Seizneix, cingq dwg seiz oij haeuj cangj caq dangz, byaij haeuj Fuzsuih Yen Gizgiu Cin Cungzbenh Cunh, raen boux ndaem oij cingq nyaengq sou oij, raemj、haed、gwed、daeh……Gizgiz angqvauvau.

Geij bi neix daeuj, Fuzsuih Yen Gizgiu Cin lai ra vunqsik moq hwngfat nungzyez, haenqrengz guh semzndaem, hawj diegnamh lai miz yungh. Cungzbenh Cunh miz 1.8 fanh moux reihnaz, ndawde buenq lai ndaem oij. Bouxguhnaz yungh geh mbouj ndaem oij, ndaem sae’gva daengj doenghgo baenzgai, doengzseiz lij yawj laengranz najranz、diegndoi byouq daengj, haenqrengz ndaem Makaucouhgenhgoj.

2022 nienz, Cungzbenh Cunh Cunhcizdij Ginghci Hozcozse hwnqbaenz 300 moux dieg guhyiengh ndaem Makaucouhgenhgoj, caemhcaiq sawqguh semzndaem, ndaem maenz- faex caeuq goriengma, lai yungh diegnamh ndei bae. Ciuq cam rox, semzndaem goriengma moux ndaej huqhawq 300-400 goenggaen. Ciuq hawciengz gyaqsou suenq, moux bi ndaej cienz 3600-4800 maenz. Doengzseiz yungh gij guenjguh vunqsik “hozcozse+gunghswh+nungzhoh”, hai diuz roen gai goriengma daengj doxgaiq reihnaz ndeindi.

Linghvaih, Cungzbenh Cunh lij lai guh ndei canjnieb gezgou, hwnqbaenz dieg guhyiengh “caez ndaem ciengx oij bya” caeuq dieg guhyiengh “nungzyez gvanghfuz doxbouj” gak 500 moux, lai yiengh canjnieb caezcaemh okrengz, doidoengh cunhcizdij lai ndaej ngaenz. Ciuq gyoebsuenq, Cungzbenh Cunh cunhcizdij ginghci daj 2022 nienz 7 fanh maenz demlai daengz 2024 nienz sam geiqdoh gonq 20 fanh maenz, ndaej demlai yienhda.

(Cauz Liyenz)