouh couh hai aen soujfuz dohlahgih soengq yah de bae Cunghbingz Cin Veiswnghyen, aen ci ngamq ok mbanj mbouj nanz, lwgnding couh okdaeuj lo, ngeix daengz roen gyae gumzgamx, gyoengqde couh dauqma ranz Mbanjsangbingz. Seizde dax- meh Vwnz Dazcouh gaenq mbouj miz lo, bang goq yah lwg dwg ranz boh’au mehsimj Mbanjsangbingz, ranz boh’au mehsimj beij gyoengqde caeux bi ndeu daj Mbanj- vangzmauz buen daengz Mbanjsangbingz. “Vunz aen mbanj neix gig ndei.” Dwen daengz gij ndwenngoenz Mbanjsangbingz, Lij Moufangh(mehyah Vwnz Dazcouh) naeuz, “Gaxgonq dajndaem nyaengq mbouj gvaqdaeuj, vunzmbanj cungj doxbang guhhong.”

Aen Mbanj Ndeu, Lienzciep Song Aen Yen

Bi 1995 baedauq, Mbanjvangzmauz coih doeng le roen moq, vih fuengbienh guenjleix aenndoeng caeuq reihnaz, Vangz Ginhyenz daengx ranz buen dauq Mbanjvangzmauz, Vwnz Siujlanz caeuq daegnuengx de hix gonqlaeng okrog bae doegsaw、guhhong, aen ranzcoj mbouj caiq nauhyied, hoeng de yo miz gij ngeixdauq song ranz vunz, hix raen gij ndwenngoenz Mbanjsangbingz gak minzcuz doxhuz doxbang neix.

Mbanjsangbingz youq baihsae laj din Byadayauzsanh, dwg aen mbanj Bouxcuengh、Bouxgun、Yauzcuz、Myauzcuz、Dungcuz daengj minzcuz cabyouq ndeu. Aen mbanj youq gapgyaiq Siengcouh Yen caeuq Ginhsiu Yauzcuz Swciyen, song yen cungj guenj de. Song yen aeu diuzmieng baizraemx hoenghgvaengh guh hanh, baihbaek dwg Ginhsiu guenj, baihnamz dwg Siengcouh guenj.

Diuzsienq faen’gyaiq song yen cingq- ngamj gvaq ranzcoj Vwnz Siujlanz, yienghneix couh raen miz aen ranz ndeu venj baizdou song yen cungj yienghsiengq geizheih haenx lo——Siengcouh Yen Cunghbingz Cin Mbanjsangbingz 44 hauh, Ginhsiu Yauzcuz Swciyen Dacangh Yangh Sanghva Cunh Mbanjsangbingz 11 hauh.

Miz aen yienghsiengq neix caeuq gij lizsij vunz Mbanjsangbingz senj dieg mizgven. Cunghbingz Cin Da’gya Cunh Cunhveij fucujyin Vangz Dunghlingz gangj- naeuz, seizneix Mbanjsangbingz miz 139 hoh 470 vunz dwg vunz Siengcouh, 31 hoh 120 vunz dwg vunz Ginhsiu. Gij vunz Bouxgun caeuq Bouxcuengh ndaw mbanj dingzlai daj seizneix Gveigangj Si Bingznanz Yen senj daeuj, daengz ngoenzneix gaenq miz bak lai bi lo; vunz Yauzcuz youq bi 1949 baedauq daj geij aen mbanj ndaw Byadayauzsanh Ginhsiu senj daeuj; vunz Myauzcuz、Dungcuz dwg gyoengq bawx cib baj ngeihcib bi neix haq haeuj mbanj.

Vunzmbanj song yen coengzlaiz dwg doengz rauq doengh naz ndeu, doengz gwn mboq raemx ndeu, doengz ndaem ndoeng mak ndeu, doxhuz doxndei, mbouj faen gijmaz baenzlai. Vunzmbanj Cangh Yizgvei 88 bi lo, de lij ndaejgeiq, bi 1988 gonqlaeng, geij hoh vunz Yauzcuz daj ndaw lueglaeg senj daeuj, gaxgonq gyoengqde youq ndaw lueg ndaem hing、faex lai, mbouj rox ndaem haeuxnaz geijlai, “dou couh son gyoengqde sai gyaj, baeznaengz hix doxlwnh baenzlawz daj- ndaem”. Vunzmbanj Vwnz Dazlaiz ndaej 80 bi haenx bang gvaq geij hoh vunz hwnq ranz, aenranz Vwnz Yihwngz caeuq Vwnz Ginhyenz couhdwg de caeuq geij boux vunzmbanj bang hwnq, “Seizhaenx cungj dwg mwngz bang gou, gou bang mwngz, mbouj gangj ngaenz bw”.

(caengz sat)