Mboengqneix, Lauxlinz rox- nyinh gig ngeizvaeg caeuq mboujonj. Baenzgya ngeihcib lai bi lo, de caeuq yah de gamjcingz cungj gig huzswnh. Hoeng gaenh geij ndwen neix daeuj, mehyah de hainduj bienq ndaej lai sim lai saeh, ciengzseiz mbouj gyaeuj mbouj rieng、mbouj miz laizyouz laih de sim mbouj youq ranz. De mbouj rox swhgeij baenzneix gyaez yah de, seizneix yah de dauq bienq baenz yienghneix, hawj de simnaiq youh simfanz. Gij saeh haenx lumj fag cuiz naek ndeu, mboujduenh roq haeuj sim de daeuj. Moix baez raen yah de da caengz de, sim de couh lumj deng fag cim camx nei in dangqmaz.

Ngoenzneix, yah de youq ndaw ding cek gvaidi seiz, raen lai miz aen ndeu. Cek okdaeuj le, yah de cij aen gvaidi neix gingqyienz dwg geu buhlaengj hoengz lumj aensim moq nei. Sawqmwh, najriu ronghsagsag yah de sikhaek bienq ndaem lo. De nyeux gyaeuj cam Lauxlinz naengh youq sahfaz haenx:“Geu buhlaengj hoengz neix dwg cawx hawj bouxlawz?” Lauxlinz raen mehyah lumj mehguk nei, song lwgda hung lumj lingzdoengz, caengzngaungau coh swhgeij, “Mehmbwn ha，gwn raemxsaw hix gazhoz！”Ndaw sim de sikhaek nyoenx ok cungj ienuengj daeuj.

Lauxlinz cuengq faenh bauqceij ndaw fwngz roengzdaeuj, coih aen gingqda le, ganjgip ngauz gyaeuj naeuz:“Gou mbouj cawx gijmaz ni.”Yah de gig ngeizvaeg, de hujdengdeng naeuz:“Yienghneix dwg bouxlawz? Ndaw ranz dan miz gou caeuq mwngz, mbouj dwg gou cawx, gij saenqsik gvaidi hix dwg mwngz，mwngz baenz duzgvi suk gyaeuj, gamj guh mbouj gamj nyinh lwi?”Lauxlinz hozgaek lo, hoeng youh mbouj rox baenzlawz dap cij ndei.

“Hw, aeu soujgih mwngz hawj gou, yawjyawj mwngz gaenh neix youh miz maz mbouj doengz?”Mehyah daengx naj caengz Lauxlinz baez ndeu, hozbongz dwk naeuz. Mwhhaenx, Lauxlinz ndaw sim lumj ngaiz nae dub dawz, nit saenz liux.

“Aen soujgih gou youq ndaw ranzsaw cung dienh ne? Mwngz caen siengj yawj, gou couh bae aeu hawj mwngz lo.” Lauxlinz mbouj miz banhfap, gangj liux couh byaij coh ranzsaw. De roxnyinh swhgeij couh lumj lwgnyez deng ienuengj nei, mboujlwnh baenzlawz gejnaeuz yah de cungj mbouj saenq.

De doq byaij doq siengj, bonjfaenh dwg mbouj dwg lumj yah de gangj nei miz maz cingzgvang mbouj doengz…… Sawqmwh, de siengj daengz haxbaenh cib faen cung gaxgonq ngamq gya baenz veizsin baengzyoux haenx.

Yienznaeuz, de gya boux baengzyoux mehmbwk neix, ndang cingq ngaeuz mbouj mbeuj. Hoeng vihliux“ndoj yungyiemj”, Lauxlinz vanzlij gietdingh laeglemx dwk mbat denva ndeu hawj dahyoux yawj. De veq ndang liuq da yawj yah cingq nyaengq cek gvaidi haenx, couh gipmuengz ndonj haeuj ndaw ranzsaw bae, dwk denva hawj dahyoux de:“Dahsau, caen doiq mbouj hwnj, gou mwhneix bungz daengz di mazfanz ndeu. Mehyah gou lijgaij loeng gou……, gou gvaqlaeng caiq caeuq mwngz gejnaeuz lo, gou seizneix ca mwngz bae lo, caj saeh banh ndei le, gou caiq lienzhaeh mwngz, muengh mwngz yienzliengh.” Dah sau haenx yienznaeuz roxnyinh gig geizheih, hoeng hix doengzeiq lo: “Ndei, mbouj youqgaenj, muengh mwngz gaijgez ndei vaiqdangq, swnhleih!”

Lauxlinz cuengq denva le, couh vaiqvet ca bae dunghvah geiqloeg caeuq veizsin. Caj ukgyaeuj singj ndei le, de cij soeng gaemz heiq ndeu. Hoeng seizneix, simcingz de vanzlij lumj gwnzmbwn miz fwj ndaem cw dwk, mbouj miz saek di rongh. De mbouj rox swhgeij dauqdaej guh loeng gijmaz, hawj mehyah yienghneix ngeiz de. De roxnyinh swhgeij youq ndaw ranz neix bienq ndaej siujsim riri, caenh lau caiq guh loek gijmaz saeh.

“Gij baengzyoux ndaw veizsin gaxgonq, mehyah cungj rox, baez neix wnggai mbouj miz gijmaz saeh luba.”De nyinhdingh bonjfaenh mbouj miz saek aen cingzgvang daegbied, engqgya saenq yah de yawj soujgih gvaq le, haengjdingh yied daeuj yied saenq de, baenzneix couh menhmenh siu gij saeh lijgaij loeng haenx lo…… Ai, gij ngeizvaeg mehyah haenx caen nyoegnyamx vunz lai lo!

