Ranzmbanj gou youq baih- saenamz Bingzgoj Si Daibingz Cin, nep bya ndawrungh, raemx mbouj lai, reihnaz noix. Ngamq faen reihnaz daengz ranz gak boux gag guh seizhaenx, vunzmbanj ndaem haeux- yangz ndaem duhhenj, gwn imq daenj raeuj， hoeng mbouj miz ngaenz yungh, baenzlawz guh cij miz ngaenz? Bouxdaeuz caeuq vunzmbanj cungj haeujsim bae ra monzloh.

Doeklaeng, baihgwnz heuh vunz- lai ndaem oij, seiz ndeu, ndawmbanj、 doenghnaz、 gwnzreih cungj ndaem oij lo, geij bi gvaqbae, vunzmbanj gai oij ndaej ngaenz dahraix lo, ndawmbanj ranzlaeuz、 giceh、 roen moq yiengh- yiengh miz, dauqcawq bienqsadsad, vunzmbanj engq gaenx ndaem oij lo.

Geiqndaej bi 2012, vunzmbanj sou oij sat le, ranzranz dongj(fan) goek oij, naeuz baezneix yaek ndaem oij moq Gveiliuj 1 hauh caeuq Gveiliuj 2 hauh, lij naeuz song cungj oij moq neix maj vaiq、 go hungsang, caemhcaiq hamz dangz sang. Vah gangj caen mbouj caen, aeu yawj doeklaeng baenz mbouj baenz. Vunzmbanj ndaem song cungj oij neix, bi nduj moix moux couh sou ndaej 10000 lai gaen oij, moux beij oij doenghbaez lai sou ndaej 2 dun, vunzmbanj bouxboux najhai najriu.

Daj baezhaenx hwnj, gou couh geiq Gveiliuj 1 hauh caeuq Gveiliuj 2 hauh song cungj oij neix youq ndawsim, cungj naemj rox gij din’oij neix daj gizlawz ung okdaeuj, hojsik ngoenzngoenz nyaengq, itcig mbouj miz seizgan bae guh gij saeh neix.

2024 nienz 12 nyied 12 hauh daengz 15 hauh, Gvangjsih Minzcuz Bause “caezcaemh byaij Gvangjsih · camh Liujcouh” daengx meizdij hengzdoengh youq Liujcouh Si guh. Gou ndaej camgya baez hozdung neix, geij ngoenz haenx dou faen guh seiq aen cuj daengz Liujcwngz Yen bae caijfangj.

12 hauh byonghngoenzgvaq, gou gaen caijfangjcuj daeuj daengz Liuj- cwngz Yen Aen Cungsim Yenzgiu Oij caijfangj.

Liujcwngz Yen Aen Cungsim Yenzgiu Oij youq gyang reih oij, seizneix cingq dwg seiz sou oij, yenzgiu cungsim dauqcawq biu rang oij. Itdingh mbouj miz geijlai boux rox gizneix dwg dieg yenzgiu oij, yawjyawj seiqhenz, mbouj raen miz saek aen ranz, cij miz aen laeuz seiq caengz he gag youq gizde, aen laeuz miz di gaeuq, byawz hix naemj mbouj daengz aen laeuz neix dwg laeuz yenzgiu oij, hoeng byawz rox, couhdwg aen laeuz neix, daengx guek seiq go oij couh miz sam go youq aen laeuz neix yenzgiu okdaeuj, dwg aen laeuz neix vih saehnieb swnghcanj oij daengx guek okrengz ceiq hung.

Dingqnaeuz Liujcwngz Yen Aen Cungsim Yenzgiu Oij dwg aen giekdeih cienmonz ung ceh’oij、sawq ndaem cehoij caeuq doigvangq okbae hawj vunzlai ndaem. Ndawde miz 10 boux vunz guhhong, ndawde miz 8 boux vunzgohyenz. Gonqlaeng miz lai boux guekgya lingjdauj、swcigih lingjdauj daengz gizneix daeuj cazyawj caeuq cijdauj hong.

Dingqnaeuz, cungsim bi 1976 dwg Guekgya Gohveij caeuq Swcigih Gohveij guhdoih cauhlaeb, bi 1988 gaij mingz guh “Liujcwngz Yen Aen Cungsim Yenzgiu Oij”, bi 2008 baenz aen danhvei baenghdak hwnqguh aen camh cunghab sawqniemh Liujcwngz oij canjnieb gisuz guekgya.

Lai bi daeuj, gyoengq vunz- gohyenz Liujcwngz Yen Aen Cungsim Yenzgiu Oij, mbouj lau sinhoj, roengzrengz guhhong, yenzgiu ok le haujlai cungj oij ndei doigvangq hawj vunz ndaem, cungsim ndaej “daengx guek nungzyez hidungj senhcin danhvei” “Gvangjsih gohyoz gisuz senhcin ciengj itdaengjciengj” daengj lai yiengh mingzdaeuz.

Vunz raeuz cij rox, ndaem oij couhdwg aeu oij daeuj daet baenz gyaengh ndaem roengz namh couh baenz, mbouj miz vunz rox oij lij miz ceh. Boux cujyin daih’it Liujcwngz Yen Aen Cungsim Yenzgiu Oij dwg Cwngh Gizsu, de youq cungsim guhhong samcib bi, de aeu mbawoij daeuj ung baenz cehoij, dwg daengx guek boux daih’it ung baenz, hixdwg daengx seiqgyaiq boux daih’it.

