Youq mwhnoq, diuz luengq haeuj ndoeng haenx daegbied raez, byailuengq dwg Mbanjfungz dou, buenqbya gyaeujluengq miz aen mbanj Yauzcuz iq ndeu heuhguh Mbanjcinghlungz. Bouxcawj ranz youq bak mbanj haenx vunz gig ndei, baezlawz gvaq roen, de cungj ok dou daeuj dongx, heuh dou haeuj ranz yietnaiq. Gou nyi buz gou heuh de “Yenzhungz”.

Haeuj ranz Yenzhungz, sim gou miz di naek. Aen ranz haenx, cawzliux gok doxciep faz ciengz caeuq aen dingj ranzhaz louz miz congh rongh ndeu, seiqhenz caiq yawj mbouj raen saek aen cangqhuz. Yo din yamq haeujbae, gou couh yawjraen najding miz bongj feiz ndeu, yahgeq ndeu caeuq song boux lwgnyez gungh sam vunz maeuq youq henz feiz. Raen dou haeujdaeuj, gyoengqde lienzbeiq ndwn hwnjdaeuj, riengzlaeng ndonj haeuj laeng ciengz faexcuk bae. Gyoengqde din fwngz riuz, hoeng gou yawjraen yahgeq daengx ndang duk gaiq baengz ndaemndwtndwt ndeu, gaiq baengz na haenx va mumjgyumq, faenmingz dwg buenq mbangq baengzdemh rwix ndeu. Song lwg haenx yawj daeuj miz cib lai bi lo, gawqyienz lij loh gumq. Yenzhungz gig veiznanz, mbouj eiqseiq gangj daengz, mehmbwk gou, lwg gou raen mbouj ndaej vunzseng.

Ndaw ranz hoengqvangvang, mbouj miz gienh doxgaiq lawz baenzyiengh, gouh bied ngeng youq henz saeu, aeu duenh faex bad guh daengq. Henz feiz miz aen congz rwix ndeu, faexcongz dek hung lumj lwgfwngz, geij aen vanj gwnzcongz ndaemnda’nda. Aen gu diet gyaq youq gwnzfeiz, gu maenz goenjbyoedbyoed, heiq hwnjfwdfwd. Ngoenzhaenx Yenzhungz mbouj heuh dou gwnhaeux, de aeu maenz caeuq raemxndat ciudaih dou.

Gvaqlaeng miz ngoenzhaw ndeu, Yenzhungz aemq caengx maenz ndeu bae gwnzhaw Licouhyangh gai. Bae haw dauq gvaq bak dou ranz gou, buz gou heuh de haeuj ranz yietnaiq, gwnhaeux. Yenzhungz gwn ndaej lai, ngoenz haenx de gingqyienz gwn ndaej haj vanj haeux. Daxbuz gou doiq de naeuz, baezlaeng ngoenzhaw caemh daiq geij boux lwg mwngz daeuj, hawj gyoengqde ndaej gwn fwx haeux imq ndeu. Haw laeng, Yenzhungz daiq lwgsai ndeu daeuj dahraix. Lwg haenx dungxhung riengz boh de, daihiek miz cib bi, fwx ndeu gwn ndaej seiq vanj haeux hung, baenzyiengh Yenzhungz cungj miz di mbouj eiqseiq lo, caeuq daxbuz gou gangj vah boizlaex mbouj dingz. Riengzlaeng song haw, Yenzhungz gonqlaeng daiq lwgsai ndeu caeuq lwgmbwk ndeu daeuj. Baez haenx haeuj ranz gyoengqde, gou mbouj raen dah lwgmbwk neix gvaq, siengj daeuj dwg dou caengz haeuj ranz, de couh ndoj deuz lo. Gyoengqde daeuj geij baez, daxbuz gou cungj ciuqlaeh rung cauq haeux hung ndeu ciudaih. Gou haemq daxbuz, vihmaz Yenzhungz mbouj dawz geij daeg lwg de caemh daeuj liux ne. Daxbuz naeuz: Caemh ok dou mbouj ndaej, sam daeg lwg caezcaemh cuengz vaq ndeu, doxlwnz daenj, bouxlawz ok dou bouxlawz daenj. Gou cij ngeixhwnj, sam lwg haenx moix baez daeuj, gij vaq gyoengqde cungj ityiengh. Daxbuz naeuz, geij ranz Yauzcuz haenx ndaem di haeuxdaeq caeuq maenz guhgwn gvaq ngoenz, haeux cungj gwn mbouj imq. Mwh haenx faen naz daengz ranz ndaej geij bi lo, diegbingz Bouxcuengh yienznaeuz lij hoj, hoeng ndaej gwn haeux imq.