Mehyah naengh youq gwnz sahfaz leix deng heiq gengq, lwg- fwngz mboujduenh ved gwnz ved laj haeujsim cazyawj soujgih Lauxlinz.

Lauxlinz couh caenq seizneix bae ranzdajcawj swiq song aen makbingzgoj, yaek ronq baenz gaiq, yaep ndeu caeuq yah de caez gwn. Gaej yawj gij makbingzgoj neix maj ndaej hoengz ndaem, yakyawj dangqmaz, hoeng mak de gaeuq geq gaeuq van, raemx lij lai dem, baenz gwn dangqmaz.

Makbingzgoj neix, cingq lumj gvanbaz de, yienznaeuz mbouj dwg yienghyiengh cungj habhoz. Hoeng 20 lai bi daeuj, songde cungj dox- gingq lumj hek, vuenyungz dangqmaz.

Siengj daengz neix, de dauqdaej soeng gaemz heiq ndeu lo,“Ngoenzneix dwg ngoenz ndei ndeu……”De ngamq ciengq ok coenz go《Saedceij Ndei》Sung Cujyingh haenx, byawz rox dauq deng mehyah de rongx doeksaet yat bae lo.

“Fangz dairaq mwngz, sikhaek ringx gvaqdaeuj!” Mehyah de faj naj cungj ndaemndatndat, hujdengdeng da daengx hawj Lauxlinz saenzdedded.

Ndaw sim de“bub”sing ndeu, fwngzswix deng caxgatmak heh ok lwed lo, gij lwed riengz bak loh saeq rih roengzdaeuj, youh ndaemq youh in.

“Naeuz! Meh neix dwg byawz? Fat baenz doi sei fatndau daeuj?”Mehyah mbouj gonj gij sieng gwnz fwngz Lauxlinz, fatbag daih swenj cam de.

Lauxlinz baez anj——gou haxbaenh mbouj dwg daj denva ca dahsau haenx bae luma?

Lauxlinz dingh da baez yawj, vaih lo. Yienzlaiz dwg “doxbungz dwg souj go”boux canghsei bouxsai haenx.

Neix dwg geij ngoenz gonq, bae camgya aen hoih lwnhgangj ndaw si vwnzlenz cujciz haenx ngamq gya de baenz veizsin baengzyoux. De haengj sij gij fwensei gamjcingz saeqnaeh haenx. Hoeng de ngangz yungh aen siengq dahsau gyaeundei daenj mauh nding, daenj vunj raez hausagsag haenx bae guh siengq de.

Dingjlingz, song ngoenz neix de fat haujlai hot sei aiqcingz gvaq daeuj doxyaeng baenzlawz guh sei. gij sei de byaujdaz saeqnaeh gamjcingz lai yiengh…… Gig yungzheih hawj vunz doeng siengj sae siengj.

“O, gijneix ha? De dwg canghsei bouxsai ne. Mbouj saenq, gou seizneix sikhaek dwk denva sibinz hawj de cwngmingz hawj mwngz yawj.” Raen dwg “doxbungz dwg souj go”, Lauxlinz dauqdaej soeng gaemz heiq lo, sim bingz heiq huz.

Lauxlinz caeuq baengzyoux gangjgoj gvaq le, mehyah de cij rox de caen lijgaij loek Lauxlinz, hawj de saenq ndaej gig noix. Hoeng, mbouj loengh cingcuj geu buhlaengj hoengz neix, de bietdingh mbouj ndaej cuengqsim. Aenvih swhgeij dauqdaej nienz laux bienq nyieg lo, hoeng, bouxgvan saehnieb cix mboujduenh swng sang……

Ngoenz daihngeih banhaemh, Lauxlinz caeuq yah de gak miz simsaeh, cungj mbouj guhsing, cij ngaem gyaeuj gwn caeuz.

Yaep ndeu, dahlwg daj sengj rog dwk denva sibinz gvaqdaeuj hawj mehyah. Seizneix, gyoengq hagseng daihhag ngamq cuengq- hag.

“Vei, daxmeh, mwngz caeuq daxboh cingq gwn haeux ne? Mbwn liengz lo, gou daegdaengq aeu coh daxboh soengq hawj mwngz doeksat youh vuenheij, sou daengz caengz?”Dahlwg gangj sat couh riugekgek.

“Yo, laizlawz dwg mwngz cawx buhlaengj hawj gou ha? ” Mehyah de ngawh lo, da liuq Lauxlinz mbat ndeu.

“Geu buhlaengj mwngz hawj gou doeksaet, youh sawj gou nit lai lo.”Lauxlinz hehe riumbw song sing, laebdaeb ngaem gyaeuj gwn haeux.

Yah de cix riunyumnyum mbouj eiqsei lo. De nip gaiq ndoksej soemjvan ndeu cuengq haeuj ndaw vanj Lauxlinz bae naeuz:“Lwg ha, dou gwn ndoksej soemjvan bw, soemjvan soemjvan, neix couh dwg gij feihdauh saedceij gyaeundei lo……” Mwhhaenx, ndaw sim Lauxlinz lumj miz gij ndit seizcin ciuq haeuj, raeujrubrub、ronghsagsag.

Aen ngeiz buhlaengj hoengz neix gej ndaej ok lo. De couh lumj duz saidoengz nei, yienznaeuz ginglig fwn rumz gvaq, hoeng gij saek de dauq lwenq ndaej engq ronghsag gyaeundei dem.