2024 nienz 12 nyied 27 hauh, Gvangjsih Daibyaujdonz Camgya Gaiq Daihcibngeih Daengx Guek Siujsoq Minzcuz Conzdungj Dijyuz Yindungvei Cungjgez Davei youq Nanzningz hai. Swcigih Dangjveij suhgi Liuz Ningz bae vah. Swcigih Dangjveij cangzveij、Dungj- canbu bucangj, Gvangjsih Daibyauj- donz donzcangj Vangz Sinhfu camgya caemhcaiq gangjvah.

Liuz Ningz bae vah naeuz, mwh Gaiq Daihcibngeih Daengx Guek Siujsoq Minzcuz Conzdungj Dijyuz Yindungvei, gih raeuz camgya rog gih doxdax aeundaej gij cingzcik doenghbaez caengz miz gvaq, gij cingzcik doxdax caeuq cingsaenz vwnzmingz cungj miz fungsou, yienh- ok le gij cingzcik hwnqguh aen gih guhyiengh couqmaenh gij eiqsik caezcaemh Cunghvaz Minzcuz caeuq gij saehnieb siujsoq minzcuz conzdungj dijyuz gih raeuz hwngfat baenaj, langhbaij le gij yienghsiengq cingsaenz ndei daengx gih gak cuz bouxminz doxgiet buekguh、haenqheiq buekguh, cukhoh caeuq caensim camnai gyoengq bouxguhhong caeuq yindungyenz、gyaulenyenz siujsoq minzcuz conzdungj dijyuz daengx gih. Gwnz roen moq seizdaih moq, aeu haeujlaeg hagsib gvancez gij swhsiengj youqgaenj gvendaengz gyagiengz caeuq gaijndei hong minz- cuz nem gij iugouz cijsi youqgaenj gvendaengz hwnqguh aen guek ak dijyuz Siz Ginbingz cungjsuhgi, hag swhsiengj、gangj doxgap、ca doeksaed, doinyoengx gij saehnieb minzcuz dijyuz hwngfat ndei saed, caezhwnq caezyungh “haj aen suenranz”, doxcaez roengzrengz hwnqguh aen gih guhyiengh couqmaenh gij eiqsik caezcaemh Cunghvaz Minzcuz caeuq aen gih ak dijyuz, haenqrengz raiz bien faenzcieng Gvangjsih gij yendaiva yiengh Cungguek.

Aen hoih cungfaen haengjdingh gij cingzcik ndei Gvangjsih daibyaujdonz aeundaej haenx, ndaej 12 aen it daengjciengj、 31 aen ngeih daengjciengj、35 aen sam daengjciengj, aeundaej cingzcik doenghbaez caengz miz gvaq, nyinh- naeuz gij gingniemh Gvangjsih daibyaujdonz aeundaej cingzcik baenzneix ndei, dwg ciuqei gij swhsiengj youqgaenj gvendaengz gyagiengz caeuq gaijndei hong minzcuz nem gij lwnhgangj youqgaenj gvendaengz dijyuz Siz Ginbingz cungjsuhgi, laebdaeb cuknet aen giek maenhdwd gij saehnieb minzcuz dijyuz hwngfat hoengh- vuengh, haenqrengz fatyiengz gij cingsaenz buekguh doxgiet doxbang、buekguh ceng gonq. Aen hoih daegbied gangj daengz, aeu itloh dingjmaenh diuz sienqmeh couqmaenh gij eiqsik caezcaemh Cunghvaz Minzcuz, hwngfat gij saehnieb minzcuz dijyuz bae doinyoengx cauhlaeb aen suenranz cingsaenz caemhmiz Cunghvaz Minzcuz, cuknet aen giek hwngfat gij saehnieb minzcuz dijyuz, daezgonq maeuzveh ndei hong camgya gaiq laeng daengx guek siujsoq minzcuz conzdungj dijyuz yindungvei, laebdaeb ceng cingzcik ndei, laebdaeb doinyoengx gij saehnieb minzcuz dijyuz hwngfat ndei saed.

Swcigih fucujsiz Huz Fanz cujciz aen hoih. Gwnz hoih, lwnh gij cingzgvang Gvangjsih daibyaujdonz camgya yindung, doeg gij gietdingh byaujyangz、gikcoi, boux daibyauj yindungyenz、gyaulenyenz ndaej ciengj caeuq boux dungzci fucwz aen danhvei ok hanghmoeg camgya doxdax haenx hwnj daiz gangjvah.

(daj 《Gvangjsih Yizbau》 aeu daeuj hoiz Hoz Minzvaz)