Loih Sawging Ndawbiengz Saenqyiengj

Gaengawq《Sawloih Hung Guengjsae》(Gienj Minzcuz) diuz“Ndawbiengz Cunghgyau Saenqyiengj Bouxcuengh” geiqsij, Mwh Dunghhan couh gonqlaeng miz bouxdauh daengz Yungzcouh (seizneix Gvangjsih Yungzyen) Byaduhgyauz lienh- dauh, Sungdai Daugyau menhmenh hwnghoengh, youq Gveibwz、Gveinanz gungh hwnq miuhdauh 27 aen. Fuzgyau daihgaiq youq Dunghcin seizgeiz cienz haeuj Guengjsae, youq Vuzcouh hwnqguh ranzmiuh. Gvangjsih gak minzcuz doxwngq supsou gij vwnzva daugyau、fuzgyau, youq gwnz giekdaej saenqyiengj codaeuz hwngfat baenz saenqyiengj ndawbiengz lai yiengh vwnzva yungzhab, miz ok goengmo、goengdauh、goengsae、baeuqmo（Vahyizcuz, dwg bouxlaux miz cihsiz）、goenghozsiengh doengh bouxcangh ndawbiengz, gyoengqde yungh cihsaw minzcuz geiqloeg、biensij baenz gyoengq saw ndawbiengz saenqyiengj mizmingz. Doengh gij saw mizmingz neix gaengawq yizsiz yunghcawq ndaej faen baenz sawguhgimq、sawndokgaeq、sawmo、sawbaeuqmo、sawgoengsae、sawgoengdauh geij loih, gyoengqde dawz gak minzcuz gojgaeqfangz、gojgaeq、cienzgangj、fwen、gojbeij gyoebgyonj yungzhab youq itheij, geiqsij gak minzcuz mizgven haicauh diendeih、cauh ok vunzloih doenghyiengh、dingh ok gvigawj、ceihleix lajbiengz doengh gij neiyungz neix, fanjyingj gij yawjfap gwnzmbwn lajdeih、gij yawjfap cezyoz、gij yawjfap lizsij、gij yawjfap lunzlij gak minzcuz, baenz sawgeq cihsaw minzcuz vunz noix ndeiraeuh mizmingz ndaej daibyauj doengh gij saw neiyungz genjdan laegdaeuq、banjbonj daegsaek sienmingz、vahgangj cihsaw mbouj doengz haenx.

(Vangz Gyanghmyauz hoiz)