1 nyied 1 hauh, Hozciz Si 2025 nienz “dangjgeiz lingxdaeuz · siuhfei bangfuz” aen haw hung gungsiu Gvangjsih Vanzgyangh cienciengz youq Vanzgyangh Mauznanzcuz Swciyen Nozmen Gvangjcangz hainduj.

Youq dieg baijgai doxgaiq reihnaz, Vanzgyangh 30 lai aen giyez(hozcozse) 200 lai cungj doxgaiq reihnaz ndei youq gwnz haw gyoebcomz baijgai, miz mouhom、vaizhom caeuq raet、 haeux、 cazyouz、 ciengqyouz、 gyaeqgaeq doj、 makgam daengj doenghgij doxgaiq reihnaz Vanzgyangh mingzdaeuz daegbied ndei haenx, supyinx le ndaw yienh haujlai vunz daeuj genj cawx.

Hozdung laeb miz daizheiq、 dieg doxgaiq reihnaz、dieg doxgaiq cunghab、 dieg baijgai gijgwn ndei、 dieg guhcaemz mizyinx、 dieg geiq soengq doxgaiq daengj, bang gij giyez gyagoeng siugai doxgaiq reihnaz、hozcozse conhyez ndaem ciengx lijmiz (mbanj)hoh daibyauj caeuq bouxsiuhfei daphwnq aen fugsaeh bingzdaiz gaicawx doxgaiq reihnaz、doxgaiq gunghyez、 sanghbinj daegsaek, coicaenh siugai gij doxgaiq reihnaz mizmingz daegbied ndei haenx， lai hawj doxgaiq reihnaz youq ndaw gih rog gih gaicawx dox baedauq ndeindei, demgya hawsingz lajmbanj siuhfei aeuyungh, coengh gizdieg ginghci hwngfat.

（覃潇艺/Cinz Siuhyi 谭华标/Danz Vazbyauh）