Miz bi ndeu yaek daengz cieng, boh gou gai geij rap haeuxgok yaek cawx buhvaq hawj geij beixnuengx dou, daxbuz daeg’eiq naenq de lai cawx song ciengh baengz, caj ngoenzhaw Yenzhungz daeuj ranz dou, daxbuz aeu baengz caet haeuj aen gyaw de. Daxbuz naeuz, hawj lwg mwngz moix boux guh dauq buhvaq ndeu, lwg majhung lo, lienz vaq cungj mbouj miz daenj mbouj baenz ne.

Gou cam daxbuz vihmaz doiq Yenzhungz baenzneix ndei. Daxbuz naeuz, de caeuq ranz raeuz nyinh lauxgeiq lo. Youq baih ranzcoj gou, mbouj doengz minzcuz nyinh beixnuengx heuhguh “nyinh laux- geiq”, nyinh le lauxgeiq, song ranz vunz couh lumj beixnuengx bonjgya doxbaedauq. Doeklaeng daxbuz caeuq gou naeuz le gij laizyouz caeuq ranz Yenzhungz nyinh lauxgeiq.

Daxgoeng gou mwh oiq dwknyaen, aen nienzdaih haenx henz mbanj ndoengfaex mwncupcup, ndawndoeng duznyaen lai, daxgoeng ciengzciengz comz vunzcug hwnj bya dwknyaen. Miz ngoenz ndeu gyoengqde youq ndawbya humx duz mouduenh sam bak lai gaen ndeu, gumq mouduenh ngaiz baez cungq ndeu, cingq guengzbag buetdeuz. Mbong vunz gyaep de daengz buenqbya seiz youq doiqnaj yawjraen vunz ndeu, couhdwg Yenzhungz, de cingq aeu danq ok yiuz. Bouxlawz cungj rox, mouduenh deng sieng le beij duzguk lij yak, yawjraen miz vunz dangj roen, mouduenh daengx da- nding couh daemj hwnjbae, aeu bakraez de mboi, mboi fan Yenzhungz youq gwnznamh, goekga de hix ngaiz heuj mouduenh coeg ok lwed. Vunz ndawbya bungz yungyiemj rox gaggouq, Yenzhungz heuh ok sing, nyaenx in swnhseiq rouxringx. Bingzciengz, cijaeu liz ndaej gyae, mouduenh couh mbouj laeh lo. Hoeng baezneix dwg laehvaih, mouduenh mbouj dingz, bien heuh bien cung roengz ndoi bae. Youq mwh gaenjgip haenx, cungq ndaeng lo, goek rwz mouduenh dawz cungq, riengzlaeng couh laemx youq gwnz faexdoenj lo.

Daxgoeng hawj doengzdoih ram duz mouduenh, ndanggaeuq leg buh gwnzndang daeuj suek haen baksieng ga Yenzhungz, yienzhaeuh dex de dauqranz, daengz ranz le youh gwih civaiz soengq de ganj bae aen veiswnghyen ndaw yangh. Gvaqlaeng Yenzhungz dawz duz gaeq ndeu caeuq daeh biek ndeu daeuj ranz dou nyinh lauxgeiq lo.

Daxmeh caeuq gou naeuz, Yenzhungz nenq aen. Gou okciuh bi haenx bungz daengz caivueng, haeux reih haeux naz ndaej gig noix, ranzranz cungj mbouj gaeuq gwn, doihduz ndaw ranz hix dai saw lo. Gou okciuh geij ngoenz nduj daxmeh cijndaej gwn haeuxaemj, lienz gyaeqgaeq hix mbouj ndaej gwn, de mbouj miz raemxcij, gou iek lai daej baenzngoenz baenzngoenz. Mbouj rox Yenzhungz baenzlawz rox, de aemq daeuj buenq bied nohyiengz, naeuz gyaebgyaeb hwnjbya dwk ndaej duz yiengzbya ndeu. Daxmeh doiq gou naeuz, neix dwg buenq duz yiengz ha, cang aen gyaw hung rimradrad. Gyaw nohyiengz haenx hawj daxmeh bingzan youqndwen. Daengz mwh neix gou ciengzciengz siengj, mwh iek sij ndaej gvej buenq duz yiengz ndanggaeuq dwk ndaej haenx daeuj hawj bouxwnq, caenznaeuz mbouj dwg sim doh ndei caen guh mbouj daengz.

Daxbuz mwh lij lix ciengzciengz daengq dou, ndwenngoenz ndaw byalaeg ceijdingh mbouj ndei gvaq, saeh ranz lauxgeiq gyoengqsou ndaej bang couh lai bang di. Miz bi ndeu yaek gaj moucieng, daxboh cienmonz bae Mbanjcinghlungz daix Yenzhungz daengx ranz daeuj. Gou soengq song daeg lwg Yenzhungz boux dauq buhvaq, gij de gou daenj gaenq dinj lo, nuengxsau gou soengq dahlwg Yenzhungz gienh buhgaeb na ndeu, boh gou soengq Yenzhungz doiq gaijfanghaiz ndeu, meh gou soengq mehyah Yenzhungz gienh buhdungh ndeu. Daengx ranz lauxgeiq youq ranz gou ninz haemh ndeu, ngoenz daihngeih cij dauqbae. Hix couhdwg baez haenx, gou cij rox daengz Yenzhungz singq Vangz, lwglaux de heuh Yozna, lwgngeih heuh Yozbingj, lwgmbwk heuh Niznuj.

