Loih Fwen

Guengjsae dwg diegcoj Sih’ouh、Loegyied, gak minzcuz “daj ciuhgeq couh hwng fwen maij fwen”. Sihhan sijyozgyah、vwnzyozgyah Liuz Yang youq bien faenzcieng《Rox Gangj》 ndaw bonj saw《Gangj Gij Saeh Vunz Noix Rox》 de sij haenx, geiqloeg hot《Fwen Vunz Loegyied》, seizhaenx vunz Loegyied hoiz baenz:

Haemhneix haemh gijmaz, gyangdah ruz okdaeuj.

Ngoenzneix ngoenz baenzyouq, ndaej ndij sou caemh ruz.

Gyo’mbaiq mwngz hawjnaj, aj dongx cix launyaenq.

Ndaej caeuq beix doxraen, aen sim luenhnyagnyag.

Ndaw ndoeng miz faex faex miz ngeiq, ndaw sim maeh beix beix mij rox.

Hot fwen neix miz gij funggek《Lizsauh》, gangjok Cangoz seizdaih vunz Loegyied guh fwen suijbingz gig sang. Cunghgoz Sevei Gohyozyen Minzcuz Yenzgiusoj Veiz Gingvwnj boux yijyenz yozgyah daihneix doeng- gvaq faensik doxbeij yenzgiu gij vahyaem、swzloih、yijfaz《Fwen Vunz Loegyied》, ndaej ok gietlwnh nyinh- naeuz 《Fwen Vunz Loegyied》 dwg gij fwen ceiq caeux vunzgonq Boux- cuengh miz cihsaw geiqsij, caemhcaiq hoiz de baenz Sawgun daihneix:

Haemh neix dwg ciet gijmaz? Ruz youz baenzneix hoenghhwd.

Boux naengh ruz dwg bouxlawz, dwg bouxguen ndaw ranzvuengz.

Bouxvuengz dakdaih youh haenhndei, gou cijmiz gamjgik.

Gou ndawsim nyinh gij cingz- ngeih mwngz.

Gij sibgvenq vunz gak minzcuz Guengjsae “hwng fwen maij fwen” hawj Guengjsae aeundaej aen mingz- daeuz “fwenhaij”, loih fwen Guengj- sae soqliengh haemq lai, lij dwg aenvih hawfwen ciuh dam ciuh hwngvuengh ndaej miz okdaeuj. Banh Gizyuz youq ndaw bonj saw《Yenzgiu Hawfwen Bouxcuengh》cobouh doengjgeiq le gij cingzgvang deihmingz、ngoenzgeiz、 vunzsoq 40 lai aen yienh si 642 aen diegciengz hawfwen. Doengh gij hawfwen neix dwg gizdieg dinghmaenh vunzlai dinghgeiz “doxcomz eufwen”, dingz- lai dwg youq rog doengh ndaw naz、gwnz bo、laj dinbya、henz dah. Bibi ngoenz hawfwen, vunzlai daenj buh lengj okdaeuj, saek mwh vunz lai saek mwh vunz noix, mizseiz geij bak boux, mizseiz geij cien boux, mizseiz gvaq fanh vunz. Hawfwen Gamj Cunhyauj Gamjcuengh Gvangjsih Denzyangz Yen(seizneix gaij guh Denzyangz Gih), bi 2005 daengz bi 2007 moix bi ndwensam cocaet daengz cogouj mauhgvaq 20 fanh vunz daeuj ganj hawfwen, hoenghhwd nauhyied. Hawfwen dwg gizdieg gak dieg canghfwen doxdax eu fwen beijak, hix dwg aen cietangq gak minzcuz bouxcoz sai mbwk eu fwenyoux、ciuq go ra youx.

Cingq aenvih yienghneix, Guengjsae gak minzcuz cij baenzneix ak guhfwen, louzce haujlai sawfwen mizmingz. Lumjbaenz Cingciuz cogeiz Sinzcouh (seizneix youq Gvangjsih Gveibingz Si) bouxguen duihgvanh Vuz Giz cawjbien《Yozfungh Swnj Gouj》, souloeg gij fwen ranghdieg Sinzcouhfuj Cuengh、Gun、Yauz lai aen minzcuz, baenz bonj saw comz Go Bouxgun、Fwenliengz、 Fwencuengh、Fwenyauz、fwencab gungh 121 hot, de dwg guek raeuz bonj fwencomz lai aen minzcuz ceiq caeux ndeu. Gij fwen youq ndaw sawgeq nanz raen、sanq youq ndawbiengz haenx couh engqgya geq mbouj rox liux lo, lumjbaenz《Fwenleux》Bouxcuengh Gvangjsih Bingzgoj Si、《Fwencienzhaenh》Boux- cuengh Majsanh、《Fwennaiq》Boux- cuengh Yinhcwngz Yen、 《Fwenangq Bouxcuengh》 Liujcouh Si Liujgyangh Gih doengh gijneix, moix loih fwen ciengqdiuh cungj gag miz daegsaek, banjbonj lairaeuh, nanzgvaiq Guengj- sae dwg “gizdieg fwen lajbiengz gyaezndiep”.

(Vangz Gyanghmyauz hoiz)