2024 nienz doxdaeuj, Duh- anh Yauzcuz Swciyen gyavaiq doicaenh aen canloz saekloeg hwngfat, aeu swnghdai fouqminz guh dazyinx, cungfaen fatok gij cozyung aen gihci linzcangjci, doinyoengx ndoengfaex hwngfat ndei bae, daengz seizneix, daengx yienh mbouj miz saek aen anqgienh hung nangqdaengz ndoengfaex nangqdaengz diegnywj、feiz hung coemh ndoeng daengj.

Soudauq dieg laemzseiz yungh, gyamaenh swnghdai baujcang. 2018 nienz doxdaeuj, aen yienh neix cienzmienh cingjceih gij vwndiz guh hanghmoeg laemzseiz yungh diegndoeng, daengz seiz- neix, gyoebsuenq guhsat dauq ndaem doengh go faex 85.51 gunghgingj, doenghgo hoizfuklwd 73.94%, daezswng gizdieg ndaw yienh swnghdai bingzcang ndeindi.

Caz daej ndoengfaex mingzbeg bae, gyagiengz baujhoh ndoengfaex. Cujciz gak gaep linzcangj haeuj gak yanghcin、mbanj bae baizcaz cunz ndoeng、diuzgaij doxceng ndoengfaex; mbouj dingh geiz cienmonz hai hoih, faensik giz mbouj doh caeuq giz laeuh guenjleix ndoengfaex, haenqrengz doinyoengx hong cingjgaij gij vwndiz nangqdaengz ndoengfaex; giethab dukcaz ndoengfaex, guh aen hengzdoengh cienmonz dwkceih dwkvaih ndoeng dwkvaih nywj dwkvaih diegcumx, cienzmienh baizcaz gij vwndiz nangqdaengz ndoengfaex, caz daej ndoengfaex mingzbeg bae, maeuzveh gya- gvangq ndoengfaex. 2024 nienz, daengx yienh ndoengfaex najdieg moegbiu dwg 20.62 fanh gungh- gingj, seizneix miz ndoengfaex najdieg 22.68 gunghgingj, moegbiu guhsatlwd 110%.

Ndoengfaex dij cienz laebdaeb hwnj sang, ginghci yauqik cugciemh yienh okdaeuj. 2024 nienz, daengx yienh ndoengfaex dij cienz demlai moegbiu dwg 16%. Ndoengfaex dij cienz gujsuenq daengz 31273 fanh maenz, demlai daengz 17.2%. Laj faex dajndaem dajciengx dij cienz gujsuenq daengz 9.5 ik maenz, doengzbeij demlai 2.1%. Guh baenz aen giyez gyagoeng doxgaiq ndoengfaex ndeu, gaenq guhsat hanghmoeg buedcienz 510 fanh maenz. Youzcaz ndaem moq najdieg 5125 moux; ginggvaq gujsuenq, 2024 nienzdoh daengx yienh baenz cehyouzcaz 980 dun, doengzbeij demmaj 30.7%.

(Vangz Bungz)