Geij bi neix, daxmeh caeuq gou youq ndaw singz youq, bi’gvaq de naeuz daengz ranz lauxgeiq geij baez, naeuz geijcib bi gvaqbae lo, hix mbouj rox gyoengqde seizneix baenzlawz yiengh lo. Betcib lai bi vunz deihmaed damz gienh saeh ndeu, gou rox neix dwg gijmaz eiqsei.

Bineix ndwencieng co’ngux gou bae Mbanjcinghlungz lo. Seizneix haeuj Mbanjcinghlungz gaenq mbouj yungh byaijroen lo. Daj dinbya henz mbanj dou miz diuz goengloh ndeu ngutngut ngeujngeuj coh byalaeg bae, roen saiz, ci gvaq ndaej, lan gou hai cimohdoz soengq gou haeujbae, buenq aen cungdaeuz couh daengz ndaw mbanj lo. Gvaq ndaej samcib lai bi, aen mbanj iq neix caeuq gaxgonq beij bienq le haujlai. Aen ranz mbouj lai, hoeng cungj dwg ranzlaeuz, aen- aen gag hwnq youq buenqbya. Ranzlaeuz baihnaj baihlaeng cungj miz cumh go’ndoek maenhdwtddwt roxnaeuz miz geij go mak hung sang humx dwk. Cieng caengz gvaq liux, miz lwgnyez youq gwnzcanz cuengq bauqbej, ndaeng dungdung hoenzfwdfwd, sing riu hix daj mbawfaex mwncumcum haenx cienz okdaeuj.

Gou riengz roen haemq, daeuj daengz bakdou doengh laeuz iq ndeu. Ndaw ranz miz mehmbwk byom ndeu cingq gaeuzhwet uet daengq, gou cam:“Gizneix dwg ranz Vangz Yenzhungz ba?” De ndwn soh, naj doxdoiq mwhhaenx gou caeuq de cungj gyaengj lo, gvaq ndaej cibgeij bi, dou lij nenq ndaej najda doiqfueng, “Mwngz dwg Niznuj!” Gou naeuz. “Dwg ha, mwngz dwg Gocungh ranz lauxgeiq lwi!” De sing hung gangj, “Vaiq, vaiq haeujdaeuj naengh, ndaw ranz miz di luenh.”

Gizsaed ndaw ranz mbouj luenh, densi、binghsiengh gak youq naj dangz, daengqcongz caezcingj riengz ciengz baij youq song henz, sojmiz doxgaiq cungj cingj ndaej caezcupcup. Suijniz deihmienh baet ndaej saw, ciengz seiqhenz、denhvahbanj hix daz ndaej hausaksak. Yawj ndaej ok ranz de ndwenngoenz gvaq ndaej ndei, lij gangjgouz dem. Dan dwg dangqnaj yawjraen, gou haeuj ranz couh sim- angq lai lo.

Cij miz Niznuj youq ranz, gvan de gyanghaet caeuxcaeux couh daiq song daeg lwg bae mbanj wnq yaemq beixnuengx lo. Naengh roengzdaeuj gangjgoj, coenzgangj dou coenz- coenz liz mbouj ndaej saeh bi- ndwen gaeuq. Bohmeh Niznuj geij bi gonq gvaqseiq lo, mwhhaenx ndaw ranz hoj, song daeg go de bi’ ndwen hung cungj ra mbouj ndaej mehyah, cij ndaej bae mbanj wnq hwnjdou guh gwizcoemq.

Naeuz daengz gwndaenj mwh- neix, Niznuj riunyumnyum. Ranz de miz faexsamoeg roegcib lai moux, miz youzcaz seiqcib moux, cungj dwg cib bi gonq ndaem baenz. Lwgfaex dwg mwh haenx ndaw yangh soengq, geij bi neix youzcaz gyaqcienz ndei, bi ndeu gai ndaej seiq haj fanh, faexsamoeg bineix ndaej gai buek ndeu, daihgaiq ndaej cib lai fanh. Bi ndeu ciengx song baez gaeq, dan gai gaeq bi ndeu couh ndaej haj fanh. “Mwh neix ndei lai lo, gijmaz cungj mbouj youheiq lo.”De doq gangj doq riu.

Gwnringz gvaq, daengngoenz gig rongh. Niznuj soengq dou daengz bak roen, naeuz: “Go baenaj ciengz daeuj ha.” Gou naeuz: “En, ciuhgeq nyinh lauxgeiq, mbouj ndaej youq ciuh raeuz duenq lo.”