Boux cujyin daihngeih dwg Luz Vwnzsiengz, bi 2003 gvaqdaeuj, de gag guhcawj guh hong ung oij, dwg boux hainduj laeb dijhi binjcungj moq oij Gveiliuj. De guhdaeuz ung ok 6 aen binjcungj oij moq, ndawde Gveiliuj 05136 gaenq baenz binjcungj oij ceiq ndei guek raeuz, ndaej gyoengq conhgyah ndaw guek haenh.

Boux cujyin daihsam dwg Luz Lijveih, dwg daegcoz ndeu, seizneix de cingq daiq aen doih bouxcoz ndeu haeujsim bae yenzgiu oij, ung oij.

Liujcwngz Yen Aen Cungsim Yenzgiu Oij couh dwg baenzneix mboujlwnh haethaemh, mbouj damz haemzhoj, daih ciep daih roengzsim guhhong, vihliux aeu ndaej engq lai leixniemh moq、 saenqsik moq, cungsim mboujduenh caeuq Gvangj- dungh Swngj Aen Soj Yenzgiu Oij、Fuzgen Nungzlinz Dayoz Aen Soj Yenzgiu Oij、Yinznanz Swngj Aen Soj Yenzgiu Oij、Gvangjsih Dayoz、Gvangjsih Aen Soj Yenzgiu Oij、Haijnanz Ciengz Ung Ceh Oij daengj lai aen gauhyau、 gohyenz danhvei maedsaed lienzhaeh、guhdoih gisuz doxgap.

Mwhneix, Liujcwngz Yen Aen Cungsim Yenzgiu Oij ung baenz Gveiliuj 1 hauh、Gveiliuj 2 hauh、Gveiliuj 0536、Gveiliuj 07500、Gveiliuj 07150、Gveiliuj 1539 daengj roek aen binjcungj oij moq caeuq Liujcwngz 17-190、Liujcwngz 15-41 daengj daihbuek binjcungj oij moq. Ndawde Gveiliuj 0536 youq bi 2023, daengx gih ndaem miz gaenh 500 fanh moux, ciemq daengx guek gij dieg ndaem oij 36.5%. Ndaej cwngfuj caeuq boux ndaem oij haenh, lij ndaej liedhaeuj Gvangjsih oij ndei gya gyaq binjcungj. Doengzseiz Gveiliuj 1 hauh gyoebsuenq ndaem le 100 fanh moux、Gveiliuj 2 hauh gyoebsuenq ndaem le 200 fanh moux, Gveiliuj 07150 youq daengx guek gyoebsuenq ndaem le 40 fanh moux.

Neb dah miz bya gwn, neb bya miz fwnz ndaengj(coemh), miz aen yenzgiu cungsim neix, gaenh geij bi neix daeuj, Liujcwngz Yen guh sat gij hong vehdingh 40 fanh moux gihbaujhu ndaem dangzoij, maedsaed doicaenh hwnqguh giekdeih “song sang(moux canj sang、hamz dangz sang)” 22.35 fanh moux caeuq naz oij byauhcunj sang 21.82 fanh moux. Daengx yienh dieg ndaem oij bau miz 55 fanh moux baedauq, moix bi oij haeuj cangj 250 fanh dun. Moix vunz bingzyaenz canj oij、 danhcanj、ceh ndei gagyungh caeuq yungh gisuz moq daengj fuengmienh cungj byaij bae gonq daengx gih. Saedyienh “bouxguhnaz demsou、caizcwng demlai、giyez demyauq” sam aen muzbyauh.

Seizneix, Liujcwngz Yen dwg “aen yienh giekdeih canj dangz guekgya” “aen yienh cungdenj oij guh dangz Gvangjsih” caeuq “aen yienh cungdenj guhyiengh hwnqguh oij guh dangz song sang Gvangjsih” ndaw yienh miz sam aen dangzcangj giyez, ngoenz ndaej caq oij 2.2 fanh dun.

Seizdoeng daeuj daengz Liuj- cwngz, ngiengx gyaeuj baez yawj, dauqcawq dwg oij. Ndaem oij dwg gij goekgaen souhaeuj cujyau bouxguhnaz Liujcwngz Yen. Bi 2023, daengx yienh moix vunz bingzyaenz ndaem oij souhaeuj 10092 maenz, ciemq moix vunz bingzyaenz ndaej anbaiz souhaeuj 48.61%. Gij cwngzgoj gohyenz Liujcwngz Yen Aen Cungsim Yenzgiu Oij, cingqdwg gij maqmuengh vunzguhnaz, gyoengqvunz Liujcwngz doenggvaq ndaem oij, ranzranz hwnj laeuz moq, vunzmbanj bouxboux saedceij gvaq ndaej diemzsisi.

Gij hong Liujcwngz Yen Aen Cungsim Yenzgiu Oij, cingq lumj gwnz baiz bakdou de raiz haenx ityiengh: “Hawj oij diemz haeuj ndaw sim vunzlai, hawj vunzlai gyagiengz ‘haj aen nyinhdoengz’ ”.

Nyinhdoengz guekcoj hungmbwk;

Nyinhdoengz Cunghvaz Minzcuz;

Nyinhdoengz Cunghvaz vwnzva;

Nyinhdoengz Cungguek Gung- canjdangj;

Nyinhdoengz Cungguek daegsaek sevei cujyi.

Caijfangj sat lo, gou cungj mbouj naemj byaij ok aen laeuz Liujcwngz Yen Aen Cungsim Yenzgiu Oij, gamjdoengh dwk aen sim gou mbouj ndaej caem roengzdaeuj. Baez caij- fangj neix, hawj gou saedyienh gij maqmuengh lai bi gou, hawj gou yawjraen gij maqmuengh saehnieb swnghcanj oij guek raeuz.